ސްރީލަންކާގެ ކުރީގެ ރައީސް ގޮތަބަޔާ ރާޖަޕަކްސަ ވަގުތީ ގޮތުން ތައިލޭންޑްގައި މަޑު ކުރައްވަން ހަމަޖެހިފައިވާ ކަމަށް ތައިލޭންޑްގެ ފޮރިން މިނިސްޓްރީން ބުނެފި އެވެ.
އެ މިނިސްޓްރީގެ ތަރުޖަމާނު ތަނީ ސަންގްރަތު ވިދާޅުވީ ތައިލޭންޑަަށް ވަޑައިގަންނަވަން ހަމަޖެހުނު ނަމަވެސް، ގޮތަބަޔާ އެ ގައުމުގެ ހިމާޔަތަށް އެދިވަޑައިގެންފައި ނުވާ ކަމަށެވެ.
ގޮތަބަޔާ ތައިލޭންޑަށް އެތެރެވުމުގެ ހުއްދަ ދެއްވުމަށް ރަސްމީކޮށް ހުށަހެޅީ ލަންކާ ސަރުކާރުންނެވެ. ޑިޕްލޮމެޓިކް ޕާސްޕޯޓާ އެކު ވިސާ ނުލައި 90 ދުވަސް އެމަނިކުފާނަށް ތައިލޭންޑުގައި މަޑުކުރެއްވޭނެ އެވެ.
"ވަގުތީ ގޮތުން ތައިލޭންޑްގައި މަޑުކުރެއްވުމަށް ފުރާވަޑައިގަންނަވާނެ. ސިޔާސީ ރައްކާތެރިކަމަށް މިހާތަނަށް އެދިފައެއް ނުވޭ،" ތަނީ ވިދާޅުވި އެވެ.
ގޮތަބަޔާ ތައިލޭންޑަށް ވަޑައިގަންނަވާނެ ދުވަަހެއް ނޭނގޭ ކަމަށް ވެސް އޭނާ ވިދާޅުވި އެވެ. ލަންކާ ދޫކޮށް ރާއްޖެ ވަޑައިގެން އެއް ދުވަސް ފަހުން ގޮތަަބަޔާ ދަަތުރު ކުރެއްވީ ސިންގަޕޫރަށެވެ.
ރައީސްކަމުން އިސްތިއުފާ ދެއްވީ ޖުލައި 14 ވަނަ ދުވަހު ސިންގަަޕޫރަށް ވަޑައިގެންނެވުމަށް ފަހުގަ އެވެ. ލަންކާ ސަރުކާރުން ބުނެފައި ވަނީ ގޮތަބަޔާ ގައުމަށް އެނބުރި ވަޑައިގަންނަވާނެ ކަމަށެވެ.
އެކަމަކު މިއީ އެނބުރި ގައުމަށް ވަޑައިގަަންނަވަން އެންމެ ރަނގަޅު ވަގުތު ނޫން ކަމަށް މިހާރު ރައީސްކަމުގައި ހުންނެވި ރަނިލް ވިކްރަމަސިންހަ ވަނީ ވިދާޅުވެފަ އެވެ.
