ސަލްމާން ރުޝްދީ ވަނީ އިސްލާމް ދީނަށް ހަމަލާދީފައި ކަމަށް، މިދިޔަ ހުކުރު ދުވަހު އޭނާގެ ގަޔަށް ވަޅިހެރިކަމުގެ ތުހުމަތު ކުރެވޭ ހާދީ މަތާރް ބުނެފި އެވެ.
މި ވަގުތު ޖަލުގައި ހުރި އުމުރުން 24 އަހަރުގެ މަތާރް ވަނީ ނިއު ޔޯކް ޕޯސްޓް ނޫހަށް އިންޓަވިއު ދީފަ އެވެ. އޭނާ ވަނީ ތުހުމަތުތަކަށް އިންކާރު ކުރާ ކަމަށް ބުނެފަ އެވެ.
މަތާރް ބުނީ ސަލްމާން ރުޝްދީގެ "ދަ ސެޓެނިކް ވާސަސް" ފޮތުން އޭނާ ކީ އެންމެ ދެ ސަފްހާ ކަަމަށާއި އެކަމަކު އެއީ އިސްލާމް ދީނަށް ހަމަލާދިން މީހެއްކަން ސާފުކޮށް އެނގޭ ކަމަށެވެ.
"ދަ ސެޓެނިކް ވާސަސް" ގެ ނަމުގައި 1988 ގައި ނެރުނު ފޮތުގައި އިސްލާމްދީނާއި ކީރިތި ރަސޫލާއަށް ފުރައްސާރަކޮށްފަައިވާ މައްސަލައިގައި އޭނާއަށް މަރުގެ އިންޒާރު ތަކުރާރުކޮށް ދީފައިވެ އެވެ.
އޭނާ މަރާލަން ގޮވާލައި އިރާނުން ފަތުވާއެއް ވެސް ނެރުނެވެ. ފަތުވާއާ އެކު އިރާނު ސަރުކާރުން ސަލްމާން ރުޝްދީގެ ބޮލަށް ތިން މިލިއަން ޑޮލަރު ހުށަހެޅި އެވެ.
"އަހަރެން އިރާނުގެ އާޔަތުﷲ އަށް އިހްތިރާމް ކުރަން. އެއީ ވަރުގަދަ ޝަހުސިއްޔަތެއް. އެކަމާ ގުޅޭ ގޮތުން ބުނާނީ ހަމައެކަަނި މިހެން،" މަތާރް އިންޓަވިއުގައި އެ ފަތުވާއާ ގުޅޭ ގޮތުން ބުންޏެވެ.
އޭގެ އިތުރުން ސަލްމާން ރުޝްދީ މަރު ނުވެ، ހާލު ރަނގަޅުވަމުން އަންނަަކަމުގެ ހަބަރު ލިބުމުން ހައިރާންވި ކަމަށް ވެސް އޭނާ ބުންޏެވެ.
މަތާރްއަށް ތުހުމަތު ކުރެވެނީ މަދުވެގެން 10 ފަހަރު ސަލްމާން ރުޝްދީގެ މޫނާއި، ކަރާއި، ބަނޑަށް ވަޅި ހެރި ކަމަށެވެ.
"އެއީ އަހަންނަށް ކަމުދާ މީހެއް ނޫން. އޭނާ އެއީ ރަނގަޅު މީހެއް ވެސް ނޫން. އޭނާ ވަނީ އިސްލާމް ދީނަށް ހަމަލާދީފައި."
އުމުރުން 75 އަހަރުގެ ސަލްމާން ރުޝްދީއަށް ވަޅިން ހަމަލާ ދިނީ މިދިޔަ ހުކުރު ދުވަަހުގެ ރޭ ނިއު ޔޯކްގައި އޮތް އިވެންޓެއްގެ ތެރެއިން ސްޓޭޖް މަތީގައި ހުއްޓަ އެވެ. މިހާރު އޭނާގެ ހާލު އަންނަނީ ރަނގަޅުވަމުންނެވެ.
ސަލްމާން ރުޝްދީގެ އޭޖެންޓު އެންޑްރޫ ވައިލީ ބުނީ އަތުގެ ނާރުތައް ބުރިވެ، ފުރަމޭއަށް ގެއްލުންވެފަައިވާ ކަމަަށާއި އެއް ލޯ ނަގަން ޖެހިދާނެ ކަމަށެވެ.
