ސްރީލަންކާގެ ސަރުކާރުގެ އިސްވެރިންގެ އިސްތިއުފާއަށް ގޮވާލައި ކުރަމުން އަންނަ މުޒާހަރާގެ ބައިވެރިން ރައީސް ގޮތަބަޔާ ދިރިއުޅުއްވާ ރިޔާސީ ގަނޑުވަރާއި ބޮޑު ވަޒީރުގެ ގެކޮޅުން ނިކުންނަން ނިންމާފައިވާ ކަމަށް ބައިވެރިން މިއަދު ބުނެފި އެވެ.
ލަންކާ ސަރުކާރާ ދެކޮޅަށް ކުރަމުން އަންނަ މުޒާހަރާތައް ހޫނުވެ، ބައިވެރިން ރިޔާސީ ގަނޑުވަރަށް ވަދެގަތީ ވޯޓާ ކެނޮން ބޭނުންކޮށްގެން ފެންޖަހައި، ކަރުނަ ގޭސް ބޭނުންކުރަމުން ދަނިކޮށް މިދިޔަ ހޮނިހިރު ދުވަހު އެވެ.
ރައީސްގެ ގަނޑުވަރުގެ އިތުރަށް މުޒާހަރާގެ ބައިވެރިން ފަހުން ވަނީ ލަންކާގެ ބޮޑުވަޒީރު ރަނިލް ވިކްރަމަސިންހުގެ ގެކޮޅަށް ވެސް ވަދެ އެ ގެކޮޅުގައި އަލިފާން ޖަހާފަ އެވެ.
އަދި، އިއްޔެގެ ވަގުތެއްގައި ބޮޑުވަޒީރު އަދި ވަގުތީގޮތުން ވެރިކަމުގައި މިވަގުތު ހުންނެވި ރަނިލް ވިކްރަމްސިންހަގެ އޮފީހަށް ވެސް ވަނީ ވަދެގެންފަ އެވެ.
މުޒާހަރާގެ ބައިވެރިންނާ ހަވާލާދީ ލަންކާގެ ނޫސްތަކުން ރިޕޯޓުކޮށްފައިވާ ގޮތުގައި ރިޔާސީ ގަނޑުވަރުންނާއި ބައިވެރިން ހިސޯރުކޮށްފައިވާ އެހެނިހެން ތަންތަނުން ސުލްހަވެރިކަމާއެކު ނިކުންނަން މިހާރު ވަނީ ނިންމާފަ އެވެ. އަދި މިއަދު އެ ތަންތަން ސަލާމަތީ ބާރުތަކާ ހަވާލުކުރާނެ ކަމަށް ވެސް ވެ އެވެ.
އެތަންތަނުން ނިކުންނަން ނިންމި ނަމަވެސް މުޒާހަރާތައް ހުއްޓާލާނީ ވެރިން އިސްތިއުފާ ދިނުމުން ކަމަށް ވެސް މުޒާހަރާގެ ބައިވެރިން ވަނީ ބުނެފަ އެވެ.
ލަންކާގައި މުޒާހަރާތައް ހުއްޓާނުލާ ކުރިއަށް ގެންދަން ނިންމާފައިވާއިރު، މިއަދު މެންދުރު 12 އިން ފެށިގެން ކޮލަމްބޯގައި ވަނީ ކާފިއު ވެސް އިއުލާނުކޮށްފަ އެވެ.
ގޮތަބަޔާ އޭނާގެ އާއިލާއާ އެކު ރޭ ރާއްޖެއަށް އައިސްފައިވާއިރު، މިދިޔަ ހޮނިހިރު ދުވަހު ސްރީ ލަންކާގެ އާންމުންގެ ވަރަށް ގިނަ ބަޔަކު އެއްވެ ގޮތަބަޔާގެ ގެކޮޅަށް ހިސޯރު ކުރުމަށް ކުރި ބޮޑު މުޒާހަރާއަށްފަހު އޭނާ ވަނީ ވެރިކަމުން އިސްތިއުފާދެއްވާނެ ކަމަށް ވިދާޅުވެފަ އެވެ. ނަމަވެސް އަދިވެސް މަގާމުން އިސްތިއުފާދެއްވާފައެއް ނުވެ އެވެ.
ރައީސް ގޮތަބަޔާ ވަނީ މީގެ ކުޑަ އިރުކޮޅެއް ކުރިން ސައުދީ އެއާލައިންސްގެ ފްލައިޓަކުން ސިންގަޕޫރަށް ވަޑައިގެންފަ އެވެ.
