އިގްތިސާދީ ކާރިސާއެއް ކުރިމަތިވެފައިވާ ސްރީލަންކާއާ އެކު އިންޓަނޭޝަނަލް މަނިޓަރީ ފަންޑް (އައިއެމްއެފް)ގެ މަޝްވަރާ މި ހަފުތާގައި އަލުން ފަށަން ތައްޔާރުވެއްޖެ އެވެ.
ލަންކާއަށް އެހީ ދިނުމާ ގުޅޭ މަޝްވަރާ ޖޫން މަހު ފެށުމަަށް ފަހު މެދުކަނޑާލީ އެ ގައުމުގައި ހަމަނުޖެހުން ބޮޑުވުމުންނެވެ. ހަމަނުޖެހުމުގެ ތެރެއިން ކުރީގެ ރައީސް ގޮތަބަޔާ ރާޖަޕަކްސަ ވަނީ އިސްތިއުފާ ދެއްވައިފަ އެވެ.
އެމެރިކާގެ ވޮޝިންޓަންގައި ހުންނަ އައިއެމްއެފް އޮފީހުން ނެރުނު ބަޔާނުގައި ބުނީ އޯގަސްޓް 24 އިން 31 އަށް ވަފުދެއް ކޮލޮމްބޯއަށް ދަތުރު ކުރާނެ ކަމަށާއި އިގްތިސާދީ އަދި މާލީ އިސްލާހުތަކާއި ސިޔާސަތުތަކާ ގުޅޭ މަޝްވަރާ އަލުން ފަށާނެ ކަމަށެވެ.
އެ ގައުމުގެ 51 ބިލިއަން ޑޮލަރުގެ ބޭރުގެ ދަަރަނި ޑީފޯލްޓްވެފައިވާ އިރު، ކާބޯތަކެއްޗާއި ތެލާާއި ބޭހުގެ ދަތިކަން އިންތިހާއަށް ކުރިމަތިވަމުން ދާތީ ލަންކާއިން އެދެނީ އައިއެމްއެފްގެ އެހީއަށެވެ.
އިންފްލޭޝަން ހިފެހެއްޓުމެއް ނެތި މައްޗަށް ޖެހެމުންދާކަން ފާހަގަކޮށް، މަރުކަޒީ ބޭންކުން ބުރާސްފަތި ދުވަހު ބުނީ މި އަހަރު އިގްތިސާދު ރެކޯޑް ނިސްބަތުން އަށް ޕަސެންޓުން ކުޑަވުމުގެ ނުރައްކާ އެބަ އޮތް ކަމަށާއި އިންފްލޭޝަން 65 ޕަސެންޓަށް އެރުން އެކަށީގެންވާ ކަމަށެވެ.
