ޕެރިސް (ޖުލައި 18) - ފްރާންސްގެ ރެއިމްސް އަށް ކުޅެމުންދިޔަ ޒުވާން ފޯވަޑް ހޫގޯ އެކިޓީކޭ ލޯނު އެއްބަސްވުމެއްގެ ދަށުން ފްރާންސް ލީގުގެ ޗެމްޕިއަން ޕީއެސްޖީއާ ގުޅިއްޖެ އެވެ.
މިދިޔަ ސީޒަންގައި މޮޅު ކުޅުމެއް ދެއްކި އެކިޓީކޭ، 20، ޕީއެސްޖީއާ ލޯނު އެއްބަސްވުމެއްގެ ދަށުން ގުޅުނީ އަންނަ ސީޒަންގެ ނިޔަަލަށެވެ. ފްރާންސްގެ މީޑިއާ ރިޕޯޓްތަކުން ބުނާގޮތުގައި 36 މިލިއަންގެ ޔޫރޯގެ ޓްރާންސްފާ ފީއެއްގައި އެކިޓީކޭ ގެންނަން ޕީއެސްޖީން ބޭނުންވި ނަމަވެސް، އެކިޓީކޭ އާއި ރެއިމްސްއާ ދެމެދު އުފެދިފައިވާ މައްސަލައެއްގެ ސަބަބުން ދާއިމީ ޓްރާންސްފާއެއް ހަމަނުޖެހުނީ އެވެ.
މިދިޔަ ސީޒަންގެ ފްރާންސް ލީގުގައި، އެކިޓީކޭ ވަނީ ޖުމްލަ 11 ލަނޑު ޖަހައިފަ އެވެ.
އެކިޓީކޭ ގެންދަން ނިއުކާސަލް ޔުނައިޓަޑާއި ޔޫރަޕްގެ އެހެން ބައެއް ބޮޑެތި ކްލަބުތަކުން މަސައްކަތްކުރި ނަމަވެސް، ޓްރާންސްފާއެއް ހަމަޖެހޭ ގޮތެއް ނުވި އެވެ.
ޕީއެސްޖީން ވަނީ ކުރިއަށް އޮތް ސީޒަނަށް ސްކޮޑް ވަރުގަދަ ކުރުމުގެ ގޮތުން ޕޯޓޯ އަށް ކުޅެމުންދިޔަ މިޑްފީލްޑަރު ވިޓީނިއާ ގެނެސްފަ އެވެ. މީގެ އިތުރުން، ސްޕޯޓިން ލިސްބަން އިން ލޯނު އެއްބަސްވުމެއްގެ ދަށުން ޕީއެސްޖީ އަށް މިދިޔަ ސީޒަންގައި ކުޅުނު ޑިފެންޑަރު ނޫނޯ މެންޑޭސް ވެސް ވަނީ ދާއިމީ ޓްރާންސްފާއެއްގެ ދަށުން އެ ޓީމަށް ގެނެސްފަ އެވެ. -- އޭއެފްޕީ
