ކާމިޔާބު ވާހަކަ ލިޔުންތެރިޔާ ސަލްމާން ރުޝްދީއަށް ހަމަލާ ދިން މީހާއާ އެއްވެސް ގުޅުމެއް ނެތް ކަމަަށާއި ހަމަލާގެ ޒިންމާ ނަގަން ޖެހޭނީ ސަލްމާން ރުޝްދީ އާއި އޭނާގެ ސަޕޯޓަރުން ކަމަށް އިރާނުން ބުނެފި އެވެ.
އުމުރުން 75 އަހަރުގެ ސަލްމާން ރުޝްދީއަށް ވަޅިން ހަމަލާ ދިނީ މިދިޔަ ހުކުރު ދުވަަހުގެ ރޭ ނިއު ޔޯކްގައި އޮތް އިވެންޓެއްގެ ތެރެއިން ސްޓޭޖް މަތީގައި ހުއްޓަ އެވެ. މިހާރު އޭނާގެ ހާލު އަންނަނީ ރަނގަޅުވަމުންނެވެ.
"ދަ ސެޓެނިކް ވާސަސް" ގެ ނަމުގައި 1988 ގައި ނެރުނު ފޮތުގައި އިސްލާމްދީނާއި ކީރިތި ރަސޫލާއަށް ފުރައްސާރަކޮށްފަައިވާ މައްސަލައިގައި އޭނާއަށް މަރުގެ އިންޒާރު ތަކުރާރުކޮށް ދީފައިވެ އެވެ.
އޭނާ މަރާލަން ގޮވާލައި އިރާނުން ފަތުވާއެއް ވެސް ނެރުނެވެ. ފަތުވާއާ އެކު އިރާނު ސަރުކާރުން ސަލްމާން ރުޝްދީގެ ބޮލަށް ތިން މިލިއަން ޑޮލަރު ހުށަހެޅި އެވެ.
ސަލްމާން ރުޝްދީއަށް ހަމަލާ ދިނުމުން އިރާނުގެ ނޫސްތަކުން އުފާ ފާޅުކުރަމުންދާ ކަމަށް ބުނެ، އެމެރިކާގެ ސެކެޓްރީ އޮފް ސްޓޭޓް އެންޓނޮނީ ބްލިންކެން ކުރިން ހިތްހަމަނުޖެހުން ފާޅުކުރެއްވި އެވެ.
ހޯމަ ދުވަހު އިރާނުގެ ފޮރިން މިނިސްޓްރީގެ ތަރުޖަމާނު ނާސިރް ކައްނާނީ ވިދާޅުވީ ހަމަލާ އާއި އިރާންއާ އެއްވެސް ގުޅުމެއް ނެތް ކަމަަށާއި އެ ގައުމަށް އެއްވެސް ތުހުމަތެއް ވެސް ނުކުރެވޭނެ ކަމަށެވެ.
އޭގެ އިތުރުން ހިޔާލު ފާޅުކުރުމުގެ މިނިވަންކަަމުގެ ނަމުގައި ދީނަށް ފުރައްސާރަ ކުރުމަކީ ސަލްމާން ރުޝްދީއަށް ލިބިގެންވާ ހައްގެއް ނޫން ކަމަށް ވެސް ވިދާޅުވި އެވެ.
"މި ހަމަލާގެ ފުރިހަމަ ޒިންމާ ނަގަން ޖެހޭނީ ސަލްމާން ރުޝްދީ އާއި އޭނާގެ ސަޕޯޓަރުން،" އޭނާ ވިދާޅުވި އެވެ.
ސަލްމާން ރުޝްދީގެ އޭޖެންޓު އެންޑްރޫ ވައިލީ ބުނީ އަތުގެ ނާރުތައް ބުރިވެ، ފުރަމޭއަށް ގެއްލުންވެފަައިވާ ކަމަަށާއި އެއް ލޯ ނަގަން ޖެހިދާނެ ކަމަށެވެ.
އެކަމަށް އިޝާރާތްކޮށް އިރާނުގެ ބައެއް ނޫސްތަކުން ބުނީ "އިބިލީހުގެ ލޯ ކަނުވެއްޖެ" ކަމަށެވެ.
ސްޓޭޖު މަތިން ހަމަލާދިން މައްސަލައިގައި ހައްޔަރު ކުރި އުމުރުން 24 އަހަރުގެ ހާދީ މަތާރް ވަނީ ގަސްދުގަައި މީހަކު މަރަން މަސައްކަތް ކުރިކަމުގެ ތުހުމަތަށް އިންކާރުކޮށްފަ އެވެ.
އޭނާއަށް ތުހުމަތު ކުރެވެނީ މަދުވެގެން 10 ފަހަރު ސަލްމާން ރުޝްދީގެ މޫނާއި، ކަރާއި، ބަނޑަށް ވަޅި ހެރި ކަމަށެވެ.
