މިދިޔަ ސީޒަނުގެ އިނގިރޭސި ޕްރިމިއާ ލީގާއި ގުޅިގެން ކުރިއަށްގެންދިޔަ ވެލިގާ ފެންޓަސީ ލީގުގެ ވަނަވަނައަށް އައި މީހުންނަށް އިނާމު ހަވާލުކޮށްފި އެވެ.
އިނގިރޭސި ޕްރިމިއާ ލީގުގެ ފެންޓަސީ ލީގު، (އެފްޕީއެލް) އަކީ މުޅި ދުނިޔޭގެ ނިސްބަތުން ބެލިޔަސް ވަރަށް ފޯރީގައި ކުރިއަށްދާ މަގުބޫލު ގޭމެކެވެ. ކޮންމެ މީހަކަށް ވެސް ވަކިން ޓީމެއް ހަދާލައިގެން ޕްރައިވެޓް ލީގުތަކެއްގައި ވާދަކުރުމުގެ ފުރުސަތު ލިބެ އެވެ.
އެގޮތުން، ވެލިގާ އިން ދެ ލީގެއް ކުރިއަށްގެންދިޔަ އެވެ. އެއީ، އާންމުންނަށް ހުޅުވާލައިގެން ބޭއްވި ލީގާއި އެ ކުންފުނީގެ މުވައްޒަފުންގެ މެދުގައި ބޭއްވި ލީގެވެ. ދެ ލީގަށް ވެސް ވެލިގާއިން އަގުހުރި އިނާމުތަކެއް ކަނޑައެޅި އެވެ. އާންމުންނަށް ހުޅުވާލައިގެން ބޭއްވި ލީގުގައި 1،200 އަށްވުރެ ގިނަ މީހުން ބައިވެރިވި އެވެ.
ރޭ ބޭއްވި ރަސްމިއްޔާތެއްގައި ވަނީ ވަނަވަނައަށް ދިޔަ މީހުންނާ އިނާމުތައް ހަވާލުކޮށްފަ އެވެ. އިނާމު ހަވާލުކޮށްދިނީ ކޮމިޝަނާ އޮފް ސްޕޯޓްސް އަހްމަދު ސަލީމް އެވެ.
އާންމުންގެ ލީގުން އެއްވަނައަށް ހޮވުނު ލިޒާން އަހްމަދަށް 30،000ރ. ގެ އިނާމެއް ދިން އިރު ދެވަނައަށް ދިޔަ އަބްދުﷲ ވަހީދަށް ދީފައި ވަނީ 20،000ރ. އެވެ. އަދި، ތިންވަނައަށް ދިޔަ އަލީ ނާހިދަށް ދީފައި ވަނީ ޕްލޭސްޓޭޝަން 5 އެވެ. އަދި، ގަދަ 10 އަކަށް ވަނީ އޮރިޖިނަލް ފުޓްބޯޅަ ޖާޒީއަކާއި 2،000ރ. ހަވާލުކޮށްފަ އެވެ.
ވެލިގާގެ މުވައްޒަފުންގެ މެދުގައި ކުރިއަށްގެންދިޔަ ލީގުގައި އެއްވަނައަށް ދިޔަ މުހައްމަދު ހާޒިމް އަށް ޕްލޭސްޓޭޝަން 5 އެއް ދިންއިރު ދެވަނައަށް ދިޔަ ހަސަން މުއާޒަށް ދީފައިވަނީ ލެޕްޓޮޕެކެވެ. އަދި، ތިންވަނައަށް ދިޔަ އަމީމަށް ދީފައިވަނީ ކޮފީ މެޝިނެކެވެ.
މިއީ ވެލިގާއިން ކުރިއަށްގެންދިޔަ މިފަދަ ފުރަތަމަ ލީގު ކަމަށްވާއިރު އަންނަ ސީޒަނުގެ އިނގިރޭސި ލީގާ އެކު ވެސް ވެލިގާ ފެންޓަސީ އެނބުރި އަންނާނެ އެވެ. އަދި، ދެން އޮތް ސީޒަނުގެ ފެންޓަސީ ލީގުގެ އިނާމުތައް މިއަށްވުރެ ބޮޑުވާނެ ކަމަށް ވެލިގާއިން ބުނެ އެވެ.
