މެޑްރިޑް (އޮގަސްޓް 20) - ރެއާލް މެޑްރިޑް ދޫކޮށް ބްރެޒިލްގެ މިޑްފީލްޑަރު ކަސެމީރޯ، މެންޗެސްޓާ ޔުނައިޓެޑަށް ބަދަލުވި ކަމުގައި ވިޔަސް ރެއާލަށް މާ ބޮޑު ކަންބޮޑުވުންތަކެއް ނެތް ކަމަށް އެ ޓީމުގެ ކޯޗު ކާލޯ އަންޗެލޮޓީ ބުނެފި އެވެ.
އުމުރުން 30 އަހަރުގެ ކަސެމީރޯގެ ސޮއި ހޯދަން ޔުނައިޓެޑުން ފުރަަތަމަ 70 މިލިއަން ޑޮލަރު ދައްކާނެ އެވެ. ބާކީ 11 މިލިއަން ޑޮލަރު ދޭނީ ކަސެމީރޯ ޔުނައިޓެޑްގައި ދައްކާ ކުޅުމަށް ބެލުމަށް ފަހު އެވެ.
ކަސެމީރޯގެ ޓްރާންސްފާ ވާހަަކަތައް ދެކެވެން ފެށިތާ ފަސް ވަރަކަށް ދުވަސް ތެރޭ ޔުނައިޓެޑުން އެ ޓްރާންސްފާ ކަންކަން ނިންމުމާ ފިޔަވަޅަކާ ގާތަށް ޖެހިލައިފައިވާއިރު، ކަސެމީރޯ ޔުނައިޓެޑަށް ސޮއިކުރާނީ ހަތަރު އަހަރުގެ ކޮންޓްރެކްޓެއްގަ އެވެ. ލަސްވެގެން ކުރިއަށް އޮތް ދެ ދުވަހެއްގެ ތެރޭގައި އެ ޑީލްގެ ހުރިހާ ކަމެއް ނިމޭނެ އެވެ.
ބްރެޒިލްގެ ސައޮ ޕައޮލޯ ދޫކޮށް 2013 ވަނަ އަހަރު ރެއާލާ ގުޅުނު ކަސެމީރޯ ވަނީ އެ ޓީމާ އެކު 18 ތަށި ހޯދައިފަ އެވެ. އޭގެ ތެރެއިން އެންމެ ހާއްސަވާނީ ފަސް ޗެމްޕިއަންސް ލީގެވެ.
ކަސެމީރޯ، ރެއާލް ދޫކޮށްލުމާ ބެހޭގޮތުން ނޫސްވެރިން ކުރި ސުވާލުތަކަށް އަންޗެލޮޓީ ވަނީ ޖަވާބުދީފަ އެވެ. އަންޗެލޮޓީ ބުނީ ރެއާލް ދޫކޮށްލުމަކީ ކަސެމީރޯގެ އަމިއްލަ ނިންމުމެއް ކަމަށާއި އޭނާ ބޭނުންވީ އާ ޗެލެންޖެއް ނެގުމަށް ކަމަށެވެ.
"ކަސެމީރޯއާ އެކު ރެއާލަށް ކުޅޭ ކުޅުންތެރިންނަށް ވެސް މި ނިންމުން ބަލައިގަނެވޭ. އެ މީހުން އެ ނިންމުމަށް އިހުތިރާމް ވެސް ކުރޭ. ކުޅުންތެރިއަކު އާ ޗެލެންޖެއް ނަގަން ބޭނުން ވުމަކީ ބަލައިގަންނަން ޖެހޭ ކަމެއް. އެކަމަކު، އަހަންނަށް ސީދާ ބުނާކަށް ނޭނގޭ ކަސެމީރޯ ކީއްވެ ކަމެއް ޔޫރަޕްގެ ޗެމްޕިއަން ދޫކޮށްފައި، ޔޫރަޕްގައި މި ވަގުތު ހާލުގައި އޮތް ޓީމަކަށް ދާންވީ ސަބަބެއް،" އަންޗެލޮޓީ ބުންޏެވެ.
މި ފަހަރުގެ ޗެމްޕިއަންސް ލީގުގައި ޔުނައިޓެޑް ނެތެވެ. އެ ޓީމު ވާދަކުރަނީ ޔޫރޮޕާ ލީގުގަ އެވެ. ކަސެމީރޯއާ އެކު ރެއާލްގައި ކުޅުނު ކްރިސްޓިއާނޯ ރޮނާލްޑޯ އާއި ރަފައެލް ވަރާން މި ވަގުތު ހުރީ ޔުނައިޓެޑްގެ ޓީމުގަ އެވެ.
އަންޗެލޮޓީ ބުނީ ރެއާލުން ކަަސެމީރޯގެ މަގާމުގައި ބޭނުންކުރާނެ ކުޅުންތެރިން އެބަތިބި ކަމަށެވެ. އެ ގޮތުން މި ފަހަރުގެ ޓްރާންސްފާ މާކެޓްގައި ރެއާލުން ގެނައި ފްރާންސްގެ މިޑްފީލްޑަރު، އައުރެލިން ޗުއަމެނީ، 22، އަކީ ކަސެމީރޯގެ މަގާމުގައި ކުޅޭނެ ކުޅުންތެރިއާ ކަމަށް އަންޗެލޮޓީ ބުންޏެވެ.
އޭގެ އިތުރުން ލޫކަ މޮޑްރިޗް އިތުރު އެއް އަހަރަށް ކޮންޓްރެކްޓް އާ ކުރިއިރު، ދެން އެ ޓީމުގައި ތިބި މިޑްފީލްޑަރުން ކަމަށްވާ ޓޯނީ ކްރޫސް، ފެޑޭ ވަލްވޭޑޭ، ޑެނީ ސެބާޔޯސް އަދި އެޑޮއާޑޯ ކަމަވިންގާއާ އެކު ރެއާލަށް ސީޒަނުގެ ހުރިހާ މުބާރާުތުގައި ރަނގަޅު ވާދައެއް ކުރެވޭނެ ކަމަށް އަންޗެލޮޓީ ގަބޫލުކުރެ އެވެ.
