ސިޔާސީ ދާއިރާއިން ރިޓަޔާ ކުރުމުގެ ވިސްނުމެއް ނެތް ކަމަށް ސްރީލަންކާގެ ކުރީގެ ރައީސް އަދި ބޮޑު ވަޒީރުކަން ކުރައްވާފައިވާ މަހިންދަ ރާޖަޕަކްސަ ވިދާޅުވެއްޖެ އެވެ.
"އަޅުގަނޑު ދެމިހުންނާނީ ސިޔާސީ ކަންކަމުގައި. ރިޓަޔާ ކުރާނީ ހަމައެކަނި އެކަމަށް އެންމެ އެކަށޭނަ ވަގުތު އައިސް ޖެހުމުން. އެ ވަގުތާ ހަމައަށް ދެމިހުންނާނަން،" ސަންޑޭ ޓައިމްސް ނޫހަށް ދެއްވި އިންޓަވިއުގައި މަހިންދަ ރާޖަޕަކްސަ ވިދާޅުވި އެވެ.
އޭގެ އިތުރުން ސްރީލަންކާ ޕޮޑުޖަނާ ޕެރަމުނަ (އެސްއެލްޕީޕީ) ގެ ލީޑަރެއްގެ ގޮތުގައި ދެމިހުރުމާ މެދު ގޮތެއް ނިންމާނީ ޕާޓީއިން ކަމަށް އެމަނިކުފާނު ވިދާޅުވި އެވެ.
"އެކަން ނިންމާނީ ޕާޓީއިން. ޕާޓީއާ ދުރަށް ދާން ޖެހުނަސް އަޅުގަނޑު ފެންނާނެ. އަޅުގަނޑަކީ ގާނޫނީ ވަކީލެއް. އެހެންވީމާ ކޯޓުގެ ތެރެއިން އަޅުގަނޑު ފެންނާނެ. އެ ހާލަތް މެދުވެރިވެއްޖެ ނަމަ، މިސްރާބް ބަދަލު ކުރަން އަޅުގަނޑު ތައްޔާރު."
އޭގެ އިތުރުން ކޮއްކޯފުޅު ގޮތަބަޔާ ރާޖަޕަކްސަ ރައީސްކަމުން އިސްތިއުފާ ދެއްވުމުގެ ކުރިން ލަންކާ ދޫކޮށް ވަޑައިގެންނެވުމަށް އެއްވެސް އިރުޝާދެއް ނުދެއްވާ ކަމަަށް ވެސް ވިދާޅުވި އެވެ.
"އަޅުގަަނޑު ކައިރީގައި ލަފަޔަކަަށް އެދުނު ނަމަ، އަޅުގަނޑު ލަފާ ދޭނީ ގައުމު ދޫކޮށް ނުދާން. އެ މީހަަކު ފެށި ކަަމެއް އެ މީހަކު ނިންމަން ޖެހޭނެ. އެކަމަކު ގޮތަބަަޔާއަކީ ސިޔާސީ ބޭފުޅެއް ނޫން."
"ގަައުމުގެ މި ހާލަތުގެ ފުރިހަމަ ޒިންމާ ނަގަން ޖެހެނީ ގޮތަބަޔާއެއް ނޫން. އަޅުގަނޑާއި ކުރީގެ ސަރުކާރުތައް ހިމެނޭހެން، ހުރިހާ އެންމެން ވެސް މި ކަމުގައި ޒިންމާ ނަގަން ޖެހޭ."
