މި ވަގުތު ތައިލޭންޑްގައި ހުންނެވި ސްރީލަންކާގެ ކުރީގެ ރައީސް ގޮތަބަޔާ ރާޖަޕަކްސަ އަންނަ ހަފްތާގައި އެނބުރި ގައުމަށް ވަޑައިގަންނަވާނެ ކަމަށް ރިޕޯޓުތައް ބުނެފި އެވެ.
ގޮތަބަޔާ މި ވަގުތު ހުންނެވީ ތައިލޭންޑްގެ ވެރިރަށް ބެންކޮކްގަ އެވެ. އެމަނިކުފާނު ސިންގަޕޫރުން ތައިލޭންޑަށް ވަޑައިގެންނެވީ މިދިޔަ މަހުގަަ އެވެ.
ގޮތަބަޔާ ތައިލޭންޑަށް އެތެރެވުމުގެ ހުއްދަ ދެއްވުމަށް ރަސްމީކޮށް ހުށަހެޅީ ލަންކާ ސަރުކާރުންނެވެ. އެމަނިކުފާނު ތައިލޭންޑަށް ވަޑައިގެންނެވީ ވިޒިޓް ވިސާއެއްގެ ދަށުންނެވެ.
ބެންކޮކްގައި ގޮތަބަޔާ ހުންނަވާ ގެކޮޅުން ބޭރަށް ނިކުމެވަޑައިނުގެންނެވުމަށް ކަމާ ބެހޭ އިދާރާތަކުން އެމަނިކުފާނަށް އެންގެވި ކަމަށް ނޫސްތަކުން ބުނެ އެވެ.
އޭގެ އިތުރުން އަންނަ ހަފްތާގައި ގޮތަބަޔާ އެނބުރި ގައުމަށް ވަޑައިގަންނަވާނެ ކަމަށް ވެސް ލަންކާގެ ނޫސްތަކުން ރިޕޯޓުކޮށްފައިވެ އެވެ.
ސްރީލަންކާއިން ރަޝިއާއަށް ކަނޑައަޅާފައި ހުންނަ ސަފީރުކަން ކުރިން ކުރެއްވި އުދަޔަންގަ ވީރަތުންގަ ބުދަ ދުވަހު ވިދާޅުވީ ގޮތަބަޔާ ލަންކާއަށް ވަޑައިގަންނަވާނީ އޯގަސްޓު 24 ގައި ކަމަށެވެ.
ލަންކާ ދޫކޮށް ރާއްޖެ ވަޑައިގެން އެއް ދުވަސް ފަހުން ގޮތަަބަޔާ ދަަތުރު ކުރެއްވީ ސިންގަޕޫރަށެވެ. ރައީސްކަމުން އިސްތިއުފާ ދެއްވީ ޖުލައި 14 ވަނަ ދުވަހު ސިންގަަޕޫރަށް ވަޑައިގެންނެވުމަށް ފަހުގަ އެވެ. ލަންކާ ސަރުކާރުން ކުރިން ވެސް ބުނެފައި ވަނީ ގޮތަބަޔާ ގައުމަށް އެނބުރި ވަޑައިގަންނަވާނެ ކަމަށެވެ.
އެކަމަކު މިއީ އެނބުރި ގައުމަށް ވަޑައިގަަންނަވަން އެންމެ ރަނގަޅު ވަގުތު ނޫން ކަމަށް މިހާރު ރައީސްކަމުގައި ހުންނެވި ރަނިލް ވިކްރަމަސިންހަ ވަނީ ވިދާޅުވެފަ އެވެ.
