މެޗުގެ ފަހު ވަގުތު ޖެހި ލަނޑާ އެކު، އެފްއޭއެމް ދެ ވަަނަ ޑިވިޝަން ފުޓްބޯޅަ މުބާރާތުގައި މިއަދު ވިކްޓަރީ ސްޕޯޓްސް އަތުން 1-0 އިން މޮޅުވެ، ކްލަބް ޓީނޭޖް ސެމީ ފައިނަލްގެ އުންމީދުތައް ދެމެހެއްޓިއިރު، ވިކްޓަރީ އަށް ސެމީ ފައިނަލްގެ ފުރުސަތު ގެއްލިއްޖެ އެވެ.
ޓާފް ދަނޑުގައި މިއަދު ހަވީރު ކުޅުނު މެޗު ލަނޑެއް ނުޖެހި އެއްވަރުވެގެން ނިމެން ދަނިކޮށް، ޓީނޭޖުން މެޗު ކާމިޔާބުކުރީ އިތުރު ވަގުތުގައި އަލީ އަހުމަދު އަލް އަފީފީ ކާމިޔާބުކުރި ލަނޑުންނެވެ.
ވިކްޓަރީ މުބާރާތުގައި ކުޅުނު ފުރަތަމަ މެޗުގައި ބީޖީ ސްޕޯޓްސް އަތުން 2-1 އިން މޮޅުވިއިރު، ދެ ވަނަ މެޗުގައި އެލްޓީ ސްޕޯޓްސްއާ ވަނީ 1-1 އިން އެއްވަރުވެފަ އެވެ. ތިން ވަނަ މެޗުގައި ވާދަވެރި ނިއު ރޭޑިއަންޓް އަތުން ވަނީ ތަފާތު ބޮޑުކޮށް، 4-1 އިން ބަލިވެފަ އެވެ.
ގުރޫޕް ދޭއްގައި މިހާތަނަށް ކުޅުނު ހަތަރު މެޗުން، ވިކްޓަރީ އަށް ލިބިފައިވަނީ ހަތަރު ޕޮއިންޓެވެ. ވިކްޓަރީ އަށް ވުރެން ކުރީގައި އޮތީ އެއް ވަނައިގައި ހަތަރު މެޗުން 12 ޕޮއިންޓް ހޯދާފައިވާ ނިއު ރޭޑިއަންޓާއި ދެ ވަނައިގައި ހަތަރު މެޗުން 10 ޕޮއިންޓް ހޯދައިގެން އޮތް އެލްޓީ ސްޕޯޓްސް ކްލަބް އަދި ތިން ވަނައިގައި ނުވަ ޕޮއިންޓް ހޯދައިގެން އޮތް ޓީނޭޖް އެވެ.
ވިކްޓަރީ އަށް ފުރުސަތު ގެއްލުނީ ޓީނޭޖާއި އެލްޓީ އަށް ބާކީ ދެ މެޗު އޮތްއިރު، އޭގެ ތެރެއިން އެއް މެޗަކީ އެ ދެ ޓީމު ބައްދަލުކުރާ މެޗަށް ވެފައި އެ މެޗުން ކޮންމެ ނަތީޖާއެއްް ނުކުތަސް ވިކްޓަރީ އަށް ދެން އޮތް ދެ މެޗުން މޮޅުވެގެން ވެސް ގަދަ ދެ ޓީމުގެ ތެރޭގައި ހިމެނިގެން ސެމީ އަށް ދެވޭނެ ގޮތެއް ނެތުމުންނެވެ.
ކުޅުންތެރިންގެ މުސާރައިގެ މައްސަލައިގައި 2019 ވަނަ އަހަރުން ފެށިގެން ސަސްޕެންޝަންގައި އޮތުމަށް ފަހު، ވިކްޓަރީގެ އާ ބޯޑެއް މި އަހަރު އެކުލަވާލައި، ދެ ވަނަ ޑިވިޝަނަށް ނުކުތީ ދަރަނިތައް ހަލާސްކުރުމަށް ފަހު އެވެ. އެހެން ނަމަވެސް، ސްރީލަންކާގެ ތަޖުރިބާކާރު ކޯޗު ޕަކީރު އަލީގެ އިރުޝާދުގެ ދަށުން ނިކުތް ވިކްޓަރީ އަށް ވަނީ ފުރަތަމަ ޑިވިޝަންގައި ވާދަކުރުމުގެ ފުރުސަތު ހޯދުމަށް އިތުރު އިންތިޒާރެއް ކުރަންޖެހިފަ އެވެ.
