ލަންޑަން (އޮގަސްޓް 16) - އިނގިރޭސި ޕްރިމިއާ ލީގުގައި އާދިއްތަ ދުވަހުގެރޭ ޓޮޓެންހަމް ހޮޓްސްޕާސް އާއި ޗެލްސީ 2-2 އިން އެއްވަރުވި މެޗުގައި އެ ދެ ޓީމުގެ ކޯޗުން ކަމަށްވާ އެންޓޯނިއޯ ކޮންޓޭ އާއި ތޯމަސް ޓުޗެލްގެ ދެމެދުގައި ހިނގި އަރާރުމުގެ މައްސަލަ ބަލަން އިނގިރޭސި އެފްއޭ އިން ނިންމައިފި އެވެ.
ޗެލްސީގެ ދަނޑު ސްޓެމްފޯޑް ބްރިޖުގައި ޓޮޓެންހަމާ އެއްވަރުވި މެޗުގައި ދެ ފަހަރެއްގެ މަތިން ޓުޗެލް އާއި ކޮންޓޭގެ އަރާރުމެއް ފެނިގެންދިޔަ އެވެ. އެ ގޮތުން އެންމެ ފުރަތަމަ ޓޮޓެންހަމުން 1-1 އިން އެއްވަރުކުރި ވަގުތުގައި ޓެކްނިކަލް އޭރިއާ ކައިރީގައި ކަންތައްތަކެއް ހިނގިއިރު، ދެން މެޗު ނިމިގެން ކޮންޓޭ އާއި ޓުޗެލް ސަލާމްކުރަން ކައިރި ވަގުތުގައި ހިނގި ކަންތައްތަކެއްގެ ސަބަބުން ދެ ކޯޗުން ދުރުކުރީ ދެ ޓީމުގެ ކުޅުންތެރިންނާ ސްޓާފުން އެއް ވެގެންނެވެ.
ދެ ކޯޗުންނަށް ވެސް ވަނީ މެޗުގައި ދެ ވަނަ ރީނދޫ ކާޑާ އެކު ރަތް ކާޑު ދައްކައިފަ އެވެ. އެކަމަކު، އެހާ ހިސާބުން މައްސަލަ ނިންމާނުލައި، އިނގިރޭސި އެފްއޭ އިން މިހާރު ނިންމާފައިވަނީ ދެ ކޯޗުންގެ މައްސަލަ ޑިސިޕްލިނަރީ ކޮމިޓީން ބެލުމަށެެވެ. އެ ގޮތުން ދެ ކޯޗުންނަށް އެފްއޭ އިން ވަނީ ޖަވާބުދާރީވާން އަންނަ ބުރާސްފަތި ދުވަހުގެ ނިޔަލަށް މުއްދަތެއް ދީފަ އެވެ.
މި މައްސަލައިގައި ދެ ކޯޗުންނަށް ޖޫރިމަނާ އެއް ނޫނީ ދެ މެޗުގެ ސަސްޕެންޝަނެއް އައުމުގެ ފުރުސަތު އެބައޮތެވެ.
ކޮންޓޭއާ ދެމެދުގައި ކަންތައްތަކެއް ހިނގީ މެޗުގެ އޮއެވަރު ދިޔަ ގޮތުން ޖަޒުބާތުގައި ޖެހިގެން ކަމަށް ޓުޗެލް ވަނީ މީޑިއާގައި ބުނެފަ އެވެ. ކޮންޓޭ ބުނީ އެއީ މީޑިއާގައި އޭނާ ދައްކަން ބޭނުންވާ ވާހަކަތަކެއް ނޫން ކަމަށެވެ. އެކަމަކު، ކޮންޓޭ ވަނީ އޭނާގެ އިންސްޓަގްރާމްގައި ޗެލްސީގެ ދެ ވަނަ ގޯލަށް ފަހު ޓުޗެލް ދުވެފައި ދާ ފޮޓޯއެއް ހިއްސާ ކުރުމަށް ފަހު މަޖާޒީ ގޮތަކަށް ޓުޗެލްއާ ދިމާކޮށްލައިފަ އެވެ.
