އަފްގާނިސްތާނުގެ ވެރިރަށް ކާބުލްގެ މިސްކިތަކަށް ދިން ހަމަލާއެއްގައި 21 މީހުން މަރުވެ 33 މީހުންނަށް އަަނިޔާވެއްޖެ އެވެ.
މިސްކިތުގައި ބޮން ގޮއްވާލީ ބުދަ ދުވަހުގެ ރޭ ގިނަ ބަޔަކު އިޝާ ނަމާދު ކުރަން ތިއްބަ އެވެ. މަރުވި މީހުންގެ ތެރޭގައި އިމާމު ވެސް ހިމެނެ އެވެ.
ހަމަލާގެ ފަހަތުގައި ވަނީ ކޮން ބަޔެއް ކަމެއް ސާފެއް ނޫނެވެ. އެހެން ނަމަވެސް މީގެ ހަފްތާއެއް ކުރިން ކާބުލްގައި އިސްލާމިކް ސްޓޭޓް (އަައިއެސް)ގެ ހަމަލާއެއްގައި ތާލިބާނުންގެ ޝެއިހެއް މަރާލި އެވެ.
އައިއެސް އާއި ތާލިބާނުންނަކީ ސުންނީ މުސްލިމުން ނަމަވެސް އެ ދެ ގްރޫޕުގެ މެދުގައި ރަނގަޅު ގުޅުމެއް ނޯވެ އެވެ. އަފްގާނިސްތާނުގެ ވެރިކަމަށް ތާލިބާނުން އައުމުން، އަައިއެސްގެ ހަމަލާތަައް ވަރުގަދަ ކުރި އެވެ.
ދީނުގެ ކަންކަމާއި އަސްކަރީ ސްޓްރެޓެޖީއާ ގުޅޭ ކަންކަމުގައި ތާލިބާނުންނާއި އައިއެސްގެ ހިޔާލު ތަފާތެވެ. އެއާއެކު ދެ ގްރޫޕުން ވެސް ދައުވާ ކުރަނީ އެ މީހުންނަކީ "އިސްލާމީ ޖިހާދު" ގެ ހަގީގީ ބައިވެރިން ކަމަށެވެ.
އައިއެސްގެ ބޮޑެތި ހަމަލާތަަކުގައި ފާއިތުވި އަހަރުގެ ތެރޭގައި ތާލިބާނުންގެ ގިނަ އިސްވެރިން މަަރާލާފައިވެ އެވެ. އަދި ތާލިބާނުން ދަނީ އައިއެސްއާ ދެކޮޅު އޮޕަރޭޝަންތައް ހިންގަމުންނެވެ.
