ކ. އަތޮޅުގެ ރަށެއްގައި ކުޑަކުއްޖަކަށް ޖިންސީ ގޯނާ ކުރި ކަމަށް ތުހުމަތު ކުރެވޭ މީހަކަށް މިރޭ އަނިޔާ ކުރަމުންދަނިކޮށް އެކަން ހުއްޓުވަން މަސައްކަތް ކުރި ފުލުހުން ގައިގައި ވެސް ބަޔަކު ތަޅައިގަނެފި އެވެ.
ފުލުހުންގެ މީޑިއާ އޮފިޝަލް ވިދާޅުވީ ކ. އަތޮޅު ރަށެއްގައި އުމުރުން 14 އަހަރުގެ އަންހެން ކުއްޖަކަށް ޖިންސީ ގޯނާ ކުރި ކަމަށް ބުނާ މައްސަލައެއް ރިޕޯޓުކޮށްފައިވަނީ މިއަދު އިރު އޮއްސި 18:30 ހާއިރު ކަމަށެވެ.
ކުޑަކުއްޖާއަށް ޖިންސީ ގޯނާ ކުރި މީހާގެ އިތުރުން ފުލުހުންނަށް ވެސް އަނިޔާވެފައިވާ ކަމަށް އެ އޮފީހުން ބުންޏެވެ.
"އެކަން ހުއްޓުވުމަށް ހަރަކާތްތެރިވި ފުލުހުންނަށް ހަމަލާ ދިނުމުގެ ސަބަބުން ބައެއް ފުލުހުންނަށް އަނިޔާވެފައިވޭ. މައްސަލައިގައި ތުހުމަތު ކުރެވޭ މީހާއަށް ވެސް ވަނީ އެކި ވަރުގެ އަނިޔާތައް ވެފައި،" ފުލުހުން ބުނެފައިވެ އެވެ.
ކުޑަކުއްޖާއަށް ޖިންސީ ގޯނާ ކުރި މައްސަލައިގެ އިތުރުން ފުލުހުންނަށާއި ތުހުމަތު ކުރެވޭ މީހާއަށް ހަމަލާ ދިން މައްސަލަ ވެސް ފުލުހުން އަންނަނީ ތަހުގީގު ކުރަމުންނެވެ.
