ޕެރިސް (އޮގަސްޓް 22) - ފްރެންޗް ލީގުގައި ރޭ ކީލިއަން އެމްބާޕޭގެ ހެޓްރިކާ އެކު ޕީއެސްޖީން 7-1 އިން ލިލް އަތުން ބޮޑު މޮޅެއް ހޯދައިފި އެވެ.
މި މެޗުގެ އަށް ވަނަ ސިކުންތުގައި ޕީއެސްޖީގެ އެމްބާޕޭ އެ ޓީމަށް ލީޑުނަގައިދިންއިރު، މިއީ ފްރެންޗް ލީގުގެ ތާރީހުގައި ވެސް ފެނުނު ދެ ވަނަ އަށް އެންމެ އަވަސް ގޯލެވެ. ހާފުގެ މެދު ރޮނގާ ހަމައިން ލިއޮނަލް މެސީ ޖައްސާލި ބޯޅަ އެމްބާޕޭ ވަނީ ލިލްގެ ކީޕަރު ލެއޯ ޖާޑިމް ބޯމަތިން ގޯލަށް ފޮނުވާލައިފަ އެވެ.
މެޗުގެ 27 ވަނަ މިނިޓްގައި ޕީއެސްޖީގެ ދެ ވަނަ ގޯލު ޖެހީ މެސީ އެވެ. މިއީ ނޫނޯ މެންޑޭޒް ދިން ބޯޅަ އަކުން އޭރިއާތެރެއިން ހަމަޖެހިލާފައި މެސީ ޖެހި ގޯލެކެވެ. މެޗުގެ 39 ވަނަ މިނިޓްގައި ނޭމާ ދިން ބޯޅައަކުން އޭރިއާތެރެއިން އަޝްރަފް ހަކީމީ ވަނީ ޕީއެސްޖީގެ ތިން ވަނަ ގޯލު ޖަހައިފަ އެވެ. އަދި ފުރަތަމަ ހާފު ނިމުމުގެ ކުރިން މެސީ ދިން ބޯޅައެއް އޭރިއާތެެރެއިން ހޯދައި، ނޭމާ ވަނީ ޕީއެސްޖީގެ ހަތަރު ވަނަ ގޯލު ޖަހައިފަ އެވެ.
ދެ ވަަނަ ހާފް ފެށިގެން ހަތް މިނިޓް ތެރޭ ނޭމާ ވަނީ އިތުރު ގޯލެއް ޖަހައި، ޕީއެސްޖީ އަށް ފަސް ވަނަ ގޯލެއް ކާމިޔާބުކޮށްދީފަ އެވެ. މިއީ މެޗުގެ 52 ވަނަ މިނިޓްގައި އޭރިއާތެރެއިން ލިބުނު ހުސް ފުރުސަތަކުން ނޭމާ ޖެހި ގޯލެކެވެ.
އޭގެ ދެ މިނިޓް ފަހުން ލިލް އިން ވަނީ ލަނޑެއް ޖަހައިފަ އެވެ. މިއީ އޭރިއާތެރެއިން ޖޮނަތަން ބާމްބާ ޖެހި ފުރަތަމަ ބޯޅަ ޕީއެސްޖީގެ ކީޕަރު ޖިއަންލުއިޖީ ޑޮންނަރުންމާ މަަތަކުރުމުން ރީބައުންސް ބޯޅައިން ޖެހި ގޯލެކެވެ.
މެޗުގެ 66 ވަނަ މިނިޓްގައި ނޭމާ ދިން ބޯޅައަކުން އެމްބާޕޭ ވަނީ ޕީއެސްޖީގެ ހަ ވަނަ ގޯލު ޖަަހައިފަ އެވެ. އަދި މެޗު ނިމެން ތިން މިނިޓަށް ވެފައި ވަނިކޮށް، ޕީއެސްޖީގެ ހަތް ވަނަ ގޯލު ޖަހައި އެމްބާޕޭ ވަނީ ހެޓްރިކް ފުރިހަމަކޮށްފަ އެވެ.
ފްރެންޗް ލީގުގެ މި ހަފްތާގެ މެޗުތަކުގައި ޖުމްލަ އެއްކޮށް 11 ރަތް ކާޑު ފެނިގެންދިޔައިރު، މިއީ އެއް ހަފްތާގެ މެޗުތަކުގައި އެ ލީގުގައި އެންމެ ގިނަ ރަތް ކާޑު ދެއްކި ފަހަރެވެ.
