މި އަހަރުގެ އޯގަސްޓު މަހު ސޮއިކުރަން ހަމަޖެހިފައި އޮތް އިންޓަނޭޝަަނަލް މަނިޓަރީ ފަންޑް (އައިއެމްއެފް) ގެ ސްޓާފް ލެވެލް އެއްބަސްވުމެއް ފަސްކުރަން ޖެހިފައިވާ ކަމަށް ސްރީލަންކާގެ މިނިސްޓަރަކު ވިދާޅުވެއްޖެ އެވެ.
މިނިސްޓާ އޮފް ލޭބާ އެންޑް ފޮރިން އެމްޕްލޮއިމަންޓް މަނޫޝާ ނާނަޔައްކަރަ ވިދާޅުވީ އެއްބަސްވުމުގައި ސޮއިކުރުން ފަސްކުރަން ޖެހުނީ މުޒާހަރާތައް ހޫނުވެ ހިނގި ހަމަނުޖެހުމުގެ ސަބަބުން ކަމަށެވެ.
"މިދިޔަ ހަަފްތާގައި ވޯލްޑް ފުޑް އޯގަނައިޒޭޝަންގެ ވެރިޔާ ސްރީލަންކާއަށް ކުރައްވަން ހަމަޖެހިފައި އޮތް ދަތުރު ވެސް ހަަފްތާއަކަށް ފަސްކޮށްފި. ބޭރު ގައުމުތަކުން ލަންކާ ރައްޔިތުންނަށް ލިބެން އޮތް ވަޒީފާގެ ފުރުސަތުތައް ދަނީ ގެއްލެމުން. އެ ފުރުސަތުތައް މިހާރު ލިބެނީ އެފްރިކާ ގައުމުތަކުގެ މީހުންނަށް،" އޭނާ ވިދާޅުވި އެވެ.
"ލަންކާ ރައްޔިތުންނަށް މިއަދު ބޭނުން ވަނީ ސިޔާސީ ހަމަޖެހުމާއި ސުލްހަ."
"ސުލްހަވެރިކަމާ އެކު މުޒާހަރާ ކުރާ މީހުންގެ ތެރޭގައި ހަމަނުޖެހުން އުފައްދަން ބޭނުންވާ ބަޔަކު ވެސް އެބަ އުޅޭ. އެ މީހުންގެ މަގްސަދަކީ އިންތިހާބަކުން ކުރި ނުލިބޭނެކަން ސާފުވާާތީ، ހަތިޔާރު ނަގައި ހަމަނުޖެހުން ހިންގައިގެން ވެސް ވެރިކަަމުގެ ބާރުތައް ހޯދުން. އަޅުގަނޑުމެންގެ ސަރުކާރުން އެފަދަ މީހުން ހުއްޓުވާނެ."
ސުލްހަވެރި މުޒާހަރާއަށް ސަރުކާރުން އަބަދުވެސް ފުރުސަތު ދޭނެ ކަމަަށް ފާހަގަކުރައްވަމުން މިނިސްޓަރު ވިދާޅުވީ މުޒާހަރާ ކުރެވޭނެ ވަަކި ސަރަހައްދުތަކެއް ކަނޑައަޅާނެ ކަމަށެވެ.
