ލަންޑަން (އޮގަސްޓް 20) - އިނގިރޭސި ޕްރިމިއާ ލީގުގައި މިދިޔަ ހަފްތާގައި ޓޮޓެންހަމް ހޮޓްސްޕާސް އާއި ޗެލްސީ ކުޅުނު މެޗުގައި އެ ދެ ޓީމުގެ ކޯޗުން ކަމަށްވާ އެންޓޯނިއޯ ކޮންޓޭ އާއި ތޯމަސް ޓުޗެލްގެ ދެމެދުގައި ހިނގި އަރާރުމުގެ މައްސަލަ ބަލައި އިނގިރޭސި އެފްއޭ އިން ދެ ކޯޗުންްނަށް ފިޔަވަޅު އަޅައިފި އެވެ.
ޗެލްސީގެ ދަނޑުގައި 2-2 އިން އެއްވަރުވި މެޗުގައި ހިނގައިދިޔަ ކަންތައްތަކަށް ފަހު، އިނގިރޭސި އެފްއޭ އިން މައްސަލަ ބެލުމަށް ފަހު ނިންމީ ޓުޗެލް 35،000 ޕައުންޑް (41،403 ޑޮލަރު) އިން ޖޫރިމަނާކޮށް ބެންޗަށް ނާދެވޭ ގޮތަށް ސަސްޕެންޑް ކުރުމަށެވެ. ކޮންޓޭ އަށް ދިނީ 15،000 ޕައުންޑް (17،744 ޑޮލަރު)ގެ ޖޫރިމަނާ އެކެވެ.
ޓުޗެލް އަށް ދިން ސަސްޕެންޝަނަށް އަމަލުކުރަން ފަށާނީ އޭނާގެ މައްސަލައިގެ ފުރިހަމަ ރިޕޯޓް އިނގިރޭސި އެފްއޭ އިން ހުށަހެޅުމުންނެވެ. މާނަ އަކީ މިހާރު އޮތްގޮތުން އިނގިރޭސި ޕްރިމިއާ ލީގުގައި މާދަމާރޭ ލީޑްސް ޔުނައިޓެޑާ ދެކޮޅަށް ޗެލްސީން ކުޅޭ މެޗުގައި ޓުޗެލް އަށް ޗެލްސީ ބެންޗަށް ދެވުމެވެ. އެކަމަކު، އެ މެޗުގެ ކުރިން ޓުޗެލްގެ މައްސަލައިގެ ތަފްސީލް އެފްއޭ އިން އާންމުކޮށްފިނަމަ ޓުޗެލް އަށް ލީޑްސް މެޗު ބަލަން ޖެހޭނީ ގޮނޑިބަރިންނެވެ.
ލީޑްސްގެ ކޯޗު ޖެސީ މާޝް ބުނީ އެ ޓީމާ ދެކޮޅަށް ޗެލްސީ ކުޅޭ މެޗުގައި ޓުޗެލް އަށް ބެންޗުގައި އިނދެވިގެންނުވާނެ ކަމަށާއި ސަސްޕެންޝަނަށް އަމަލުކުރަން ޖެހޭނީ މި މެޗުގައި ކަމަށް ގަބޫލުކުރާ ކަމަށެވެ.
ޗެލްސީގެ ދަނޑު ސްޓެމްފޯޑް ބްރިޖުގައި ޓޮޓެންހަމާ އެއްވަރުވި މެޗުގައި ދެ ފަހަރެއްގެ މަތިން ޓުޗެލް އާއި ކޮންޓޭގެ އަރާރުމެއް ފެނިގެންދިޔަ އެވެ. އެ ގޮތުން އެންމެ ފުރަތަމަ ޓޮޓެންހަމުން 1-1 އިން އެއްވަރުކުރި ވަގުތުގައި ޓެކްނިކަލް އޭރިއާ ކައިރީގައި ކަންތައްތަކެއް ހިނގިއިރު، ދެން މެޗު ނިމިގެން ކޮންޓޭ އާއި ޓުޗެލް ސަލާމްކުރަން ކައިރި ވަގުތުގައި ހިނގި ކަންތައްތަކެއްގެ ސަބަބުން ދެ ކޯޗުން ދުރުކުރީ ދެ ޓީމުގެ ކުޅުންތެރިންނާ ސްޓާފުން އެއް ވެގެންނެވެ. ދެ ކޯޗުންނަށް ވެސް ވަނީ މެޗުގައި ދެ ވަނަ ރީނދޫ ކާޑާ އެކު ރަތް ކާޑު ދައްކައިފަ އެވެ.
ޓޮޓެންހަމުން ފަހު ވަގުތު ހެރީ ކޭން ޖެހި ގޯލުން ޗެލްސީއާ އެއްވަރުކުރިއިރު، އެ ކޯނަރުގައި ޓޮޓެންހަމްގެ ޑިފެންޑަރު، ކްރިސްޓިއަން ރޮމޭރޯ ޗެލްސީގެ ފުލްބެކް، މާކް ކުކުރޭޔާގެ އިސްތަށިގަނޑުގައި ހިފައި ވައްޓާލުމުން، އެ މެޗުގެ ރެފްރީ އެންތަނީ ޓޭލާ ފައުލެއް ނުދިނީ ވީޑިއޯ އެސިސްޓަންޓް ރެފްރީ (ވީއޭއާރް) އިން ވެސް ބަލައިފަ އެވެ. އެ ނިންމުން އިތުރަށް ދިރާސާ ކުރުމަށް ފަހު، ރެފްރީސް ޕެނަލުން ވަނީ ވީއޭއާރްގެ އެ ނިންމުން ގޯސްކަމަށް އެއްބަސްވެފަ އެވެ.
