ގިތެޔޮމިރުހުގެ އެންމެ ކުޅި ވައްތަރުގެ ކަމަށް ބުނެވޭ "ގޯސްޓް ޕެޕާ" ގެ 17 މިރުސް މިނިޓެއް ތެރޭ ކައިގެން އެމެރިކާގެ މީހަކު ދުނިޔޭގެ ރިކޯޑު ފޮތަށް އަރައިފި އެވެ.
ގިނިސް ވޯލްޑް ރިކޯޑްގައި ހިމަނާފައިވާ ގޮތުން، އެމެރިކާގެ ކެލިފޯނިއާ އަށް ނިސްބަތްވާ ގްރެގް ފޯސްޓާ މި ރިކޯޑު ހަދާފައިވަނީ މިދިޔަ އަހަރުގެ ނޮވެމްބަރު މަހު ސެންޑިއާގޯ ގަ އެވެ. ނަމަވެސް ރަސްމީކޮށް ރިކޯޑު ފޮތުގައި އޭނާ ހިމަނާފައިވަނީ މިދިޔަ ހޯމަދުވަހު އެވެ.
ގޯސްޓް ޕެޕާ ނުވަތަ ބޫތު ޖަލޯކިއާ ގިތެޔޮ މިރުހަކީ ބުނެވޭ ގޮތުގައި ދުނިޔޭން މިހާތަނަށް ފެނުނު އެންމެ ކުޅި މިރުހުގެ ތެރޭގައި ހިމެނޭ މިރުހެކެވެ. 2007 ވަނަ އަހަރު މި މިރުސް ވަނީ އެންމެ ކުޅި މިރުހުގެ ގޮތުގައި ވޯލްޑް ރިކޯޑް ފޮތުގައި ވެސް ހިމަނާފަ އެވެ. އެހެން ނަމަވެސް 2011 ވަނަ އަހަރާއި 2013 ވަނަ އަހަރު ވަނީ މިއަށްވުރެ ކުޅި އެހެން ދެ ވައްތަރެއްގެ މިރުސް ފެނިފަ އެވެ. އެއީ އެފްރިކާގެ ޓްރިނިޑާޑް ސްކޯޕިއަން ބަޗް ޓީ ޕެޕާ އާއި ކެރޮލައިނާ ރީޕާ ގެ ނަމުން ނަންދީފައިވާ ދެ މިރުހެކެވެ - ބޫތު ޖަލޯކިއާ އަކީ އިންޑިއާގެ އުތުރުން އައްސާމް ހިސާބުގައި ހައްދާ މިރުހެކެވެ.
ގްރެގް ފޯސްޓާ އާ ބެހޭގޮތުން ރިކޯޑު ފޮތުގައި ބުނެފައިވަނީ، އޭނާ އަކީ އެކި ކަހަލަ މިރުސް ގޭގައި ހައްދައި އުޅޭ، އަދި އަބަދުވެސް ކުޅިކޮށް ކާން ލޯބިކުރާ މީހެއް ކަމަށެވެ. ކުޅި ރަހައަށް ހޭނުމަށް އޭނާ މަސައްކަތްކުރާތާ އެތައް އަހަރުތަކެއް ވެއްޖެ އެވެ.
ގްރެގް ވަނީ 8.72 ސިކުންތު ތެރޭގައި ހަ ކެރޮލިނާ ރީޕާ މިރުސް ކެއުމުގެ ރެކޯޑެއް ވެސް ވެސް ހަދާފަ އެވެ. އަދި މި ދެވައްތަރުގެ މިރުސް އެންމެ ކުޑަ ވަގުތުކޮޅެއްތެރޭ އެންމެ ގިނައިން ކެއުމުގެ ރިކޯޑު އޮންނަނީ ވެސް އޭނާގެ އަތުގަ އެވެ.
