މި އަހަރުގެ ދެ ވަނަ ކުއާޓާގައި ސައުދީ އަރަބިއްޔާގެ ތެޔޮ ކުންފުނި އަރަމްކޯއަށް 48.4 ބިލިއަން ޑޮލަރާ އެކު ރެކޯޑް ފައިދާއެއް ލިބިއްޖެ އެވެ.
އެއީ މިދިޔަ އަހަރުގެ ދެ ވަނަ ކުއާޓާއާ އަޅާ ބަލާއިރު 90 ޕަސެންޓުގެ ކުރިއެރުމެކެވެ. ޔޫކްރެއިން ހަަނގުރާމައާ ހެދި ބޮޑެތި ތެޔޮ ކުންފުނިތަކަށް ދަަނީ ރެކޯޑް ފައިދާ ލިބެމުންނެވެ.
އަރަމްކޯއިން ބުނީ ތިން ވަނަ ކުއާޓާގައި ޑިވިޑެންޑްގެ ގޮތުގައި ކަނޑައަޅާފައި ވަނީ ދެ ވަނަ ކުއާޓާގައި ވެސް ކަަނޑައެޅި 18.8 ބިލިއަަން ޑޮލަރު ކަމަށެވެ.
ކުންފުނީގެ ރައީސް އަދި ޗީފް އެގްޒެކްޓިވް އަމީން ނާސިރް ވިދާޅުވީ ކުރިއަށް އޮތް 10 އަހަރު ތެލުގެ ޑިމާންޑް އުފުލެމުން ދާނެ ކަމަށް ލަފާކުރެވޭ ކަމަށެވެ.
އަރަމްކޯގެ އިތުރުން އެކްސޮން މޮބިލް، ޗެވްރޯން އަދި ބީޕީ ފަދަ ތެޔޮ ކުންފުނިތަކުން ވެސް މިހާރު ދަނީ ބޮޑެތި ފައިދާ ނަގަމުންނެވެ.
ތެޔޮ އެކްސްޕޯޓް ކުރާ ގައުމުތަކުގެ ތެރެއިން އެންމެ ގިނައިން އެކްސްޕޯޓް ކުރަނީ ސައުދީ އަރަބިއްޔާ އެވެ. ސައުދީ ހިމެނޭ އޯޕެކް ޕްލަސްއިން މިދިޔަ ހަފްތާގައި ނިންމީ އަގުތައް ތިރިކުރަން ކޮންމެވެސް ވަރަކަށް ސަޕްލައި އިތުރު ކުރުމަށެވެ.
