ޕީޕީއެމްގެ ލީޑަރު އަދި ކުރީގެ ރައީސް އަބްދުﷲ ޔާމީންއާއި އެމްއެންޕީގެ ރައީސް އަދި ރައްޔިތުންގެ މަޖިލީހުގެ ދަނގެތި ދާއިރާގެ މެންބަރު މުހައްމަދު ނާޒިމް އެކަކު އަނެކަކަށް ރައްދު ދެއްވައި ޓްވީޓް ކުރައްވައިފި އެވެ.
ދުވަސްތަކަކަށް ފަހު ޔާމީންގެ ޓްވީޓެއް މިއަދު ކުރައްވާފައިވަނީ، އިސްލާމް ދީނާ ހިލާފު ބައެއް ކަންކަން އާންމުވުމުންނާއި ދީނީ ގޮތުން ހިޔާލު ތަފާތުވެފައިވާ މައްސަލަތަކުގައި ސަރުކާރުން އަމަލު ކުރަމުންދާ ގޮތާ ގުޅޭ ގޮތުން ގިނަ ބަޔެއްގެ ފާޑުކިއުން ސަރުކާރަށް އަމާޒުވެފައިވާ ދަނޑިވަޅެއްގަ އެވެ.
އަދި މި ދަނޑިވަޅުގައި އަދާލަތު ޕާޓީއަށް ނިސްބަތްވާ ދެ ވަޒީރުން، ހޯމް މިނިސްޓަރު އިމްރާން އަބްދުﷲ އާއި އިސްލާމިކް މިނިސްޓަރު ޑރ. އަހްމަދު ޒާހިރުގެ ނިންމެވުންތަކުގެ ދިފާއުގައި އެ ޕާޓީގެ ދީނީ އިލްމުވެރިން ވާހަކަ ދައްކަވަމުން ގެންދަވަނިކޮށެވެ.
ޔާމީން ކުރެއްވި ޓްވީޓްގައި ފުރަތަމަ ވެސް ލިޔުއްވާފައިވަނީ އަދާލަތު ޕާޓީގެ ދީނީ އިލްމުވެރިންނަށް ރައީސް އިބްރާހިމް މުހައްމަދު ސޯލިހުގެ ސަރުކާރުގެ ހިމާޔަތް ލިބިފައިވާ ކަމަށެވެ.
އެއަށް ފަހު ޔާމީން ލިޔުއްވާފައިވަނީ ރާއްޖެ މިހާރު އޮތް ހާލަތަށް ދިޔައީ ނާޒިމް އާއި ޖުމްހޫރީ ޕާޓީގެ ލީޑަރު ގާސިމް އިބްރާހީމްގެ ބައިވެރިވުމާއެކު ކަމަށެވެ. "މާ ނޫން ކަމަށް ހެދިގެން" މިހާރު އެ ކުރައްވާ މަސައްކަތުން ގާސިމާއި ނާޒިމަށް ތައުބާ ވެވިދާނެތޯ ވެސް ސުވާލު ކުރައްވައި ޔާމީން ލިޔުއްވާފައިވެ އެވެ.
"މަރުވަންދެކަށް ވެސް ގާސިމް އާއި ނާޒިމް ތިއްބަވާނީ ހާއިނުންގެ ގޮތުގައި،" އިނގިރޭސި ވަރުގަދަ ލަފުޒުތައް ބޭނުން ކުރައްވައިގެން އާންމުކޮށް ޓްވީޓް ކުރައްވާ ޔާމީން މިއަދު ވެސް އިނގިރޭސި ބަހުން ކުރެއްވި ޓްވީޓްގައިވެ އެވެ.
މި ކަމަށް ރައްދު ދެއްވައި ނާޒިމް ޓްވީޓެއް ކުރެއްވީ، ޔާމީންގެ ވެރިކަމުގައި ހިނގި އެމްއެމްޕީއާރުސީގެ ބޮޑު ހިޔާނާތުގެ މައްސަލައާ ގުޅިގެން "އަލްޖަޒީރާ" މީޑިއާ އިން އެކުލަވާލާފައިވާ ތަހުގީގު ރިޕޯޓެއްގެ ލިންކެއް ހިއްސާ ކުރައްވަ އެވެ.
"ރައީސް ޔާމީނަށް ވުރެ ބޮޑު ހާއިނަކަ ހުންނާނީ ވަކި ކާކު؟ މަނިކުފާނުގެ ޒައާމަތް އޮތީ ވައްކަން ކުރުމާއި، ރިޝްވަތާއި، އޮޅުވާލުންތަކުން ފުރިފައި، ވާދަވެރި ފަރާތްތައް ހައްޔަރުކޮށް ބަންދުކުރުމާއި، ދައުލަތުގެ މުއައްސަސާތަކުގެ ބާރު ކަނޑުވާލާފައި،" ނާޒިމް ލިޔުއްވާފައިވެ އެވެ.
ނާޒިމްއަކީ ޔާމީންގެ ސަރުކާރުގެ ފުރަތަމަ ޑިފެންސް މިނިސްޓަރެވެ. ނަމަވެސް ނާޒިމްގެ ގެއަށް ފުލުހުން ވަދެ އެ ގެއިން ފިސްތޯލައެއް ފެނުނު މައްސަލާގައި އޭނާ ހައްޔަރު ކުރި އެވެ. މިިނިސްޓަރުކަމުން އޭނާ ވަކިކޮށް، އެ މައްސަލާގައި 11 އަަހަރުގެ ޖަލު ހުކުމެއް ވެސް އިއްވި އެވެ.
ހަނގުރާމަވެރި ހަތިޔާރު ގެންގުޅުމުގެ ކުށުގައި ކުރީގެ މިނިސްޓަރު ނާޒިމަށް އިއްވާފައިވާ ހުކުމް ސުޕްރީމް ކޯޓުން ބާތިލްކުރީ ރިޔާސީ އިންތިހާބަށް ފަހު، އެ އިންތިހާބުން ޔާމީން ބަލިވެވަޑައިގަތް ފަހުންނެވެ. ނާޒިމް ތުހުމަތު ކުރައްވާ ގޮތުގައި އޭރުގެ ސަރުކާރުން އޭނާ ފްރޭމް ކުރީ އެވެ.
އެމްއެންޕީގެ ނަމުގައި ސިޔާސީ ޕާޓީއެއް އުފެއްދުމަށް ފަހު ނާޒިމް ގެންދަވަނީ 2023 ގެ ރިޔާސީ އިންތިހާބުގައި ވާދަކުރެއްވުމަށް ތާއީދު ހޯއްދެވުމުގެ މަސައްކަތް ކުރައްވަމުންނެވެ. ޕީޕީއެމުން ވެސް ވަނީ އެ ޕާޓީގެ ރިޔާސީ ކެންޑިޑޭޓުގެ ޓިކެޓު ޔާމީނަށް ދެއްވުމަށް ނިންމައިފަ އެވެ.
