ސްރީލަންކާގެ ޕާލިމެންޓުގައި ބުދަަ ދުވަހުގެ ހެނދުނު ނެގި ވޯޓުން އެ ގައުމުގެ ރައީސް ކަމަށް ރަނިލް ވިކްރަމަސިންހަ އިންތިހާބުވެވަޑައިގެންފި އެވެ.
ރަނިލްއަށް 134 ވޯޓު ލިބިވަޑައިގެންނެވި އިރު، ޑަލަސް އަލަހައްޕެރުމައަށް ލިބިވަޑައިގެންނެވީ 82 ވޯޓެވެ. ތިން ވަނަ ކެންޑިޑޭޓު އަނޫރާ ކުމާރަ ޑިއްސަނަޔެކެއަށް ލިބިވަޑައިގެންނެވީ އެންމެ ތިން ވޯޓެވެ.
ޕާލިމެންޓުން އިންތިހާބު ކުރި އާ ރައީސް މަގާމުގައި ހުންނަވާނީ ނޮވެމްބަރު 2024 އާ ހަމައަށެވެ. އެއީ އިސްތިއުފާ ދެއްވި ރައީސް ގޮތަބަޔާ ރާޖަޕަކްސަގެ ދައުރުގެ ބާކީ ބަޔެވެ.
މިއަަދުގެ އިންތިހާބުގައި 225 ޕާާލިމެންޓް މެމްބަރުންނަށް ވޯޓުލުމުގެ ހައްގު ލިބުނެވެ. ސައްހަ ވޯޓުގެ ގޮތުގައު 219 ވޯޓު ގުނި އިރު، ސައްހަ ނޫން ހަތަރު ވޯޓު އަދި ވަަކި އަތަކަށް ނުޖެހޭ ދެ ވޯޓު ވެސް ހިމެނެ އެވެ.
މިދިޔަ މޭ މަހު ބޮޑު ވަޒީރު ކަމުން މަހިންދަ ރާޖަޕަަކްސަ އިސްތިއުފާ ދެއްވުމުން، އާ ބޮޑު ވަޒީރުގެ މަގާމަށް ވަޑައިގެންނެވީ ރަނިލް އެވެ.
އޭގެ ފަހުން މި މަހުގެ ކުރީކޮޅު ރައީސް ގޮތަބަޔާ އިސްތިއުފާ ދެއްވުމުން ވަގުތީ ރައީސްގެ މަގާމަށް އައްޔަނު ކުރެއްވީ ވެސް ރަނިލް އެވެ.
މިއަަދު ވޯޓުން ކުރި ލިބިވަޑައިގެންނެވުމުން، ރަނިލް ހުރިހާ ސިޔާސީ ޕާޓީއަކަށް ގޮވާލެއްވީ އެއްބައިންތަކަމާ އެކު ގައުމުގެ ކާރިސާއިން އަރައިގަތުމަށް މަސައްކަތް ކުރުމަށެވެ.
