ދެ ވަނަ ޑިވިޝަން މުބާރާތުގެ ގުރޫޕް ދޭއްގައި ކުޅެން ޖެހުނު ފަހު މެޗުގައި ލޮރެންޒޯ ސްޕޯޓްސް ކްލަބް އަތުން 4-1 އިން މޮޅުވެ، ވިކްޓަރީ މުބާރާތް ނިންމާލައިފި އެވެ.
މި މެޗުގެ ކުރިން ވިކްޓަރީ އަށް ސެމީ ފައިނަލްގެ ޖާގަ ގެއްލިފައި އޮތުމުން، މެޗުން މޮޅުވެގެން އެ ޓީމަށް ހާސިލްވާނެ ކަމެއް ނެތެވެ. ހަމައެކަނި ހިތްހަމަޖެހުމަކީ މޮޅަކާ އެކު، މި އަހަރުގެ ދެ ވަނަ ޑިވިޝަން ނިންމާލުމެވެ.
މެޗުގެ ފުރަތަމަ ހާފުގައި ވިކްޓަރީގެ ހަސަން ނާއިމް ވަނީ ހެޓްރިކެއް ހަދައިފަ އެވެ. އަދި މެޗުގެ 83 ވަނަ މިނިޓުގައި އެ ޓީމުގެ ހަތަރު ވަނަ ލަނޑު ޖެހީ އަހުމަދު ހުސެއިން އެވެ. ދެ ވަނަ ހާފުގައި ލިބުނު ޕެނަލްޓީއަކުން ލޮރެންޒޯ އަށް ސުން ކަނޑުވާލަދިނީ ނަސޫހް ސައީދެވެ.
މި މެޗުން މޮޅުވެ، ވިކްޓަރީ ދެވަނަ ޑިވިޝަން މުބާރާތުގެ ގުރޫޕް ދޭއްގައި ކުޅެންޖެހޭ މެޗުތައް ނިންމާލީ ހަ މެޗުން ލިބުނު 10 ޕޮއިންޓާ އެކު އެވެ. ކުޅުނު ހަ މެޗުގެ ތެރެއިން، ވިކްޓަރީ މޮޅުވީ ތިން މެޗުންނެވެ. އެއް މެޗު ވަނީ އެއްވަރުވެފަ އެވެ. ވިކްޓަރީ ވަނީ ދެ މެޗުން ބަލިވެފަ އެވެ.
ލަންކާގެ ކޯޗު ޕަކީރު އަލީގެ އިރުޝާދުގެ ދަށުން، މި މުބާރާތަށް އެންމެ ރަނގަޅަށް ތައްޔާރުވި އެއް ޓީމަކީ ވިކްޓަރީ އެވެ. ބިދޭސީ ހަތަރު ކުޅުންތެރިންނާއި، ފުރަތަމަ ޑިިވިޝަންގައި ކުރިން ކުޅުނު ކުޅުންތެރިންތަކެއް ހިމެނޭ ސްކޮޑަކާ އެކު، ވިކްޓަރީން މުބާރާތުގެ ކުރިން ޅ.ހިންވަރުގައި ކޭމްޕް ވެސް ކުރި އެވެ.
އެޑްމިނިސްޓްރޭޝަނާއި މުސާރައިގެ މައްސަލަތަކާ ހެދި ވިކްޓަރީ ތިން އަހަރެއްހާ ދުވަހު ސަސްޕެންޝަނެއްގައި އޮތުމަށް ފަހު، ވިކްޓަރީ މައްސަލަތައް ހައްލުކޮށް އަލުން ދަނޑަށް ނިކުތީ މި މުބާރާތުންނެވެ. އެހެންވެ، އެ ޓީމުގެ ސަޕޯޓަރުންގެ އުންމީދަކަށްވީ ފުރަތަމަ ޑިވިޝަނަށް ޓީމު އެރުމެވެ. އެކަމަކު, މި ފަހަރުގެ ނަތީޖާއާ އެކު، ފުރަތަމަ ޑިވިޝަނަށް އެރުމަށް ވިކްޓަރީ އަށް ވަނީ އިތުރު އިންތިޒާރެއް ކުރަންޖެހިފަ އެވެ.
