ހަރުދަނާ ސަރުކާރެއް ގާއިމް ނުކުރެވޭ ނަމަ ގައުމު ހުއްޓޭނެ ކަމުގެ އިންޒާރު ސްރީލަންކާގެ މަރުކަޒީ ބޭންކުގެ ގަވަރުނަރު ނަންދަލާލް ވީރަސިންގެ ދެއްވައިފި އެވެ.
ކޮންމެހެން ބޭނުންވާ ޕެޓްރޯލިއަމް އިމްޕޯޓް ކުރަން ބޭރު ފައިސާ ހޯދޭނެ ކަމާ މެދު "ގިނަ ޝައްކުތަކެއް" އެބަ ހުރި ކަމަަށް ބީބީސީގެ ނިއުސްނައިޓް ޕްރޮގްރާމްގައި އޭނާ ވިދާޅުވި އެވެ.
އޭނާ ވިދާޅުވީ މި ހާލަތުން އަރައިގަންނަން ބައިނަލްއަގްވާމީ އެހީގެ ޕެކޭޖެއް ލިބުން ބިނާ ވަނީ ހަރުދަނާ ސަރުކާރެއް ގާއިމް ކުރުމުގެ މައްޗަށް ކަމަަށެވެ.
"މި މަސް ނިމެންދެން ބޭނުންވާ ޑީސެލްގެ ތިން ޝިޕްމަންޓާއި ޕެޓްރޯލްގެ އެކެއް ނުވަތަ ދެ ޝިޕްމަންޓަށް ފައިސާ ހަމަޖެހިއްޖެ. އެކަމަކު އޭގެ ފަހުން ދެން ވާނެ ގޮތެއް ނޭނގޭ،" އެޕްރީލް މަހު ގަވަރުނަރު ކަމަށް ވަޑައިގެންނެވި ނަަންދަލާލް ވިދާޅުވި އެވެ.
"ހަމަޖެހޭ ނިންމުންތައް ނިންމޭނެ ބޮޑު ވަޒީރަކާއި، ރައީސަކާއި، ކެބިނެޓެއް އަޅުގަނޑަަށް ބޭނުން ވަނީ އެހެންވެ. އެކަން ނުވާ ނަމަ ރައްޔިތުން އުޅެން ޖެހޭނީ ވަރަށް ހާލުގައި."
އިގްތިސާދީ ކާރިސާއާ ހެދި ހަލަބޮލިވެފައިވާ ސްރީލަންކާގެ ރައްޔިތުން ޑިމާންޑް ކުރަނީ ރައީސް އާއި ބޮޑު ވަޒީރުގެ އިސްތިއުފާއަށެވެ. ގައުމު ދޫކުރައްވައި ރާއްޖޭގައި އެއް ދުވަސް މަޑު ކުރެއްވުމަށް ފަހު ބުރާސްފަތި ދުވަހު ސިންގަޕޫރަށް ވަޑައިގެންނެވި ރައީސް ގޮތަބަޔާ ރާޖަޕަކްސަ ވަނީ އިސްތިއުފާގެ ސިޓީ ރަސްމީކޮށް ހުށަހަޅުއްވައިފަ އެވެ.
މިހާރު ވަގުުތީ ރައީސްގެ މަގާމުގައި ހުންނެވީ ބޮޑު ވަޒީރު ރަނިލް ވިކްރަމަސިންހަަ އެވެ. ހަމަނުޖެހުންތަކާ ހެދި އެމަނިކުފާނު ވަނީ ދެ ވަނަ ދުވަހަކަށް ކާފިއު ހިންގަވާފަ އެވެ.
އިގްތިސާާދީ ކާރިސާއިން އަރައިގަތުމަށް އިންޓަނޭޝަނަލް މަނިޓަރީ ފަންޑް (އައިއެމްއެފް) އާ އެކު މަޝްވަރާ ކުރުމުގަައި އިސްކޮށް އުޅުއްވަނީ ގަވަރުނަރު ނަންދަލާލް އެވެ.
"ދަރަނި ރީސްޓްރަކްޗާ ކުރުމުގެ މަަޝްވަރާގައި ކްރެޑިޓަރުންނާ އެކު ރަނގަޅު ކުރިއެރުމެއް ލިބޭނެ ކަމަށް އުއްމީދު ކުރެވޭ. އެކަމަކު އެ މަޝްވަރާ ކުރިއަށް ދިޔުން ބިނާ ވަނީ ހަރުދަނާ ސަރުކާރެއް ގާއިމް ކުރުން އަވަސްކޮށްގެން،" އޭނާ ވިދާޅުވި އެވެ.
ހަރުދަނާ ސަަރުކާރެއް ގާއިމް ކުރުމަށް ފަހަު ކުރިއަަށް އޮތް "ތިން މަހާއި ފަސް މަހުގެ މުއްދަތެއްގެ ތެރޭގައި" މި ކާރިސާއިން އަރައިގަނެވިދާނެ ކަމަށް އޭނާ ވިދާޅުވި އެވެ.
އާ ރައީސްގެ މަގާމަށް އަންނާނެ ކަމަށް ބެލެވޭ ބޭފުޅުންގެ ތެރޭގަައި ނަންދަލާލް ހިމެނިވަޑައިގަންނަވަ އެވެ. އެކަމަކު އޭނާ ބީބީސީއަަށް ވިދާޅުވީ "އެއްވެސް ސިޔާސީ މަގާމަކަށް ޝަައުގެއް ނެތް" ކަމަށެވެ.
