ޑާކާ، ބަންގްލަދޭޝް (ޖުލައި 19) - ބަންގްލަދޭޝްގައި ކޮންމެ ދުވަހަކު ވެސް މަދުވެގެން ދެ ގަޑިރިއަަށް ކަރަންޓު ކަނޑައި، ރޭގަނޑު އަށެއްގެ ފަހުން ފިހާރަތައް ބަންދު ކުރަން އަންގައިފި އެވެ.
އޮފިޝަލުން ބުނީ ހަކަތަ ބޭނުން ކުރުން ލިމިޓްކޮށް، ހަކަތަ އުފައްދާ ޕްލާންޓްތައް އަންގާރަ ދުވަހު ބަންދު ކުރީ ދުނިޔޭގެ ބާޒާރުގައި ތެލުގެ އަގު އުފުލި އިގްތިސާދަށް ލޮޅުން އަރާފައި ވާތީ ކަމަށެވެ.
ހަކަތައާ ބެހޭ މިނިސްޓްރީގެ ތަރުޖަމާނު އަސްލަމުއްދީން ވިދާޅުވީ ޔޫކްރެއިން ހަނގުރާމައާ ހެދި ތެލުގެ އަގުތައް ވަރަށް ބޮޑަށް އުފުލުނު ކަމަށާއި ޑީސެލް ޕްލާންޓްތައް ބަންދުކޮށް، ބައެއް ގޭސް ޕްލާންޓްތަައް ބޭނުން ކުރަން ނިންމާފައިވާ ކަމަށެވެ.
އޭގެ އިތުރުން ކޮންމެ ދުވަހަކު ވެސް މަދުވެގެން ދެ ގަޑިއިރަށް ކަރަންޓު ކެނޑުމަށާާއި ރޭގަނޑުގެ އަށެއްގެ ފަހުން ފިހާރަތައް ބަންދު ކުރަން އަންގާފައިވާ ކަމަށް އޮފިޝަަލުން ބުންޏެވެ.
"ފިހާރަތަކާއި މޯލްތަކުން މި އެންގުމާ ހިލާފުވާ ނަމަ، އެ ތަަންތަނަށް ފޯރުކޮށްދޭ ކަރަންޓު ހިދުމަތް ކަނޑާލެވޭނެ،" އަަސްލަމުއްދީން ވިދާޅުވި އެވެ.
އޭނާ ވިދާޅުވީ މިސްކިތްތަަކުގައި ވެސް ފަސް ނަމާދު ވަގުތުގައި އެކަނި އެއާ ކޮންޑިޝަނިން ބޭނުން ކުރުމަށް އަންގާފައިވާ ކަމަށެވެ. އެ ގައުމުގައި އެތައް ހާސް މިސްކިތް ހުރެ އެވެ.
ބޮޑު ވަޒީރުގެ ހަކަތައާ ބެހޭ އެޑްވައިޒަރު ތައުފީގޭ އެލާހީ ޗައުދަރީ ހޯމަ ދުވަހު އާއްމުންނަށް ގޮވާލެއްވީ ވީހާވެސް ބޮޑަށް ކަރަންޓު އިސްރާފު ނުކުރުމަށެވެ.
އިންޓަނޭޝަނަލް މަނިޓަަރީ ފަންޑް (އައިއެމްއެފް) ގެ ކުރީގެ އޮފިޝަލް އަހްސަން މަންސޫރް ވިދާޅުވީ ކަރަންޓު ރޭޝަން ކުރުމަކީ އެންމެ ރަނގަޅު ހައްލު ނޫން ކަމަަށެވެ.
"މިއީ ބެލެންސް އޮފް ޕޭމަންޓް މައްސަލައެއް. މިއީ މެނޭޖު ކުރެވޭނެ ހާލަތެއް. ކަރަންޓު ރޭޝަން ކުރުމުގެ ބަދަލުގައި ސަރުކާރުން ޖެހޭނީ އަގު ބޮޑު ކުރަން،" އޭނާ ވިދާޅުވި އެވެ.
