ސްރީ ލަންކާގައި އުޅަނދުތަކަށް ކޮންމެ ހަފްތާއަކަށް ކޯޓާ ކަނޑައަޅައިގެން ތެޔޮ ވިއްކަން ހާއްސަ ފާހެއް ހޮނިހިރު ދުވަހު ތައާރަފްކޮށްފި އެވެ.
އެނާޖީ މިނިސްޓަރު ކަންޗަނާ ވިޖެސޭކަރަ ވިދާޅުވީ "ނޭޝަނަލް ފިޔުލް ޕާސް"ގެ ދަށުން ކޮންމެ ހަފްތާއަކަށް ވެސް ކަނޑައަޅާފައިވާ ކޯޓާއާ އެއް ވަރަށް ތެޔޮ ވިއްކާނެ ކަމަށެވެ.
އެ ނިޒާމުގެ ދަށުން ފާސް ހޯދަން ރަޖިސްޓްރީ ވާން ޖެހެނީ އައިޑީ ކާޑު ބޭނުންކޮށްގެނެވެ.
"މިހާރު އާއްމުންނަށް ރަޖިސްޓްރީވެވޭނެ. މި ނިޒާމަށް އަމަލު ކުރަން ފަަށައި ތެޔޮ ވިއްކަން ފެށުމުން އަޅުގަނޑުމެން އަންގާނަން،" ވިޖެސޭކަރަ ވިދާޅުވި އެވެ.
އޭނާ ވިދާޅުވީ މީގެ ކުރިން އަަމަލު ކުރި ގޮތުގެ ސަބަބުން ބައެއް މީހުން އެއް ފަހަރާ ގިނައިން ތެޔޮ ގަނެ، ފޮރުވައިގެން އުޅޭ ކަމަށެވެ.
އަލަށް ތައާރަފު ކުރި ނިޒާމުގެ ދަށުން ޕްރައިވެޓް ވެހިކަލްތަކަށް ކޯޓާ ކަނޑައަޅަން ނިންމި ނަމަވެސް، އާންމު ދަތުރުފަތުރު ކުރާ ބަހާއި ރޭލުތަކަށް ބޭނުންވާ ވަރަށް ތެޔޮ ވިއްކަމުން ދާނެ އެވެ.
ތެޔޮ އެތެރެ ކުރާނެ ޑޮލަރު ނެތިގެން ލަންކާގައި ތެލަށް ޖެހިފައިވާ އިރު، އުޅަނދުތަކަށް ޕެޓްރޯލާއި ޑީސެލް އަޅަން އެތައް ދުވަހެއް ވަންދެން ދިގު ކިޔުތަކުގައި ތިބެން ޖެހެ އެވެ.
