ނިއު ޔޯކްގައި އާއްމުންނަށް ނޭނގި ނުވަތަ ޑަޔަގްނޯޒް ނުކުރެވި ގިނަ އަދަދެއްގެ ޕޯލިއޯ ކޭސް އުޅެދާނެ ކަމަށް އެ ސިޓީގެ ސިއްހީ އޮފިޝަލަކު ވިދާޅުވެއްޖެ އެވެ.
މިދިޔަ މަހު ނިއު ޔޯކްގެ ރޮކްލޭންޑް ކައުންޓީގައި ޕޯލިއޯ ވައިރަހުގެ ސަބަބުން ފިރިހެނަކު ޕެރެލައިޒްވި އެވެ. އޮފިޝަލުން ބުނީ އެއީ ޕޯލިއޯއާ ދެކޮޅަށް ވެކްސިން ނުޖަހާ ހުރި މީހެއް ކަމަށެވެ.
ލަންޑަނާއި ގުދުސްގެ ޖަންކްޝަން ހޮޅިތަކުގެ ފެން ޓެސްޓު ކުރިއިރު، ޕޯލިއޯ ވައިރަސް ފެނިފައިވާ އިރު، އެކަން ގުޅިފައި ވަނީ އެމެރިކާގައި އެ ބަލި ޖެހުނު މީހާއާ އެވެ.
ތަރައްގީވަމުންދާ ގައުމުތަކުގައި ޕޯލިއޯއާ ދެކޮޅަށް ވެކްސިން ޖަހާ ރޭޓް އިތުރު ކުރަން މިހާރު ވަނީ ލަފާދީފަ އެވެ.
ރޮކްލޭންޑް ކައުންޓީގެ ހެލްތު ކޮމިޝަނަރު ޑރ. ޕެޓްރީޝިއާ ޝްނާބެލް ރުޕާޓް ބީބީސީއަށް ވިދާޅުވީ އާއްމުންނަށް ނޭނގި ޕޯލިއޯ ފެތުރެމުން ދިޔުމުގެ ނުރައްކާ ވަރަށް ބޮޑު ކަމަށެވެ.
"މީހަކު ޕެރެލައިޒްވުމާ ހަމައަށް ދިޔުމުން މިއީ އެންމެ ކޭސްއެއް ކަމަށް ބަލައި ނިންމާލެވޭކަށް ނެތް. ޕެރެލިޓިކް ޕޯލިއޯ ދިމާވަަނީ ކޭސްތަކުގެ އެއް ޕަސެންޓަށް ވުރެ ވެސް މަދުން،" އޭނާ ވިދާޅުވި އެވެ.
"ގިނަ ކޭސްތަކުގައި އަލާމާތެއް ނުފެންނާނެ. ނޫނީ ފެނުނަސް ވަރަށް އާދައިގެ ކަންކަން މި ހުންނަނީ. އެހެންވީމަ ނޭނގިދާނެ."
"އެހެންވީމާ ޕެރެލިޓިކް ކޭސްއަކާ ހަމައަށް ދިޔުމަށް އެތައް ސަތޭކަ، ފަހަރުގައި އެތައް ހާސް ކޭސްތަކެއް ހަގީގަތުގައި އުޅުން އެކަށީގެންވޭ."
ރޮކްލޭންޑް ކައުންޓީގެ ބައެއް ހިސާބުތަކުގައި ވެކްސިން ރޭޓް ވަރަށް ދަށެވެ. އެގޮތުން މުހިއްމު ވެކްސިންތައް ޖަހާފައި ވަނީ 60 ޕަސެންޓް މީހުންނެވެ. މީގެ ކުރިން 2018 ގައި އެ ތަަނުގައި މީޒްލްސް ވެސް ފެތުރުނެވެ.
ޕޯލިއޯއަކީ އާއްމުކޮށް އުމުރުން ފަސް އަހަރުން ދަށުގެ ކުދިންނަށް ޖެހޭ ނުރައްކާތެރި ބައްޔެކެވެ. އެ ބަލި ނައްތާލަން ފެށި ބޮޑު ކެމްޕެއިންއާ އެކު ގިނަ ގައުމުތަކުން ވަނީ ކޭސްތައް ސުމަކަށް ތިރިކޮށްފަ އެވެ.
މިހާރު އެ ވައިރަސް ފެންނަނީ ހަމައެކަނި ޕާކިސްތާން އަދި އަފްގާނިސްތާނުންނެވެ. ނަމަވެސް ޕޯލިއޯގެ ބަލިކަަށި ވައިރަހެއް ނަގައިގެން އުފެއްދި ވެކްސިނެއް ބޭނުންކުރެ އެވެ.
ޕޯލިއޯގެ ބަލިކަށި ވައިރަސް ހިމެނޭ ވެކްސިން ޖަހާފައި ތިބޭ މީހުންނަށް ބަލި ނުޖެހުނު ނަމަވެސް، އެ މީހުންގެ ފަރާތުން ތަަގައްޔަރުވެފައިވާ ފެން ވެކްސިން ނުޖަހާ ހުރި މީހަކަށް ފޯރައިފި ނަމަ ބަލި ޖެހުމުގެ ފުރުސަތު އޮވެ އެވެ.
އެހެންވެ، ޑަބްލިއުއެޗްއޯއިން ބާރު އަޅަނީ އޯރަލް ޕޯލިއޯ ވެކްސިން (އޯޕީވީ) ބޭނުން ކުރުން ހުއްޓާލައި، ޕޯލިއޯ ވައިރަސް ނުހިމެނޭ ނުވަތަ އިންއެކްޓިވޭޓެޑް ޕޯލިއޯ ވެކްސިން (އައިޕީވީ) ބޭނުން ކުރުމަށެވެ.
