ސޯޝަލް މީޑިއާގައި ލީކުކޮށްލާފައިވާ ބަދުއަހުލާގީ އަމަލުތައް ހިންގާ ވީޑިއޯތަކުގެ ތުހުމަތުގައި ހައްޔަރުކޮށްފައިވާ މީހުންނާމެދު ދައުވާ ކުރަން ފޮނުވުމުގެ ކުރިން ޕްރޮސެކިއުޓާ ޖެނެރަލް (ޕީޖީ)ގެ މަޝްވަރާއަށް ހުށަހަޅައިފި އެވެ.
މި މައްސަލައިގައި މިހާތަނަށް ބަންގްލަދޭޝްގެ އަލަމްގީރުގެ އިތުރުން ގާނޫނީ ވަކީލު ނާޒިމް އަބްދުއްސައްތާރާއި ރައްޔިތުންގެ މަޖިލީހުގެ ކުރީގެ މެމްބަރު މުހައްމަދު ނަޝީދު (ކާނަލް) އާއި ފުލުހުންގެ ޑްރަގް އެންފޯސްމަންޓް ޑިޕާޓްމަންޓުގައި މަސައްކަތް ކުރާ އަބްދުއްރަހްމާން ރަފީއު ވަނީ ހައްޔަރުކޮށްފަ އެވެ.
މި މައްސަލައިގައި ދައުވާ ކުރަން ފުލުހުން ފޮނުވުމުގެ ކުރިން ޕީޖީގެ މަޝްވަރާއަށް ހުށަހަޅާފައިވާ ކަން އެ އޮފީހުގެ އޮފިޝަލަކު ވަނީ ޔަގީންކޮށްދެއްވާފަ އެވެ.
އަލަމްގީރާއެކު އެއް ޖިންސުން ގުޅުން ހިންގި ކަމަށް ފާހަގަވެފައިވަނީ 40 އެއްހާ މީހުން ކަމަށާއި އޭގެ ތެރެއިން ބައެއް މީހުންގެ އެއް ވީޑިއޯއަށް ވުރެ ގިނަ ވީޑިއޯ ވެސް ހުރި ކަމަށް ފުލުހުންގެ އިސް އޮފިޝަލަކު ވަނީ ވިދާޅުވެފަ އެވެ.
އެހެންނަމަވެސް މި މައްސަލައިގައި މިހާތަނަށް ހައްޔަރުކޮށްފައިވަނީ ހަތަރު މީހުންނެވެ. މި މައްސަލައިގައި ތުހުމަތު ކުރެވޭ 20 އަށް ވުރެ ގިނަ މީހުންގެ ޕާސްޕޯޓު ފުލުހުން މިހާތަނަށް ހިފަހައްޓާފައިވެ އެވެ.
ފުލުހުން މީގެ ކުރިން ބުނެފައިވާ ގޮތުގައި، ތަހުގީގަށް މީހުން ހައްޔަރުކުރުމާއި މިފަދަ މައްސަލަތަކުގައި އެކަށީގެންވާ މީންވަރަށް ހެއްކާއި ގަރީނާ ހޯދިފައިވާ ދައުލަތުގެ އެކި އިދާރާތަކުގައި މަސައްކަތްކުރާ ފަރާތްތައް ނިސްބަތްވާ އޮފީސްތަަކަށް އެމީހުންގެ މައްސަލަތައް ތަހުގީގު ކުރަމުންދާކަން އަންގަމުންދާ ކަމަށް ވަނީ ބުނެފަ އެވެ.
އެއާއެކު، ގިނަ އިދާރާތަކުން އަންނަނީ ވީޑިއޯތަކުގެ މައްސަލައިގައި ހިމެނޭ މީހުން ސަސްޕެންޑުކުރަމުންނެވެ. މިގޮތުން މިހާތަނަށް ކަސްޓަމްސް ދެ މުވައްޒަފަކާއި ބައެއް މިނިސްޓްރީތަކުގެ މުވައްޒަފުންނާއި އިމާމެއްގެ އިތުރުން ޓީޗަރަކާއި ސިފައިންގެ މީހެއް ވެސް ވަނީ ސަސްޕެންޑުކޮށްފަ އެވެ.
