ރަހީނު ކުރި ކަމަށް ހަދައި އޮޅުވާލި ކަމުގެ ތުހުމަތުގައި އިންޑިއާގެ ވެރިރަށް ނިއު ދިއްލީގައި އެމެރިކާ އަަންހެނަކު ހައްޔަަރުކޮށްފި އެވެ.
އުމުރުން 27 އަހަރުގެ އަންހެން މީހާ ރަހީނު ކުރި ކަމަށް ހަދައި އޮޅުވާލީ އޭނާގެ މައިންބަފައިން "ބްލެކްމެއިލްކޮށް" ފައިސާ ހޯދުމަށް ކަމަަށް ފުލުހުން ބުންޏެވެ.
އެ އަންހެން މީހާ އިންޑިއާއަށް ދިޔައީ މޭ ތިން ވަނަ ދުވަހު އެވެ. އޭނާގެ މަންމައަށް ގުޅައި، ފިރިހެނަކު ހަމަލާދެމުންދާ ކަމަށް ބުނީ ބުނީ ޖުލައި ހަތް ވަނަަ ދުވަހު އެވެ.
އާއިލާގެ ފަރާތުން އެމެރިކާ އެމްބަސީއަށް ކަންބޮޑުވުން ހުށަހެޅުމުން، ފުލުހުން ތަހުގީގު ކުރަން ފެށީ އެމްބަސީއިން ރަސްމީކޮށް މައްސަލަ ހުށަހެޅުމުންނެވެ.
އަންހެން މީހާ އުޅޭ ތަނެއް ހޯދުމަށް ކުރި ތަހުގީގުގައި އޭނާ އީމެއިލްތަކެއް ފޮނުވައި މަންމައަށް ވީޑިއޯ ކޯލް ކުރި އައިޕީ އެޑްރެސްތައް ޓްރޭސްކުރި އެވެ.
ފުލުހުންގެ މަސައްކަތުން އުމުރުން 31 އަހަރުގެ ނައިޖީރިއާ ފިރިހެނަކު ހައްޔަަރުކޮށް ސުވާލުކުރި އެވެ. އެ ފިރިހެން މީހާާ ބުނީ އަންހެން މީހާ ދިރިއުޅެނީ ދިއްލީ ކައިރީގައި އޮންނަ ނޮއިޑާގެ އެޕާޓްމަންޓެއްގައި ކަމަށެވެ.
"އަންހެން މީހާ ސަލަާމަތް ކުރުމުން އެނގުނީ، ރަހީނު ކުރި ކަމަށް ހަދައި އޮޅުވާލީ މަައިންބަފައިން ބްލެކްމެއިލް ކުރުމަށް ކަން،" ނިއު ދިއްލީ ފުލުހުންގެ ޑެޕިއުޓީ ކޮމިޝަނަރު އަމްރުތާ ގުގުލޮތް ވިދާޅުވި އެވެ.
ފުލުހުން ބުނީ ވޮޝިންޓަނަށް ނިސްބަތްވާާ އަންހެން މީހާ އާއި ނައިޖީރިއ ފިރިހެން މީހާ ދިއްލީގައި ދިރިއުޅެނީ އެކުގައި ކަމަށާއި އަންހެން މީހާގެ ވިސާ އަދި ފިރިހެން މީހާގެ ޕާސްޕޯޓް ވެސް ހަމަވެފައިވާ ކަމަށެވެ.
