މާލޭ ރައްޔިތުންނަށް ބަންޑާރަ ގޯތީގެ ގޮތުގައި ދޫކުރަން ސަރުކާރުން އިއުލާންކޮށްފައިވާ 3000 ގޯއްޗަށް އެދި ހުށަހަޅާ ފޯމު އޮންލައިންކޮށް ހުށަހަޅަން ޖެހޭތީ ފުރަން ދަތިވާ ބަޔަކަށް އެހީތެރިކަން ފޯރުކޮށްދެވޭ ގޮތަށް މާލެ ސިޓީ ކައުންސިލުން ދެ ހެލްޕު ޑެސްކްއެއް ބަހައްޓަން ނިންމައިފި އެވެ.
މާލެ ސިޓީ ކައުންސިލުން މިރޭ ކުރިއަށް ގެންދާ ރައްޔިތުންގެ ބައްދަލުވުމުގައި ވާހަކަ ދައްކަވަމުން މޭޔަރު ޑރ. މުހައްމަދު މުއިއްޒު ވިދާޅުވީ ސަރުކާރުގެ ގޯތި ސްކީމަށް އެދުމަށް އޮންނަ ފޯމު އޮންލައިންކޮށް ހުށަހެޅުމުގައި އެހީތެރިކަން ދިނުމަށް ހެލްޕު ޑެސްކް ބަހައްޓާފައި ވަނީ މާފަންނާއި ހެންވޭރުގައި ކަމަށެވެ.
"އޮގަސްޓް މަހުގެ ފުރަތަމަ އާދީއްތައިން ފެށިގެން، ހަފުތާ ބަންދު ނޫން ކޮންމެ ދުވަހަކު ވެސް، މާލެ ސިޓީ ކައުންސިލްގެ އާންމު ހިދުމަތްތަކާ ބެހޭ ބައިގައި ގާއިމް ކުރާ ޑެސްކްއަކާއި، މާފަންނު މަދަރުސާގައި ބަހައްޓާ ޑެސްކްއެއްގައި އެ އެހީތެރިކަން ފޯރުކޮށްދޭން އަޅުގަނޑުމެންގެ މުވައްޒަފުން ތިބޭނެ،" މުއިއްޒު ވިދާޅުވި އެވެ.
ޑެސްކް ހުޅުވާފައި ހުންނަ ގަޑިތައް ފަހުން އިއުލާން ކުރާނެ ކަމަށް މޭޔަރު ވިދާޅުވި އެވެ.
ސަރުކާރުން އިއުލާންކޮށްފައިވާ ގޯތި ސްކީމަށް ޝަރުތު ހަމަވެ ގިނަ އަދަދަކަށް ޕޮއިންޓް ލިބޭ ކޮންމެ މީހަކު ވެސް އެ ސްކީމްގައި ބައިވެރިވި ކަން ކަށަވަރު ކުރަން ސިޓީ ކައުންސިލަށް ކުރެވެން ހުރި މަަސައްކަތްތައް ކުރަމުން ގެންދާނެ ކަމަށް ވެސް މޭޔަރު ވިދާޅުވި އެވެ.
"އަޅުގަނޑުމެން ކައުންސިލުން ބޭނުން، އެ ސްކީމް އިން ގޯތި އެންމެ ހައްގު މީހުން މީގައި ބައިވެރިވާން، އެކަމަށްޓަކައި މިއަށް ޝަރުތު ހަމަވާ ކޮންމެ މީހަކު ވެސް ފޯމު ހުށަހެޅިފައި އޮތުން ބޭނުންތެރި،" މުއިއްޒު ވިދާޅުވި އެވެ.
ގޯތި ސްކީމާއި ސަރުކާރުގެ ފްލެޓް ސްކީމްތަކާ ގުޅޭ ގޮތުން ސިޓީ ކައުންސިލާ އެއްވެސް މިންވަރަކަށް މަޝްވަރާ ނުކުރައްވާ ކަމަށް މުއިއްޒު ވިދާޅުވާ ވާހަކަ މިރޭ ވެސް ތަކުރާރު ކުރެއްވި އެވެ. އެހެންވިޔަސް ސިޓީ ކައުންސިލުން ދެވެން އޮތް އެހީތެރިކަމެއް ރައްޔިތުންނަށް ފޯރުކޮށްދޭން ބޭނުންވާ ކަމަށް ވިދާޅުވި އެވެ.
"ރައްޔިތުންގެ ފަރާތުން ވެސް މި ގެންނަ ޕްރެޝަރުތަކުގެ ސަބަބުން ސަރުކާރަށް ވެސް އެބަ މަޖުބޫރުވޭ ކޮންމެ ވެސް ނަތީޖާތަކެއް ނެރެން، އަޅުގަނޑުމެން އެދެން އެހެން ރަށްރަށެކޭ އެއް ގޮތަށް މާލޭ ރައްޔިތުންނަށް ވެސް ހިލޭ ގޯތި ލިބިގެން ދާން،" މުއިއްޒު ވިދާޅުވި އެވެ.
މާލެ ސިޓީ ކައުންސިލްގެ ހުރިހާ ހިދުމަތަކާއި ސިޓީ ކައުންސިލުން ނަގަން ޖެހޭ ހުއްދަތަކަށް އެދުމަށް ހުށަހަޅާ ފޯމުތައް ވެސް އޮންލައިންކޮށް ހުށަހަޅާ ގޮތަށް "މާވެހި ޕޯޓަލް" ނަމުގައި ޕޯޓަލްއެއް ވެސް މިރޭ އިފްތިތާހް ކުރި އެވެ.
މީގެ އިތުރުން ގާނޫނުގައި އަންގާފައިވާ ގޮތުގެ މަތިން ސިޓީ ކައުންސިލުން މިދިޔަ ހަ މަސް ދުވަހުގެ ތެރޭގައި ކޮށްފައިވާ މަސައްކަތްތައް ވެސް ރައްޔިތުންނާ މިރޭ ހިއްސާ ކުރި އެވެ. އަދި، އެ ބައްދަލުވުމުގައި ބައިވެރިވި އާންމު ރައްޔިތުންގެ ހިޔާލުތައް ފާޅު ކުރުން ކުރިއަށް އެބަ ގެންދެ އެވެ.
