ހ. ޝީރީންވިލާގައި ރޭ ދަންވަރު އުމުރުން 22 އަހަރުގެ ޝިއާއު މުހައްމަދު ސައީދު (ޝިއާ) މަރާލި މައްސަލައިގެ ތަހުގީގު ގާތުން ބަލަމުންދާނެ ކަމުގެ ޔަގީންކަން ޕްރޮސެކިއުޓާ ޖެނެރަލް ހުސައިން ޝަމީމް މިއަދު ދެއްވައިފި އެވެ.
މި ހާދިސާ ހިނގި ކަމާއި މި މަރާ ގުޅޭ ތުހުމަތުގައި މީހަކު ހައްޔަރުކުރިކަން ފިޔަވައި އެއްވެސް މައުލޫމާތެއް އަދި ފުލުހުން ހާމައެއް ނުކުރެ އެވެ. އެނގިފައިވާ ގޮތުގައި މި މައްސަލާގައި ފުލުހުން ހައްޔަރުކޮށްފައިވަނީ ޒުވާން ސްކޭޓަރު އަލީ ޝާހިލް، 23، އެވެ.
މި މައްސަލައާ ގުޅިގެން "އަދަދު"އިން ކުރި ސުވާލެއްގެ ޖަވާބުގައި ޝަމީމް ވިދާޅުވީ، ރޭގެ އެ ހާދިސާގެ މައުލޫމާތު ފުލުހުންނަށް ލިބުމާއެކު ޕީޖީ އޮފީހުގެ ސަމާލު ކަމަށް މި ކަން ގެނެސްފައިވާ ކަމަށެވެ. އަދި މިފަދަ މައްސަލަތަކުގައި އާންމުކޮށް އަމަލުކުރާ އުސޫލުން އެ އޮފީހުގެ އިރުޝާދު ދެމުންދާ ކަމަށެވެ.
"ރޭ އެ ހާދިސާގެ މައުލޫމާތު ފުލުހުން ވަނީ ޕީޖީއާ ހިއްސާކޮށްފަ، ރެއިން ފަށައިގެން ޕީޖީން ވެސް ދަނީ ފުލުހުންނާ ވަރަށް ކައިރިން މަސައްކަތް ކުރަމުން، އަދި އެ ކަމުގައި ފުލުހުންނަށް ދޭން ވާނެ އިރުޝާދުތައް ވެސް ޕީޖީ އޮފީހުން ދެމުން ގެންދާނެ،" ޝަމީމް ވިދާޅުވި އެވެ.
ޝާހިލް ރޭ ހައްޔަރުކޮށްގެން ގެންދިޔައިރުު، އޭނާ ބަންދުކޮށްގެން ތަހުގީގު ކުރިއަށް ގެންދިއުމަށްޓަކައި ބަންދާ މެދު ގޮތެއް ނިންމުމަށް މިއަދުގެ ވަގުތެއްގައި ކްރިމިނަލް ކޯޓަށް ވެސް ހާޒިރު ކުރާނެ އެވެ.
ޝިއާއުގެ ހަށިގަނޑު ފުލުހުން ނެރުނު އިރު ދެ ބޮޑީ ބޭގް ވެސް ނެރުނެވެ. އެހެންވެ، ބެލެވެނީ ހަށިގަނޑު އޮތީ ބުރިކޮށްފައި ކަމުގަ އެވެ. ހަށިގަނޑު ވަނީ ގަލޮޅު މޯޗަރީއަށްް ގެންގޮސްފަ އެވެ.
