އެފްއޭއެމް ދެ ވަނަ ޑިވިޝަން ފުޓްބޯޅަ މުބާރާތުގައި މިރޭ 2-1 އިން ބީޖީ ސްޕޯޓްސް ކްލަބް ބަލިކޮށް ވިކްޓަރީ ސްޕޯޓްސް ކްލަބް ފުޓްބޯޅައިގެ ހަރަކާތްތަކަށް އެނބުރި އައުން މޮޅަކުން ފާހަގަކޮށްފި އެވެ.
އެޑްމިނިސްޓްރޭޝަނާއި މުސާރައިގެ މައްސަލަތަކާ ހެދި ވިކްޓަރީ ތިން އަހަރެއްހާ ދުވަހު ސަސްޕެންޝަނެއްގައި އޮތުމަށް ފަހު، އެނބުރި އައިސް ރަސްމީ މެޗެއް ކުޅުނީ މިރޭ އެވެ. މިއީ 51 އަހަރުވީ ރާއްޖޭގެ އެންމެ ކާމިޔާބު އެއް ކްލަބް ކަމަށްވާ، ވިކްޓަރީން ފާއިތުވި 1021 ދުވަސް ތެރޭ ކުޅުނު ރަސްމީ ފުރަތަމަ މެޗެވެ. އަދި 2018 ވަނަ އަހަރުގެ އޮކްޓޫބަރު މަހު ދިވެހި ޕްރިމިއާ ލީގުގައި ތ. ތިމަރަފުށި އަތުން މޮޅުުވި ފަހުން ރަސްމީ މެޗެއްގައި މޮޅެއް ހޯދި ފުރަތަމަ ފަހަރެވެ.
މިރޭގެ މެޗަށް ނުކުތް ވިކްޓަރީގެ ފުރަތަމަ އެގާރަ ކުޅުންތެރިން.--- ފޮޓޯ: އިމޭޖަސް،އެމްވީ
ވިކްޓަރީން 2019 ވަނަ އަހަރުގެ ދިވެހި ޕްރިމިއާ ލީގުގައި ވާދަކުރި ނަމަވެސް ސަސްޕެންޝަނާ ހަމައަށް ދިޔައިރު އޮތީ މޮޅެއް ނުލިބި އެވެ.
ގަލޮޅު ދަނޑުގައި މިރޭ ކުޅުނު މެޗު ފަށައިގެން، ފުރަތަމަ ހާފުގައި ވިކްޓަރީން ދެ ގޯލުގެ ލީޑެއް ނެގި އެވެ. ވިކްޓަރީގެ ފުރަތަމަ ގޯލު ޖެހީ އެ ޓީމުގެ ލެބަނަން ފޯވާޑް މުހައްމަދު ކުޑޫ އެވެ. މިއީ ވިކްޓަރީގެ ވާތުބެކް، މުހައްމަދު އާމިރް ނެގި ހުރަހަކުން އޭރިއާތެރެއިން އަހުމަދު އިމާޒް (އާއްކޮ) ބޮލުން ޖައްސާލި ބޯޅަ ކޮންޓްރޯލް ކުރުމަށް ފަހު އޯވަހެޑް ކިކަކުން ކުޑޫ ޖެހި ގޯލެކެވެ.
ގޯލު ޖެހުމަށް ފަހު ވިކްޓަރީގެ ކުޑޫ އުފާފާޅުކުރަނީ.--- ފޮޓޯ: އިމޭޖަސް،އެމްވީ
ލީޑުނެގިތާ އިރުކޮޅެއްގެ ތެރޭގައި ވިކްޓަރީން ވަނީ ދެ ވަަނަގޯލެއް ޖަހައިފަ އެވެ. ކުޑޫ ކުރިއަށް ޖައްސާލި ބޯޅަ ބީޖީ ޑިފެންސް ފަހަތުން ހޯދައި، ވިކްޓަރީގެ ކުރިއަށް ކުޅޭ އަހުމަދު ހުސެއިން (އައްމަޑޭ) ވަނީ ހަމަޖެހިލާފައި ގޯލުގެ މަތީ ދާގަނޑަށް ބޯޅަ އަމާޒުކޮށްލައިފަ އެވެ.
ކުރިން ވިކްޓަރީގެ އިތުރުން ފުރަތަމަ ޑިވިޝަނުގެ ގިނަ ކްލަބްތަކަށް ކުޅެފައިވާ، ހަސަން އަދުހަމް (ސަޑޭ)ގެ ކެޕްޓަންކަމުގައި ކުޅުނު ވިކްޓަރީން ފުރަތަމަ ހާފު ނިމުމުގެ ކުރިން އާއްކޮ ރަނގަޅު ހަމަލާއެއް ފޮނުވާލި އެވެ. އެ ބޯޅަ ދިޔައީ އަރިމަތިން ބޭރުންނެވެ.
ފުރަތަމަ ހާފުގައި ބީޖީގެ ކުޅުންތެރިންނަށް ވިކްޓަރީގެ ގޯލުގައި ހުރި މިސްރުގެ ކީޕަރު، އަހުމަދު ސައީދު ހުރި ގޯލަށް ނުރައްކާތެރި ހަމަލާއެއް ފޮނުވާނުލެވުނެވެ.
ވިކްޓަރީގެ ޝާން (ކ) މިރޭގެ މެޗުގެ ތެރެއިން ބީޖީ ކުޅުންތެރިއަކު ކައިރިން ބޯޅަ ފޮނުވާލަނީ.--- ފޮޓޯ: އިމޭޖަސް.އެމްވީ
އެކަމަކު، ދެ ވަނަ ހާފުގެ ކުޅުން ފެށިގެން ބީޖީން ކުރިއަށް ޖެހިގެން ކުޅެ ފުރުސަތު ތަނަވަސްކުރަން ފެށި އެވެ. ބީޖީން ވަނީ މެޗުގެ 60 ވަނަ މިނިޓްގައި ލިބުނު ޕެނަލްޓީއެއް ކާމިޔާބުކޮށް މެޗުގެ ތެރެއަށް އެނބުރި އައިސްފަ އެވެ. މި ޕެނަލްޓީ ކާމިޔާބުކުރީ ޔަފާއު މުހައްމަދު (ޔާ) އެވެ.
މެޗުގެ ފަހުކޮޅުގައި ބީޖީން ކުރިއަށް ޖެހިގެން އިތުރު ގޯލެއް ޖަހައި ނަތީޖާ ހަަމަހަމަކުރަން ކުރި މަސައްކަތް .ކާމިޔާބެއްނުވި އެވެ. އެ ޓީމުން ފޮނުވާލި ބޯޅަތައް ބްލޮކްކުރުމުގައި ވިކްޓަރީގެ ޑިފެންސްލައިން ފެނުނީ ވަރުގަދަކޮށެވެ.
އަނެއްކޮޅުން، ވިކްޓަރީން ވެސް ބަދަލުތަކެއް ގެނެސްގެން، ކައުންޓަ އެޓޭކުގައި ތިން ވަނަ ގޯލެއް ޖެހޭތޯ ބެލި އެވެ. ވިކްޓަރީގެ އައްމަޑޭ އަށް މެޗުގެ އިތުރު ވަގުތުގައި ލިބުނު ފުރުސަތަކުން އޭނާ އޭރިއާތެރެއިން ޖެހި ބޯޅަ ދިޔައީ ގޯލު ކުރިމަތިން ހުރަސްވެގެންނެވެ.
ދެ ވަނަ ޑިވިޝަނުގައި ވިކްޓަރީ ހިމެނޭ ގްރޫޕްގެ ދެ މެޗެއް މާދަމާ އޮންނާނެ އެވެ. ހަވީރު ކުޅޭ މެޗުގައި އެލްޓީ ސްޕޯޓްސް ކްލަބާއި ލޮރެންޒޯ ސްޕޯޓްސް ކްލަބް ބައްދަލުކުރާއިރު، މާދަމާ ރޭ އޮންނާނީ ނިއު ރޭޑިއަންޓް ސްޕޯޓްސް ކްލަބާއި ކްލަބް ޓީނޭޖް ކުޅޭ މެޗެވެ.
