ލަންޑަން (އޮގަސްޓް 13) - އިނގިރޭސި ޕްރިމިއާ ލީގުގައި މިރޭ އާސެނަލާއި މެންޗެސްޓާ ސިޓީން ކުޅުނު ދެ ވަނަ މެޗުން ވެސް މޮޅުވިއިރު، މެންޗެސްޓާ ޔުނައިޓެޑް ދެ ވަނަ މެޗުން ވެސް ބަލިވެ، ލީގުގެ އެންމެ ފުލަށް ވެއްޓިއްޖެ އެވެ.
ސިޓީ ވަނީ މިރޭ އަމިއްލަ ދަނޑުގައި 4-0 އިން ބޯންމައުތު ބަލިކޮށްފަ އެވެ. އާސެނަލުން އަމިއްލަ ދަނޑުގައި ކުޅުނު މެޗުގައި ލެސްޓާ ސިޓީގެ މައްޗަށް ކުރިހޯދީ 4-2 އިންނެވެ. ޔުނައިޓެޑް ރަށުންބޭރުގައި ބްރެންޓްފޯޑް އަތުން ބަލިވީ 4-0 އިންނެވެ. ސިޓީ އާއި އާސެނަލް އެންމެ ކުރީގައި އޮތީ ހަ ޕޮއިންޓް ހޯދައިގެންނެވެ. މި ފަހަރުގެ ސީޒަނުގައި މިހާތަނަށް ކުޅުނު ދެ މެޗުން ވެސް ބަލިވި ހަމައެކަނި ޓީމަކީ ޔުނައިޓެޑް އެވެ.
އިއްތިހާދު ސްޓޭޑިއަމްގައި ސިޓީ މިރޭ ކުޅުނު މެޗުގައި އެ ޓީމަށް ލީޑުނަގައިދިނީ 19 ވަނަ މިނިޓްގައި އާލިން ބްރައުޓް ހާލަންޑް ދިން ބޯޅައަކުން އިލްކާއި ގުންޑޮގާން އެވެ. މެޗުގެ 31 ވަނަ މިނިޓްގައި ކެވިން ޑި ބްރޭނާ ޖެހި އިންޑިވިޖުއަލީ މޮޅު ގޯލުން ސިޓީ ލީޑުފުޅާކުރި އެވެ. އޭގެ ހަ މިނިޓް ފަހުން ޑި ބްރޭނާ ދިން ބޯޅައަކުން ފިލް ފޯޑެން ސިޓީގެ ތިން ވަނަ ގޯލު ޖެހި އެވެ.
ސިޓީން ހަތަރު ވަނަ ގޯލު ޖެހީ ދެ ވަނަ ހާފުގަ އެވެ. ޔާއޯ ކަންސޭލޯ ނެގި ހުރަހެއް ހުއްޓުވަން އުޅުމުގެ ތެރޭގައި ބޯންމައުތުގެ ޖެފަސަން ލެމާ އަތުން ބޯޅަ ވަނީ ބައިކޮޅަށެވެ.
ސިޓީގެ ޖީސޫސް ގޯލު ޖެހުމަށް ފަހު އުފާފާޅުކުރަނީ.--- ފޮޓޯ: އޭއެފްޕީ
އާސެނަލްގެ އެމިރޭޓްސް ސްޓޭޑިއަމްގައި މިރޭ އެ ޓީމު މޮޅުކޮށްދިނުމުގައި ތަރި އަކީ ސިޓީ ދޫކޮށް އެ ޓީމަށް ބަދަލުވި ގަބްރިއެލް ޖީސޫސް އެވެ. އޭނާ ވަނީ ދެ ގޯލު ޖެހުމުގެ އިތުރުން އާސެނަލްގެ އަނެއް ދެ ގޯލު ޖަހަން ފުރުސަތު ވެސް ތަނަވަސްކޮށްދީފަ އެވެ. އާސެނަލްގެ އަނެއް ދެ ގޯލު ޖެހީ ސްވިޒަލެންޑްގެ މިޑްފީލްޑަރު ގްރޭނިޓް ޝަކާ އާއި ގަބްރިއެލް މާޓިނޭލީ އެވެ.
ލެސްޓާގެ ފުރަތަމަ ގޯލަކީ އާސެނަލްގެ ޑިފެންޑަރު ވިލިއަމް ސަލީބާ އަތުން ބައިކޮޅަށް ވަން ގޯލެކެވެ. އަނެއް ގޯލު ޖެހީ ޖޭމްސް މެޑިސަން އެވެ.
ފުރަތަމަ މެޗުގައި އަމިއްލަ ދަނޑުގައި ބްރައިޓަން އަތުން ބަލިވި ޔުނައިޓެޑް މިރޭ ބްރެންޓްފޯޑް ދަނޑުގައި ކުޅެން އެރީ ކްރިސްޓިއާނޯ ރޮނާލްޑޯ ފުރަތަމަ އެގާރައިގައި ހިމަނައިގެންނެވެ. އެކަމަކު، އޭގެ ތަފާތެއް ނުފެނި، ބްރެންޓްފޯޑުން ފުރަތަމަ ހާފު ނިންމާލީ ހަތަރު ގޯލުގެ ލީޑެއްގައި އޮވެގެންނެވެ. އެ ހަތަރު ގޯލު ވެސް ޖެހީ 35 މިނިޓް ތެރޭގަ އެވެ.
ބްރެންޓްފޯޑުން ވަނީ މެޗުގެ 10 ވަނަ މިނިޓްގައި ޖޯޝް ޑަ ސިލްވާ ޖެހި ގޯލުން ލީޑުނަގައިފަ އެވެ. އޭރިއާބޭރުން ޑަ ސިލްވާ ޖެހި ޝޮޓްގައި ބާރެއް ނެތް ނަމަވެސް ޔުނައިޓެޑް ކީޕަރު ޑޭވިޑް ޑެހެއާ ބޯޅަ ހިފަން އުޅުމުގެ ތެރޭގައި އަތްދަށުން ވަނީ ގޯލަށެވެ. އޭގެ އަށް މިނިޓް ފަހުން ޑެހެއާ އެ ޓީމުގެ .ކްރިސްޓިއަން އެރިކްސަން އަށް ދިން ބޯޅަ ހޯދައި، އޭރިއާތެރެއިން ބްރެންޓްފޯޑްގެ ދެ ވަނަ ގޯލު ޖެހީ މަތިއަސް ޖެންސަން އެވެ.
ފުރަތަމަ ހާފު ނިމުމުގެ ކުރިން ބްރެންޓްފޯޑުން އިތުރު ދެ ގޯލު ޖެހީ އިވާން ޓޯނޭ ތަނަވަސްކޮށްދިން ފުރުސަތުތަކުގަ އެވެ. އެ ގޮތުން ބްރެންޓްފޯޑްގެ ތިން ވަނަ ގޯލު މެޗުގެ 30 ވަނަ މިނިޓްގައި ބެން މީ ޖެހިއިރު، އޭގެ ފަސް މިނިޓް ފަހުން، ބްރްޔާން އެމްބުއޭމޯ ވަނީ ބްރެންޓްފޯޑްގެ ހަތަރު ވަނަ ގޯލު ޖަހައިފަ އެވެ.
ޔުނައިޓެޑުން އާ ކޯޗު އެރިކް ޓެން ހާގާ އެކު ލީގު ފަށަން ޖެހިފައި މި ވަނީ ދަށް ރެކޯޑަކާ އެކު އެވެ. ފުރަތަމަ ދެ މެޗުން ބަލިވިއިރު، އެ ޓީމު އޮތީ ލީގު ތާވަލުގެ އެންމެ ފަހަތުގަ އެވެ. މިދިޔަ ސީޒަނާ އެއްކޮށް ބަލާނަމަ ޔުނައިޓެޑުން މިވަނީ އެންމެ ފަހުން ރަށުން ބޭރުގައި ލީގުގައި ކުޅުނު ހަތް މެޗުން ވެސް ބަލިވެފަ އެވެ. މިއީ 1936 ވަނަ އަހަރަށް ފަހު ޔުނައިޓެޑްގެ އެންމެ ދަށް ރެކޯޑެވެ.
