ޕެރިސް (އޮގަސްޓް 14) - ބްރެޒިލްގެ ފޯވަޑް ނޭމާގެ ލަނޑުތަކާ އެކު، ފްރާންސް ލީގުގައި ރޭ މޮންޕެލިއޭ އަތުން 5-2 އިން ޕީއެސްޖީ މޮޅުވެއްޖެ އެވެ.
ޕީއެސްޖީގެ ދަނޑުގައި ކުޅުނު މެޗުގެ 39 ވަނަ މިނިޓުގައި ޕީއެސްޖީ އަށް ލީޑު ލިބުނީ މޮންޕެލިއޭގެ ފަލާޔޭ ސާކޯ އަތުން ބައިކޮޅަށް ވަތް ލަނޑަކުންނެވެ. ޕީއެސްޖީ އަށް ލިބުނު ޕެނަލްޓީއަކުން، އެ ޓީމުގެ ދެ ވަނަ ލަނޑު ޖެހީ ނޭމާ އެވެ.
ދެ ވަނަ ހާފުގެ ކުރީކޮޅު، ނޭމާ ވަނީ އިތުރު ލަނޑެއް ޖަހައިފަ އެވެ. ޕީއެސްޖީ އަށް ދެން ލަނޑު ޖަހައިދިނީ ކިލިއަން އެމްބާޕޭ އާއި މި ސީޒަންގައި އެ ޓީމާ ގުޅުނު ޕޯޗުގަލްގެ މިޑްފީލްޑަރު ރެނާޓޯ ސަންޗޭޒް އެވެ.
މެޗުގެ ދެ ވަނަ ހާފުގައި މޮންޕެލިއޭ އަށް ލަނޑު ޖަހައިދިނީ ކުރިން އިނގިރޭސި ޕްރިމިއާ ލީގުގައި ކުޅުނު ވަހްބީ ކަޒްރީ އާއި އެންޒޯ ޗާޓޯ އެވެ.
މި މެޗަކީ މިދިޔަ ސީޒަންގެ ފަހު ދުވަހު ޕީއެސްޖީގައި މަޑުކުރާނެކަން އެމްބާޕޭ އިއުލާންކުރި ފަހުން، އޭނާ ވާދަވެރި މެޗެއްގައި ކުޅުނު ފުރަތަމަ ފަހަރެވެ. މި ސީޒަންގައި ޕީއެސްޖީ ކުޅުނު ފުރަތަމަ ދެ މެޗުގައި އެމްބާޕޭ ނުކުޅެ އެވެ.
ޕީއެސްޖީގެ ކޯޗު ކްރިސްޓޯފް ގަލްޓިއޭ ބުނީ ޕްރީ ސީޒަން ފުރިހަމަ ނުކުރެވޭތީ، އެމްބާޕޭ މުޅިން ފިޓުވާން ވަގުތު ކޮޅެއް ނަގާނެ ކަމަށެވެ. އަދި ކުރިއަށް ހުރި މެޗުތަކުގައި އޭނާގެ ކުޅުން ރަނގަޅުވާނެ ކަމަށް ގަލްޓިއޭ ގަބޫލުކުރެ އެެވެ .
"ޓީމުގެ އެހެން ކުޅުންތެރިންނާ އަޅާބަލާއިރު، އެމްބާޕޭގެ ފިޓްނަސް މި ވަގުތު ދަށްވުމަކީ މައްސަލައެއް ނޫން. އޭނާ މުޅިން ފިޓުވާން ވަގުތު ކޮޅެއް ނަގާނެ،" ގަލްޓިއޭ ބުންޏެވެ.
ޕީއެސްޖީގެ ކޯޗުކަމާ މި ސީޒަންގައި ހަވާލުވި ގަލްޓިއޭގެ އިރުޝާދުގެ ދަށުން މި ސީޒަންގައި ކުޅުނު ތިން މެޗުން ވެސް ޕީއެސްޖީ ވަނީ މޮޅުވެފަ އެވެ. ތިން މެޗުން އެ ޓީމު ވަނީ މިހާތަނަށް 14 ލަނޑު ޖަހައިފަ އެވެ. -- އޭއެފްޕީ
