އުރުދުންގެ ވަލީ އަހުދު އަމީރު އަލް ހުސެން ބިން އަަބްދުﷲ ދެ ވަނަ ސައުދީ އަރަބިއްޔާގެ ރައްޔިތެއް ކަމުގައިވާ ރަޖްވާ ހާލިދް ބިން މުސައިދް ބިން ސައިފް ބިން އަބްދުލް އަޒީޒް އަލް ސައިފްއާ އެންގޭޖުވެވަޑައިގެންފި އެވެ.
އެންގޭޖުމަންޓް ހަފްލާގައި އުރުދުންގެ ރަސްގެފާން އަބްދުﷲ ދެ ވަނަ އަދި ރާނީ ރާނިއާ އަލް އަބްދުﷲ ބައިވެރިވެވަޑައިގެންނެވި އެވެ. ހަފްލާ އޮތީ ސައުދީ އަރަބިއްޔާގެ ވެރިރަށް ރިޔާދުގަ އެވެ.
ރާނީ ރާނިއާ އިންސްޓަގްރާމުގައި ކުރެއްވި ޕޯސްޓުގައި ވަނީ ދަރިކަލުންނަށް މަރުހަބާ ދަންނަވާފަ އެވެ.
ރަޖްވާ އަލް ސައިފްއަކީ އުމުރުން 28 އަހަރު ސައުދީ އަންހެނެކެވެ. އޭނާގެ ތައުލީމީ ހަޔާތުގައި ސެކަންޑަރީ ތައުލީމް ފުރިހަމަ ކުރީ ސައުދީ އަރަބިއްޔާއިންނެވެ. އެއަށްފަހު އާކިޓެކްޗާގެ ދާއިރާއިން ކިޔެވީ ނިއު ޔޯކްގެ ސަރިއަކިޔުސް ޔުނިވާސިޓީއިންނެވެ.
ވަލީ އަހުދުގެ އެންގޭޖްމަންޓް އިއުލާން ކުރައްވާފައިވާ އިރު، މިދިޔަ ޖުލައި މަހު އުރުދުންގެ އަމީރާ އީމާން ބިންތް އަބްދުﷲ ދެ ވަނަ ވެސް އެންގޭޖްވެވަޑައިގެންނެވި އެވެ.
