ސިވިލް ކޯޓުގެ އިސްގާޒީ ކަމުގެ މަގާމުގައި ހުންނެވި ގާޒީ އަބްދުالله އަލީ ހުށަހެޅުއްވި ރިޓަޔަމަންޓް, ޖުޑީޝަލް ސާވިސް ކޮމިޝަން (ޖޭއެސްސީ)އިން ގަބޫލުކޮށްފި އެވެ.
އެ ކޮމިޝަންގެ ސެކްރެޓަރީ ޖެނެރަލް އިޒްމީރާ ޝިހާމް މިއަދު މި ނޫހަށް ވިދާޅުވި ގޮތުގައި, ގާޒީ އަބްދުالله އަލީ، މީގެ ދުވަސްކޮޅެއް ކުރިން ހުށަހެޅުއްވި ރިޓަޔަމެންޓާމެދު ޖޭއެސްސީން އިއްޔެ ވަނީ ގޮތެއް ނިންމާފަ އެވެ.
އެގޮތުން, ރިޓަޔަމަންޓް ގަބޫލުކޮށް, އިއްޔެ ވަނީ ގާޒީއަށް އެކަން އަންގާފަ އެވެ. އަދި ރިޓަޔާ ކުރެއްވުމުގެ ކުރިން މިހާރު ބަލަމުންދާ މައްސަލަތަކުގެ ތެރޭން ނިންމަން ޖެހޭ މައްސަލަތައް ނިންމުމަށް އުސޫލުގެ ދަށުން ދޭ 14 ދުވަސް ވަނީ ދީފައި ކަމަށް އިޒްމީރާ މައުލޫމާތު ދެއްވި އެވެ.
އެ 14 ދުވަސް ހަމަވާނީ އަންނަ މަހުގެ ހަތަރު ވަނަ ދުވަހަށެވެ. އެ ދުވަހަށްފަހު ގާޒީ އަބްދުالله އަލީ ރަސްމީކޮށް ރިޓަޔާކުރައްވާނެއިރު, އޭގެ ފަހުން ސިވިލް ކޯޓުގެ ހިންގުން ހަވާލުކުރަން ނިންމާފައިވަނީ އެ ކޯޓުގެ ގާޒީ އަހުމަދު ނިމާލު ޖުނައިދަށް ކަމަށް ވެސް ޖޭއެސްސީގެ ސެކްރެޓަރީ ޖެނެރަލް ވިދާޅުވި އެވެ.
ޝަރަފުވެރިކަމާއެކު ރިޓަޔާ ކުރައްވާ ގާޒީންނަށް ދައުލަތުން ހާއްސަ އިނާޔަތްތަކެއްދެ އެވެ.
ގާޒީ އަބްދުالله އަލީ ސިވިލް ކޯޓުގެ އިސްގާޒީ ކަމަށް ރަސްމީކޮށް އައްޔަން ކުރެއްވީ 2016 ވަނަ އަހަރު އެވެ. އޭގެކުރިން ވެސް ހުންނެވީ ވަގުތީ ގޮތުން ކޯޓުގެ ހިންގުމާ ހަވާލުވެ އެވެ.
އޭނާއަކީ ޝަރުއީ ދާއިރާގައި މަސައްކަތް ކުރައްވާތާ ވަރަށް ގިނަ ދުވަސްވެފައިވާ ބޭފުޅެކެވެ. މެޖިސްޓްރޭޓްކަން ވެސް ގިނަ އަހަރުތަކަކު ކުރައްވާފައިވެ އެވެ.
މިފަހުން އަބްދުالله އަލީގެ ސުލޫކީ މައްސަލަތަކެއް ވެސް ޖޭއެސްސީއަށް ހުށަހަޅައިގެން ބެލި އެވެ. ނަަމަވެސް, އޭގެން އެއްވެސް މައްސަލައެއް ސާބިތުވެފައެއް ނުވެ އެވެ.
