އެންމެ ބާރަށް ކުރިއަރަމުން އަންނަ އިގްތިސާދުތަކުގެ ތެރޭގައި ހިމެނޭ ބަންގްލަދޭޝުން ހަފްތާއެއްގެ ތެރޭގައި ތެލުގެ އަގު 50 ޕަސެންޓު ބޮޑުކޮށްފި އެވެ.
ބަންގްލަަދޭޝް ސަރުކާރުން ބުނަނީ އަގުބޮޑުކުރަން ޖެހުނީ ޔޫކްރެއިން ހަނގުރާމައާ ހެދި ދުނިޔޭގެ ބާޒާރުގައި ވެސް ތެލުގެ އަގު އުފުލިފައި ވާާތީ ކަމަށެވެ.
އެ މައްސަލައިގައި ރައްޔިތުންގެ ކަންބޮޑުވުން އިތުރުވަމުންދާ އިރު، އެތައް ހާސް ބަޔަކު ވަނީ މަގުތަކަށް ނުކުމެ މުޒާހަރާ ވެސް ކޮށްފަ އެވެ.
ޕެޓްރޯލްގެ އަގަށް ގެނައި ބަދަލުގެ ދަށުން ކުރިން 91 ސެންޓަށް ލިބުނު ލީޓަރެއް މިހާރު ލިބެނީ 1.37 ޑޮލަރަށެވެ. ޑީސެލް އާއި ކަރާސީނުގެ އަގުން ވެސް 42.5 ޕަސެންޓު ބޮޑުކުރި އެވެ.
އެނާޖީ މިނިސްޓަރު ނަސްރުލް ހާމިދް ވިދާޅުވީ މިއީ ސަރުކާރުން އިގްތިސާދީ ގޮތުން ގޯސް ނިންމުމެއް ނިންމުމުގެ ނަތީޖާ ނޫން ކަމަށެވެ.
އޭނާ ވިދާޅުވީ ސްރީލަންކާއަށް ދިމާވި ހާލަތު ބަންގްލަދޭޝަށް ދިމާނުވާނެކަމުގެ ޔަގީންކަން އެބަ އޮތް ކަމަށެވެ. އެކަމަކު ބަންގްލަދޭޝްގެ ބޭރު ފައިސާގެ ރިޒާވް ދަނީ ހުސްވަމުންނެވެ.
މިދިޔަ ޖުލައި މަހު ބަންގްލަދޭޝުން ވަނީ އިންޓަނޭޝަނަލް މަަނިޓަަރީ ފަންޑް (އައިއެމްއެފް) ގެ ލޯނަކަށް އެދިފަ އެވެ. ދެކުނު އޭޝިއާއިން ދެން އައިއެމްއެފްގެ ލޯނަށް އެދިފަައި ވަނީ ސްރީލަންކާ އާއި ޕާކިސްތާނެވެ.
