ތާލިބާނުން އަފްގާނިސްތާނުގެ ވެރިކަމަށް އައިތާ އަހަރެއް ފަހުން ފަސްޖެހުމެއް ނެތި އެ ގައުމުގެ އަންހެނުން އަނެއްކާވެސް ވެރިރަަށް ކާބުލްގައި މުޒާހަރާކޮށްފި އެވެ.
ގާތްގަނޑަކަށް 40 އަންހެނުން ކާބުލްގެ މަގުތައް މަތީ ހިނގާލުމެއް ބޭއްވީ ހައްގުތައް ދިނުމަށް ޑިމާންޑް ކުރުމުގެ ގޮތުންނެވެ. އެ މީހުން ގެތަކަށް ފޮނުވާލުމަށް ތާލިބާނުން ވައިގެ ތެރެއަށް ބަޑި ޖެހި އެވެ.
މުޒާހަރާގެ ބައިވެރިންގެ މޮބައިލް ފޯނުތައް ވެސް ވަނީ އަތުލާފަ އެވެ. ގިނަ ދުވަސްތަކަށް ފަހު އަންހެނުންގެ މުޒާހަަރާއެއް ބޭއްވި އިރު، ތާލިބާނުން ވަނީ އަންހެނުންގެ ގިނަ ހައްގުތަކެއް ނިގުޅައިގެންފަ އެވެ.
މުޒާހަރާ ކުރި މީހުން ގޮވަމުން ދިޔައީ މަސައްކަތް ކުރުމުގެ ހައްގާއި އަންހެން ކުދިންނަށް ކިޔެވުމުގެ ހައްގު ދިނުމަށެވެ. ޖިންސަށް ބަލައި، ތައުލީމުގައި ތަފާތުކުރުން ގެންގުޅޭ ހަމަައެކަނި ގައުމަކީ އަފްގާނިސްތާނެވެ.
އޭގެ އިތުރުން އާއިލާގެ ފިރިހެން މެމްބަރަކާ ނުލައި 45 މޭލަށް ވުރެ ދުރު ހިސާބަށް ދަތުރު ކުރުން މަނާކޮށް، މޫނު ނިވާކުރަން ވެސް އަންހެނުންނަށް ވަނީ އަންގާފަ އެވެ.
