ސްރީލަަންކާގެ ގާނޫނު ހަދާ މަޖިލީހުގެ މެމްބަރުންނަށް މަރުގެ އިންޒާރު ދީ ސޯޝަލް މީޑިއާގައި ޕޯސްޓުތަކެއް ދައުރު ކުރި މައްސަލަ ފުލުހުންނަށް ހުށަހަޅައިފި އެވެ.
އެ މައްސަލަ ބަލައި ދިނުމަަށް އެދި ހުށަހެޅީ މަޖިލީހުގެ ރައީސް މަހިންދަ ޔާޕާ އަބޭވަރްދެނަ އެވެ. އޭނާ ވިދާޅުވީ މަރުގެ އިންޒާރު ދިނީ ބުދަ ދުވަހަށް ތާވަލުކޮށްފައިވާ ވޯޓަށް ނުފޫޒު ފޯރުވުމަށް ކަމަށެވެ.
ސްރީލަންކާގެ އާ ރައީސް އިންތިހާބު ކުރުމުގެ ވޯޓު ބުދަ ދުވަހު ޕާލިމެންޓުގައި އޮންނާނެ އެވެ. އިންތިހާބަށް ކުރިމަތިލާ ކެންޑިޑޭޓުން ރަސްމީކޮށް އެކަން އަންގާނީ އަންގާރަ ދުވަހު އެވެ.
ފުލުހުން ބުނީ މަޖިލިސް މެމްބަރަކަށް ނުފޫޒު ފޯރުވުމަށް އަމަލެއް ހިންގުމަކީ އަދަބު ކަނޑައެޅިފައިވާ ކުށެއް ކަމަަށެވެ. އަދި މަޖިލީހުގެ ރައީސް ހުށަހެޅުއްވި މައްސަލައިގެ ތަހުގީގު ފަށާފައިވާ ކަމަށް ބުންޏެވެ.
ސްރީލަންކާގެ ރައީސްގެ މަގާމު ހުސްވީ ކުރިން އެ މަގާމުގައި ހުންނެވި ގޮތަބަޔާ ރާޖަޕަކްސައަށް ރައްޔިތުންގެ ޕްރެޝަރު ބޮޑުވެ އިސްތިއުފާ ދެއްވުމުންނެވެ.
މިހާރު ވަގުތީ ރައީސްކަމުގައި ހުންނެވީ ގޮތަބަޔާ އައްޔަނު ކުރެއްވި ބޮޑު ވަޒީރު ރަނިލް ވިކްރަމަސިންހަ އެވެ. ބުދަ ދުވަހުގެ އިންތިހާބުގައި ރަނިލް ވެސް ވާދަކުރައްވަ އެވެ.
