ކުރީގެ ރައީސް ޑރ. މުހައްމަދު ވަހީދު ހަސަން މަނިކުގެ ވެރިކަމުގައި އެއްވެސް މީހަކަށް ނޭނގި ނަމަވެސް, އަނިޔާއެއް ދެވިފައިވާ ނަމަ މާފަށް އެދޭ ކަމަށް އެ މަނިކުފާނު ވިދާޅުވެއްޖެ އެވެ.
ވަހީދު ރޭ ކުރެއްވި ޓްވީޓެއްގައި ވިދާޅުވީ ކުރީގެ ރައީސް މުހައްމަދު ނަޝީދު ވެރިކަމުން އިސްތިއުފާ ދެއްވުމާ ގުޅިގެން އެމަނިކުފާނާއި އާއިލާއަށް އަނިޔާވެރިވި ހުރިހާ އެންމެންނަށް މާފު ކޮށްފައިވާ ކަމަށެވެ.
"... އަޅުގަނޑާއި އާއިލާއަށް އަނިޔާވެރި ބަސްތަކާ އަމަލުތަކުން ރައްދު ދެއްވި ހުރިހާ ފަރާތްތަކަށް މާފު ދެމެވެ. އަދި އަޅުގަނޑުގެ ރައީސް ކަމުގައި އެއްވެސް ފަރާތަކަށް ނުހައްގު އަނިޔާއެއް ދެވުނު ނަމަ މާފަށް އެދެމެވެ." ވަހީދު ކުރެއްވި ޓްވީޓުގައި ވިދާޅުވި އެވެ.
ވަހީދު މިފަދައިން ޓްވީޓު ކުރައްވާފައިވަނީ ނަޝީދު އިސްތިއުފާ ދެއްވުމަށް އުފެދުނު ހިތްހަމަނުޖެހުމުގެ ތެރެއިން ވަހީދަށް "ބާގީ" އޭ ކިޔާ ގޮވުނީތީ މީހަކު މާފަށް އެދުމާ ގުޅިގެންނެވެ.
ދައުރު މެދުތެރެއިން ފެބްރުއަރީ 2012 ގައި ފުލުހުންނާއި ސިފައިންގެ ބައިވެރިވުމާ އެކު ހިނގި ހަމަނުޖެހުންތަކަށް ފަހު ނަޝީދު އިސްތިއުފާ ދެއްވުމުން ވެރިކަމާ ހަވާލުވެވަޑައިގަތީ އެއިރުގެ ނައިބު ރައީސް ވަހީދެވެ.
ވަހީދު ވެރިކަމާ ހަވާލުވެވަޑައިގަތީ "ބަގާވާތެއް"ގެ ތެރެއިން ކަމަށް ބުނެ އެމްޑީޕީ މެންބަރުންނާއި ނަޝީދަށް ތާއީދު ކުރާ ގިނަ ބަޔަކު ވަނީ ވަހީދާ ދެކޮޅަށް ނުކުމެފަ އެވެ.
އެކަމަކު، ބޭރުގެ ފަރާތްތަކުގެ ބައިވެރިވުމާ އެކު އެކަން ބެލުމަށް ފަހު ކޮމިޝަން އޮފް ނޭޝަނަލް އިންކުއަރީ (ކޯނީ) އިން ވަނީ އެއީ ބަގާވާތެއް ނޫން ކަމަށް ނިންމާފަ އެވެ.
