މާލެ ސިޓީ ކައުންސިލުން މާލޭގެ ރައްޔިތުންގެ ހިޔާލު ހޯދުމަށް ބޭއްވި ބައްދަލުވުމުގައި ސަރުކާރުން އިއުލާންކޮށްފައިވާ ގޯތި ސްކީމްގައި ގޯތި ލިބުން އެންމެ ހައްގު ބަޔަކާ ގުޅޭ ގޮތުން، ހިޔާލު ފާޅުކުރި އާންމު ރައްޔިތުންގެ މެދުގައި ބޮޑު ޒުވާބެއް ރޭ ހިނގައިފި އެވެ.
މާލޭ ރައްޔިތުންނަށް ބަންޑާރަ ގޯތީގެ ގޮތުގައި ދޫކުރަން ސަރުކާރުން އިއުލާންކޮށްފައިވާ 3000 ގޯއްޗަށް ކުރިމަތިލެވެނީ އެއްވެސް އިރެއްގައި މާލެ ފިޔަވައި އެހެން ރަށެއްގެ ރަށްވެހިކަން ނެތް އަދި އަބަދުވެސް މާލޭގެ ރަށްވެހިކަން އޮތް ފަރާތްތަކަށެވެ. މިހެންވެ ދަފްތަރުގައި ތިބި މީހުނަށް ވެސް ކުރިމަތި ނުލެވޭނެ އެވެ.
މި ޒުވާބު ރޭގެ ބައްދަލުވުމުގައި ފެށިގެން ދިޔައީ މާލެ ދަފްތަރުގައި އޮންނަ ހައްޖައްތަ ނަމަކަށް ކިޔާ މީހަކު ފާޅުކުރި ހިޔާލަކާ އެކުގަ އެވެ. ދަފްތަރުގައި ތިބި ގާތްގަނޑަކަށް 17،000 އެއްހާ މީހުންގެ ތެރޭގައި ވެސް ހާލުގައި ދިރިއުޅެމުންދާ ފަރާތްތަކަށް ވެސް މި ސަރަހައްދުން ގޯތި ހައްގުވާނެ ކަމަށް އޭނާ ބުންޏެވެ.
"މާލެ ދަފްތަރުގައި ޖެހުނީ ވަކި ބޭނުންވެގެނެއް ނޫން، ދަފްތަރުގައި ޖެހެން މަޖުބޫރު ކުރީ، މާލޭގައި މުޅި އުމުރު ހޭދަވެގެން މި ދަނީ، މި ހުރިހާ ރައްޔިތުންގެ ހައްގުގައި އަޅުގަނޑު މި ގޮވާލަނީ، މި އަޑުނީވޭ ސަރުކާރަށް މޭޔަރު މުއިއްޒު މި ކަން އިއްވައިދޭށޭ،" ހައްޖައްތަ ބުންޏެވެ.
މާލެ ރަށްވެހިންގެ ޖަމިއްޔާގެ ނައިބު ރައީސް އިސްމާއީލް ނާޒިމް ބުނީ، ދަފްތަރު އުވާލުމަށް ފަހު ދަފްތަރުގައި ތިބި މީހުންނަށް އެ މީހުންގެ އަމިއްލަ އުފަން ރަށުން ބިން ދޭން ޖެހޭ ކަމަށެވެ. މާލޭ ރައްޔިތުން އަމިއްލަ ރަށުގައި ދިރިއުޅެނީ "ރެފިއުޖީންނަށް" ވެގެން ކަމަށް އޭނާ ބުންޏެވެ.
ހިޔާލު ފާޅުކުރި އެހެން އަންހެން މީހަކު ބުނީ ދަފްތަރުގައި ހިމެނޭ އެހެން ރަށްރަށަށް ނިސްބަތްވާ މީހުންނަށް ރަށްރަށުގައި އަދިވެސް އާއިލާ މީހުނާއި ވާރުތަ މުދަލުން ވެސް ބިން ލިބޭނެ ކަމަށެވެ. މާލެ ފުރިގެން ދިޔައިރު މާލެ ރައްޔިތުންނަށް އެ ފުރުސަތު ނެތް ކަމަށެވެ.
"މިއީ ހިލޭ ލިބޭ ގޯތިތަކެއް ނޫން، އަޅުގަނޑުމެން އެބަ ޖެހޭ މާލޭގައި އޮތް ކުޑަ ތަންކޮޅުު ދޫކޮށްލަން، ދަފްތަރުގައި ތިބޭ މީހުން ވެސް މި ސަރަހައްދުން ގޯތި ބޭނުންވާނަމަ ކުޑަމިނުން އެބަ ޖެހޭ އެބަ ރަށްރަށުގެ މީހުން ވާރުތައިން ލިބޭ ބިންތައް ދޫކޮށްލަން ވެސް،" އޭނާ ބުންޏެވެ.
އެ ފަހުން ދަފްތަރުގައި ހިމެނޭ އަންހެނަކު ވަނީ ލ. ގަމުން މީގެ ކުރިން މާލެ މީހުނަށް ގޯތި ދިން ކަން ފާހަގަކޮށްފަ އެވެ. އެ ތަންތަނުގައި ކިތައް މީހުން ދިރިއުޅޭތޯ ބެލުމަށާއި އެ ބިންތައް ބޭނުން ނުހިފި އޮތުމުން އެެހެން މީހުނަށް ގޯތި ނުދެވި އޮތް ވަރު ބެލުމަށް ވެސް އޭނާ ގޮވާލި އެވެ.
މީގެ އިތުރުން މާލެ ސަރަހައްދުން މިހާރު ވެސް ދޫކޮށްފައިވާ ފްލެޓްތައް ލިބިގެން އެ ފްލެޓްތަކުގައި އުޅެނީ ކިތައް މީހުންތޯ އާއި އޭގެ ބަދަލުގައި ބަޔަކަށް އެ ތަން ކުއްޔަށް ދޫކޮށްފައި މާލޭން ބޭރުގައި ދިރިއުޅެނީ ކިތައް މީހުންތޯ ބެލުމަށް ވެސް އޭނާ ސަރުކާރަށާއި ސިޓީ ކައުންސިލަށް އޭނާ ގޮވާލި އެވެ.
އެ ފަހުން އަނެއްކާ ވެސް މާލެ ރަށްވެއްސަކު ވަނީ ލ. އަތޮޅުން އޭރު ވެސް ގޯތި ދޫކޮށްފައި ވަނީ މާލޭގެ މަތީ ފެންވަރުގެ އާއިލާތަކުގެ މީހުނަށާއި މާލެ ދަފްތަރުގައި ވެސް ހިމެނޭ މުއްސަނދި އާއިލާތަކަށް ކަމަށް ފާހަގަކޮށްފަ އެވެ. މާލޭގެ ނިކަމެތި މީހުނަށް އެ ފުރުސަތުތައް ނުލިބޭ ކަމަށް އޭނާ ބުންޏެވެ.
މި ހިޔާލުތަކާ ގުޅިގެން މުއިއްޒު ވިދާޅުވި ހަމައެކަނި ވާހަކައަކީ އެ ކަމަކީ ސަރުކާރުގެ ސިޔާސަތުތަކާ ގުޅޭ ކަންކަން ކަމަށެވެ. ރައްޔިތުންގެ ކަންބޮޑުވުންތައް ސަރުކާރުގައި ހިއްސާކުރާނެ ކަމަށާއި ނަމަވެސް ސަރުކާރުގެ އެފަދަ ސްކީމްތައް ހިންގުމުގައި ކައުންސިލް ބައިވެރިނުކުރާ ކަމަށް ވެސް މުއިއްޒު ވިދާޅުވި އެވެ.
