ބުދަ ދުވަހު ސްރީލަންކާގެ ޕާލިމެންޓުގައި ނެގި ވޯޓުން ރައީސް ކަމަށް އިންތިހާބުވެވަޑައިގެންނެވި ރަނިލް ވިކްރަމަސިންހަ މަގާމުގެ ހުވާ ކުރައްވައިފި އެވެ.
ބުރާސްފަތި ދުވަހުގެ ހެނދުނު ރަނިލް މަގާމުގެ ހުވާ ކުރެއްވީ ޕާލިމެންޓުގައި އޮތް ހާއްސަަ ރަސްމިއްޔާތެއްގަ އެވެ. މަގާމުގެ ހުވާ ލައިދެއްވީ އުއްތަމަ ފަނޑިޔާރު ޖަޔާންތާ ޖަޔަސޫރިޔަ އެވެ.
ޔުނައިޓެޑް ނޭޝަނަލް ޕާޓީ (ޔޫއެންޕީ) ގެ ލީޑަރު ރަނިލްއަަކީ ސްރީލަންކާގެ އަށް ވަނަ ރައީސެވެ. އެމަނިކުފާނު މީގެ ކުރިން ވަނީ ހަ ފަހަރު ބޮޑު ވަޒީރުކަަން ކުރައްވާފަ އެވެ.
މިދިޔަ މޭ މަހު ބޮޑު ވަޒީރު ކަމުން މަހިންދަ ރާޖަޕަަކްސަ އިސްތިއުފާ ދެއްވުމުން، އާ ބޮޑު ވަޒީރުގެ މަގާމަށް ވަޑައިގެންނެވީ ރަނިލް އެވެ.
އޭގެ ފަހުން މި މަހުގެ ކުރީކޮޅު ރައީސް ގޮތަބަޔާ ރާޖަޕަކްސަ އިސްތިއުފާ ދެއްވުމުން ވަގުތީ ރައީސްގެ މަގާމަށް އައްޔަނު ކުރެއްވީ ވެސް ރަނިލް އެވެ.
އާ ރައީސް ހޮވުމަަށް ބުދަ ދުވަަހު ޕާލިމެންޓުގައި ނެގި ވޯޓުން 225 މެމްބަރުންގެ ތެރެއިން 134 މެމްބަރުންގެ ވޯޓު ލިބިވަޑައިގެންނެވި އެވެ.
ރަނިލް އެ މަގާމުގައި ހުންނަވާނީ ނޮވެމްބަރު 2024 އާ ހަމައަށެވެ. އެއީ އިސްތިއުފާ ދެއްވި ރައީސް ގޮތަބަޔާގެ ދައުރުގެ ބާކީ ބަޔެވެ.
