ސިންގަޕޫރަށް ވަޑައިގެން އިސްތިއުފާ ދެއްވި ސްރީލަންކާގެ ކުރީގެ ރައީސް ގޮތަބަޔާ ރާޖަޕަކްސަ ގައުމަށް އެނބުރި ވަޑައިގަންނަވާނެ ކަމަށް އެ ގައުމުގެ ސަރުކާރުން ބުނެފި އެވެ.
ކެބިނެޓް ތަރުޖަމާނު ބަންޑުލާ ގުނަވަރްޑެނަ އަންގާރަ ދުވަހު ނޫސްވެރިންނަށް ވިދާޅުވީ ގޮތަބަޔާ އުޅުއްވަނީ ފިއްލަވައިގެން ނޫން ކަމަށާއި އެކަމަކު އެނބުރި ވަޑައިގަންނަވާނެ ތާރީހެއް ނޭނގޭ ކަމަށެވެ.
އިގްތިސާދީ ކާރިސާއާ ގުޅިގެން އެތައް މަހެއް ވަންދެން ރައްޔިތުން ކުރި މުޒާހަރާގައި ޕްރެޝަރު ބޮޑުވެ އިސްތިއުފާ ދެއްވުމުގެ ކުރިން ގޮތަބަޔާ އެންމެ ފުރަތަމަ ވަޑައިގެންނެވީ ރާއްޖެ އަށެވެ. އިސްތިއުފާ ދެއްވީ ރާއްޖެ ދޫކޮށް، ސިންގަޕޫރަށް ވަޑައިގެންނެވުމަށް ފަހު އެވެ.
އަނބިކަނބަލުންނާއި ދެ ބޮޑީގާޑުންނާ އެކު ސިންގަޕޫރަށް ވަޑައިގެންނެވި ގޮތަބަޔާ ރައީސްކަމުން އިސްތިއުފާ ދެއްވުމުން، ދައުލަތުގެ އެންމެ އިސްވެރިޔާއަށް ލިބޭ "އިމުއިނިޓީ" ދެން ލިބިވަޑައިނުގަންނަވާނެ އެވެ.
ސިންގަޕޫރުން ބުނީ ސިޔާސީ ހިމާޔަތް ހޯދަން ގޮތަބަޔާ އެދިވަޑައިގެންފައި ނުވާ ކަމަށެވެ. އެމަނިކުފާނު ސިންގަޕޫރުގައި މަޑު ކުރަން 14 ދުވަހުގެ ވިސާއެއް ދިނުމަށް ފަަހު، އެ މުއްދަތު މިހާރު ވަނީ އިތުރު 14 ދުވަހުން ދިގުދަންމާފަ އެވެ.
ގޮތަބަޔާ ދެން ދަތުރު ކުރައްވާނެ ތަނަކާ މެދު ގިނަ އަޑުތައް ފެތުރިފައިވާ އިރު، ބައެއް ރިޕޯޓުތައް ބުނީ ޔޫއޭއީއަށް ދަތުރު ކުރެއްވުން އެކަށީގެންވާ ކަމަށެވެ.
އެހެން ނަމަވެސް، ނަން ހާމަނުކުރާ އޮފިޝަލަކާ ހަވާލަދީ ބްލޫމްބާގް ނޫހުން ބުނީ އެނބުރި ކޮލޮމްބޯއަށް ވަޑައިގަންނަވަން އެމަނިކުފާނު ބޭނުންވާ ކަމަށެވެ.
އޮފިޝަލް އެގޮތަށް ބުނެފައި ވަނިކޮށް އަންގާރަ ދުވަހު ކެބިނެޓް ތަރުޖަމާަނު ވެސް ވިދާޅުވީ ގޮތަބަޔާ އެނބުރި ވަޑައިގަންނަވާނެކަމުގެ މައުލޫމާތު ލިބިފައިވާާ ކަމަށެވެ.
