ކުރީގެ ރައީސް އަބްދުﷲ ޔާމީންގެ ވެރިކަމުގައި ހުޅުމާލޭގެ ދެ ވަނަ ފިޔަވަހީގައި އަޅަން ފެށި ހިޔާ ފްލެޓުތައް މި ސަރުކާރާ ހަވާލުވިއިރު، ބައެއް ފްލެޓްތަކުގައި އަޅާފައި ހުރީ ބިންގާ އެކަނި ކަމަށާއި ފުލެޓް ތަކުގެ ބޮޑު ބައެއް ނިންމީ މި ސަރުކާރުން ކަމަށް ޕްލޭނިން މިނިސްޓަރު މުހައްމަދު އަސްލަމް މިއަދު ވިދާޅުވެއްޖެ އެވެ.
ތޮއްޖެހިފައިވާ މާލޭގެ ބޯހިޔާވަހި ކަމަށް ހައްލެއް ހޯދައި ދިނުމުގެ ގޮތުން ފެށި 7000 ފްލެޓްގެ މަަޝްރޫއަކީ 2016 ވަނަ އަހަރުގެ ޖުލައި މަހުގެ 20 ވަނަ ދުވަހު ސޮއިކޮށް 2017 ވަނަ އަހަރުގެ ޑިސެމްބަރު މަހުގެ 19 ވަނަ ދުވަހު އަމަލީ މަސައްކަތް ފެށި މަޝްރޫއެކެވެ.
ހުޅުމާލޭގެ ދެ ވަނަ ފިޔަވަހީގައި، ޗައިނާ ސްޓޭޓް އިންޖިނިއަރިން އެންޑް ކޮންސްޓްރަކްޝަން ކޮމްޕެނީ (ސީއެސްއީސީ)އާ ހަވާލުކޮށްގެން ފެށި އެ މަޝްރޫއަށް މި ސަރުކާރުން މަސައްކަތް ކޮށްފައިވެ އެވެ.
އެއީ 7،000 ހައުސިން ޔުނިޓަށް ބޭނުންވާ ފެނާއި ނަރުދަމާ ނިޒާމު ގާއިމުކުރުމުގެ އަމަލީ މަސައްކަތް ނިންމުމެވެ. އެ މަސައްކަތް ނިންމާ މީހުން ދިރިއުޅެން ފަށާފައި ވަނީ މިދިޔަ އަހަރު އެވެ.
އެމްޑީޕީން ރޭ ފެށި އެ ޕާޓީގެ ކޮންގްރެސް މިއަދަށް ފެށުމުގެ ގޮތުން މިހާރު ކުރިއަށްދާ ޖަލްސާގައި ވާހަކަ ދައްކަވަމުން މިނިސްޓަރު ވިދާޅުވީ ބޯހިޔާވަހިކަމުގެ މައްސަލަ ހައްލުކުރުމަށް ސަރުކާރުން ގިނަ މަސައްކަތްތަކެއް ކުރަމުން އަންނަ ކަމަށެވެ. އަދި ސަރުކާރާ ހަވާލުވި އިރު ވެސް ބޯހިޔާވަހިކަމުގެ މަޝްރޫއުތަކެއް ހިނގަމުން ދިޔަ ކަމަށްވެސް ފާހަގަ ކުރެއްވި އެވެ.
ކުރީ ސަރުކާރުން ފެށި މަސައްކަތްތައް މި ސަރުކާރުން ކުރިއަށް ގެންގޮސް ނިންމާފައިވާ ކަމަށައި އޭގެ ތެރެއިން ހުރިހާ މަސައްކަތެއްގެ ކްރެޑިޓް ނުނަގާނެ ކަމަށް އަސްލަމް ވިދާޅުވި އެވެ.
"އެހެން ނަމަވެސް، ދަންނަވާފާނަން ވަރަށް ސާފުކޮށް، ހަމަ ކެރި ހުރެގެން، ހިޔާ ފްލެތުތަކުގެ ބައެއް ފްލެޓުތަކުގެ ފައުންޑޭޝަން އެކަނި އަޅާފައި ހުރީ. އަނެއް ބައި ފްލެޓުތައް ހުރީ ކޮންމެވެސް ވަރަކަށް ހަދައި ނިންމާފައި. ބޮޑުބައި އަޅުގަނޑުމެން އެ އޮތް ޕްލޭނާ އެކީ ގޮސް ނިންމާލީ،" އަސްލަމް ވިދާޅުވި އެވެ.
މީގެ އިތުރުން އަސްލަމް ވިދާޅުވީ ކުރީ ސަރުކާރުން މަސައްކަތް ފެށި ވިނަރެސް ފްލެޓުތައް މި ސަރުކާރާ ހަވާލުވިއިރު ގިނަ ތަންތަނުގައި ހުރީ ފައުންޑޭޝަން ވެސް ނާޅާ ކަމަށެވެ. އެ މަސައްކަތް ވެސް ކުރީ މި ސަރުކާރުން ކަމަށް އަސްލަމް ވިދާޅުވި އެވެ.
އަސްލަމް މިހެން ވިދާޅުވެފައި ވާއިރު، ކުރީ ސަރުކާރުން މަޝްރޫއު ފެށި ނަމަވެސް ވިނަރެސް ހައުސިން ޕްރޮޖެކްޓަކީ މި ސަރުކާރު އައިސް މި ދައުރުގައި ކުރި މަސައްކަތުން ހޯދުނު ކާމިޔާބީއެއް ކަމަށް ވެސް ކުރިން ވިދާޅުވެފައިވެ އެވެ.
"ދައުލަތަކީ ދެމި އޮންނަ އެއްޗަކަށް ވާތީ، ކުރީ ސަރުކާރުން ފަށާފައި ހުރި ކަންކަމަކީ ރަނގަޅު ކަންކަމަށް ވާނަމަ ނުވަތަ އަނބުރާ ނުލެވޭ ހިސާބަށް ގޮސްފައިވާ ކަމަކަށް ވާނަމަ އެކަމެއް އެ އޮތް ގޮތަކަށް ކުރިއަށް ގެންދަން ޖެހޭނެ. އެއީ އަޅުގަނޑުމެން ގަބޫލުކުރާ އުސޫލަކީ. ވެރިކަން ބަދަލުވުމަކީ ހުރިހާ އެއްޗެއް އެއްކައިރި ކޮށްލާފައި މުޅިން އާ ކަންތައްތަކެއް ފެށުމެއް ވެސް ނޫން،" އަސްލަމް ވިދާޅުވި އެވެ.
