ހޯމަ ދުވަހުން ފެށިގެން މުޅި ސްރީލަންކާގައި އަނެއްކާވެސް ކުއްލި ނުރައްކަލުގެ ހާލަތު އިއުލާންކޮށްފި އެވެ.
ކުއްލި ނުރަައްކަލުގެ ހާލަތުގައި ފުލުހުންނާއި ސަލާމަތީ ބާރުތަކަށް ފަސޭހަކަމާ އެކު މީހުން ހައްޔަރުކޮށް ބަންދު ކުރުމުގެ ބާރު ލިބެ އެވެ.
ކުއްލި ނުރައްކަލުގެ ހާލަތު އިއުލާނު ކުރެއްވީ ވަގުތީ ރައީސް ރަނިލް ވިކްރަމަސިންހަ ނެރުއްވި ގެޒެޓް އަމުރެއްގެ ދަށުންނެވެ.
އެ އަމުރުގައިވާ ގޮތުން ކުއްލި ނުރައްކަލުގެ ހާލަތު އިއުލާން ކުރީ އާއްމު ރައްކާތެރިކަމާއި އަމަންއަމާންކަން ދަމަަހައްޓައި، ޒަރޫރީ ހިދުމަތާއި މުދާ ސަޕްލައި ކުރުން ދެމެހެއްޓުމަށެވެ.
ކުއްލި ނުރައްކަލުގެ ހާލަތު އިއުލާންކޮށްފައިވާ އިރު، ވަރަށް އަވަހަަށް ސްރީލަަންކާގައި ޕްރައިވެޓް ވެހިކަލްތަކަށް ތެޔޮ ވިއްކަން ފަަށާނެ ކަމަށް ބެލެވެ އެވެ.
ނިއުސްވަޔާ ނޫހުން ބުނީ ހޯމަ ނުވަތަ އަންގާރަ ދުވަހު ޕެޓްރޯލް ޝިޕްމަންޓެއް އަންނާނެ ކަމަށް ބެލެވޭ ކަމަށެވެ. ހަކަތައާ ބެހޭ މިނިސްޓަރު ކަންޗަނާާ ވިޖެސޭކަރަ އާދީއްތަ ދުވަހު ވިދާޅުވީ ޝިޕްމަންޓްތަކަށް ފައިސާ ދައްކާފައިވާ ކަމަށެވެ.
ސަރުކާރުން ނިންމާފައި ވަނީ ނޭޝަނަލް ފިޔުލް ޕާސްގެ ނަމުގައި ދޫކުރާ ފާހެއް މެދުވެރިކޮށް ޕްރައިވެޓް ވެހިކަލްތަކަށް ކޮންމެ ހަފްތާއަކަށް ކޯޓާ ކަނޑައަޅައިގެން ތެޔޮ ވިއްކުމަށެވެ.
މިހާތަނަށް 100،000 އަށް ވުރެ ގިނަ ގިނަ އުޅަނދަށް އެ ފާސް ނަގާފައިވާ އިރު، ތެލުގެ އާ ސްޓޮކް ވިއްކަން ފަށާނީ ރަޖިސްޓްރޭޝަން ފުރިހަމަވުމުން، ޖުލައި 20 ވަނަ ދުވަހުން ފެށިގެންނެވެ.
އެހެން ނަމަވެސް، މިހާރު ވެސް ޕެޓްރޯލް ސްޓޭޝަންތަކުގައި ދިގު ކިޔުތައް ވަނީ ހަދަން ފަށާފަ އެވެ. ހަކަތައާ ބެހޭ މިނިސްޓަރު އެދިވަޑައިގެންނެވީ ތެޔޮ ވިއްކަން ފެށުމުގެ ކުރިން ކިޔުތަކަށް ނޭރުމަށެވެ.
