ސްރީ ލަންކާގެ އިގްތިސޯދީ ކާރިސާއިން އަރައިގަތުމަށް އެހީވެވޭނެ ގޮތްތަކާ ގުޅޭ ގޮތުން ކުރިއަަށް ގެންދާ މަޝްވަރާ ވީ އެންމެ އަވަހަކަށް ނިންމަން ބޭނުންވާ ކަމަށް އިންޓަނޭޝަނަލް މަނިޓަރީ ފަންޑް (އައިއެމްއެފް) ގެ މެނޭޖިން ޑިރެކްޓަރު ކްރިސްޓަލީނާ ޖޯޖިއޭވާ ވިދާޅުވެއްޖެ އެވެ.
ބޭރުގެ ލޯނުތައް ނުދެއްކި ޑީފޯލްޓްވެފައިވާ ސްރީ ލަންކާއިން ޑޮލަރު ހުސްވެ ގައުމު އޮތީ ހުއްޓުމަކަށް އައިސްފަ އެވެ. އެ ގޮންޖެހުންތަކުގެ ތެރެއިން ސިޔާސީ ހަލަބޮލިވުން އުފެދި އާއްމު ރައްޔިތުން މަގު މައްޗަށް ނުކުމެ، ސަރުކާރަށް ޕްރެޝަރު ވަނީ ބޮޑުވެފަ އެވެ.
ނިކޭ އޭޝިއާ ނޫހަށް ދެއްވި އިންޓަވިއުގައި ޖޯޖިއޭވާ ވިދާޅުވީ "ސްރީ ލަންކާ ރައްޔިތުންގެ ހާލަތާ މެދު އަައިއެމްއެފުން ކަންބޮޑުވާ" ކަމަށެވެ. އޭނާ ވިދާޅުވީ ހަރުދަނާ ސަރުކާރެއް ގާއިމް ކުރުމާ އެކު އައިއެމްއެފްގެ ޓީމެއް ވަގުތުން ސްރީލަންކާއަށް ގޮސް މަޝްވަރާ ކުރިއަށް ދާނެ ކަމަަށެވެ.
ލަންކާގެ ޕާލިމެންޓުން ބުދަ ދުވަހު ނެގި ވޯޓުގަައި އާ ރައީސް ކަމަަށް އިންތިހާބުވެވަޑައިގެންނެވީ ރަނިލް ވިކްރަމަސިންހަ އެވެ. ސަރުކާރު ހިންގުމުގައި އިދިކޮޅު ހިމެނޭ ގޮތަށް، ހުރިހާ ޕާޓީތައް ބައިވެރިވުމަށް ރަނިލް ވަނީ ގޮވާލައްވައިފަ އެވެ.
ސްރީލަންކާގެ ދަރަނި ރީސްޓްރަކްޗާ ކުރާނެ ގޮތުގެ ހުށަހެޅުން ސަަރުކާރުން އައިއެމްއެފްއަށް ހުށަހަޅަން ޖެހެނީ އޯގަސްޓު މަަހު އެވެ.
