ސައުދީ އަރަބިއްޔާގެ ނޫސްވެރިޔާ ޖަމާލް ހަޝޮގްޖީއަށް ވީ ގޮތާ މެދު "ހިތާމަ ކުރައްވާ" ކަމަށް އެމެރިކާގެ ރައީސް ޖޯ ބައިޑެންއާ ބައްދަލުކުރެއްވުމަށް ފަހު ސައުދީ ވަލީ އަހުދު އަމީރު މުހައްމަދު ބިން ސަލްމާން ވިދާޅުވެއްޖެ އެވެ.
އެ ދެ ބޭފުޅުން ބަައްދަލުކުރެއްވީ ހުކުރު ދުވަހު ޖިއްދާގަ އެވެ. ބައްދަލުވުމުގައި ބައިވެރިވި ސައުދީގެ އިސް އޮފިޝަލަކު ބުނީ ދޮޅު ގަޑިއިރަށް ޝެޑިއުލް ކުރި ނަމަވެސް، ތިން ގަޑިއިރު ވަންދެން ދެ ލީޑަރުން އެކި މައުލޫއުތަކުގައި ވާހަކަ ދެއްކެވި ކަމަށެވެ.
ވަލީ އަހުދު ވިދާޅުވީ ހަަޝޮގްޖީގެ މައްސަލައިގައި ސައުދީ އަރަބިއްޔާއިން ހުރިހާ ގާނޫނީ އިޖުރާއަތުތަކެއް ފުރިހަމަކޮށްފައިވާ ކަމަށެވެ. އެގޮތުން ތަހުގީގުތައް ހިންގައި، ޝަރީއަތްކޮށް، ހުކުމްކޮށް، ހުކުމް ތަންފީޒު ކުރަމުންދާ ކަމަށް ވިދާޅުވި އެވެ.
އޭގެ އިތުރުން ކުރިމަގުގައި އެފަދަ ބޮޑު ގޯހެއް ތަކުރާރު ވިޔަ ނުދިނުމަށް އަޅަން ޖެހޭ ފިޔަވަޅުތައް އަޅައި ނިޒާމުތައް ގާއިމްކޮށްފައި ވާނެ ކަމަށް އެ މަނިކުފާނު ވިދާޅުވި އެވެ.
އެއީ ދުނިޔޭގެ ކޮންމެ ތަަނެއްގަައި ވެސް ހިނގުން އެކަށީގެންވާ ފަދަ ހާދިސާއެއް ކަމަށާއި ހަޝޮގްޖީ ނޫނަސް ހަމަ އެ އަހަަރު ގިނަ އަދަދެއްގެ ނޫސްވެރިން އެހެން ގައުމުތަކުގައި މަރާފައިވާ ކަމަށް ވަލީ އަހުދު ވިދާޅުވި އެވެ.
އެމަނިކުފާނު އިތުރަށް ވިދާޅުވީ އެމެރިކާއިން ވެސް ބޮޑެތި ގޯސްތައް ހަދާފައިވާ ކަމަށާއި އިރާގުގެ އަބޫ ގުރައިބް ޖަލުގައި މީހުންނަށް އަނިޔާކޮށް މެރުމުގެ އިތުރުން ވެސް ލާއިންސާނީ އެތައް އަމަލެއް އެމެރިކާާއިން ހިންގި ކަމަށެވެ.
ވަލީ އަހުދު ވަނީ އިޒްރޭލްގެ ސިފައިން ފަލަސްތީނުގެ ނޫސްވެރިޔާާ ޝީރީން އަބޫ އަކްލެހް މަރާލި ގޮތަށް އިޝާރާތް ކުރައްވައި، އެކަމުގައި އެމެރިކާ އާއި އެހެން ގައުމުތަކުން އެޅީ ކޮން ފިޔަަވަޅެއްތޯ ސުވާލު ކުރައްވައިފަ އެވެ.
ޖަމާލް ހަޝޮގްޖީ މަރުވީ އިސްތަންބޫލްގައި ހުންނަ ސައުދީ އަރަބިއްޔާގެ ކޮންޒިއުލޭޓް ތެރޭގައި ބަޔަކު އޭނާގެ ކަރުގައި ހިފައި ނޭވާ ހާސް ކުރުމުންނެވެ. އޭގެ ފަހުން އޭނާގެ ހަށިގަނޑުގެ ގުނަވަންތައް ވަކިކުރި އެވެ.
އެމެރިކާގެ ޖާސޫސީ އިދާރާތަކުން ތުހުމަތުކުރާ ގޮތުގައި ހަޝޮގްޖީ މަރާލުމަށް އަމުރު ކުރެއްވީ ސައުދީ ވަލީ އަހުދެވެ. ނަމަވެސް އެމަނިކުފާނު އެކަން ދޮގުކުރައްވަ އެވެ.
ސައުދީގެ ކޯޓަކުން 2019 ވަނަ އަހަރު ޝަރީއަތް ކުރުމަށް ފަހު ނަން ހާމަނުކުރާ އަށް މީހެއްގެ މައްޗަށް ހަޝޮގްޖީ މަރާލި ކަމަށް ސާބިތުވި އެވެ.
އޭގެ ތެރެއިން ފަސް މީހުންނަކީ ހަޝޮގްޖީ މަރާލުމުގައި ސީދާ ބައިވެރިވި މީހުންނެވެ. އެ މީހުންނަށް އިއްވި މަރުގެ ހުކުމް ފަހުން ވަނީ 20 އަހަރުގެ ޖަލު ހުކުމަށް ބަދަލުކޮށްފަ އެވެ.
އިތުރު ތިން މީހުންގެ މައްޗަށް ސާބިތުވީ އެ ހާދިސާ ސިއްރު ކުރި ކަމަށެވެ. އެ މީހުންނަށް އިއްވީ ހަތް އަހަރާއި 10 އަހަރާ ދެމެދުގެ ޖަލު ހުކުމްތަކެވެ.
ހަޝޮގްޖީ އަކީ އަމިއްލަ އަށް ގައުމުން އަރުވާލެވިގެން އެމެރިކާގައި ދިރިއުޅެމުން ދިޔަ ސައުދީ ނޫސްވެރިއެކެވެ. އޭނާ ވަނީ ސައުދީ ވަލީ އަހުދަށް ވަރަށް ބޮޑަށް ފާޑުކިޔައި ކޮލަމްތައް ދަ ވޮޝިންޓަން ޕޯސްޓު ނޫހުގައި ޝާއިއުކޮށްފަ އެވެ.
