ސްރީލަންކާގެ ރައީސް ގޮތަބަޔާ ރާޖަޕަކްސާ ހައްޔަރުކުރުމަށް އަމުރެއް ހޯދުމަށް އިނގިރޭސިވިލާތުގެ ގާނޫނު ހަދާ މަޖިލީހަށް އެ ގައުމުގެ ލިބެރަލް ޑިމޮކްރަޓުންގެ ލީޑަރު އެޑް ޑޭވީ ހުށަހަޅުއްވައިފި އެވެ.
ގާތްގަނޑަކަށް 20 މިލިއަން މީހުންގެ އާބާދީއެއް އޮންނަ ސްރީ ލަންކާގެ އިގްތިސާދު ވެއްޓި ގައުމުގެ ހާލަތު ވަރަށް ގޯސްވެފައި ވަނިކޮށް، އެ ގައުމުގެ ރައީސް ގޮތަބަޔާ ރާޖަޕަކްސަ ވަނީ ގައުމު ދޫކުރައްވައި ފިއްލަވައިގެން ރާއްޖެ ވަޑައިގެންފަ އެވެ. ސައުދީ އެއާލައިންސްގެ ބޯޓެއްގައި ސިންގަޕޫރަށް ފުރާވަޑައިގަތީ ރާއްޖޭގައި 32 ގަޑިއިރު ހޭދަކުރެއްވުމަށްފަހު ދެންމެ އެވެ.
އިނގިރޭސިވިލާތުގެ ގާނޫނު ހަދާ މަޖިލީހުގެ އަންގާރަ ދުވަހުގެ ޖަލްސާގައި ވާހަކަދައްކަވަމުން އެޑް ޑޭވީ ވިދާޅުވީ ލަންކާ ރައްޔިތުންނަށް ދިމާވެފައިވާ ދަތި ހާލަތުގެ ޒިންމާ ނަންގަވަން ޖެހޭނީ ގޮތަބަޔާގެ ސަރުކާރުން ކަމަށެވެ. އަދި އެއީ ވެރިންގެ ކޮރަޕްޝަންގެ އަމަލުތަކުގެ ސަބަބުން ދިމާވެފައިވާ ހާލަތެއްގެ ގޮތުގައި ސިފަ ކުރެއްވި އެވެ.
ޑޭވީ ވަނީ އިނގިރޭސިވިލާތުން ބައިނަލްއަގްވާމީ އެހެނިހެން ގައުމުތަކާ ގުޅިގެން ލަންކާ ރައްޔިތުންނަށް އިގްތިސޯދީ އަދި ސިޔާސީ ގޮތުން ހައްލުތަކެއް ހޯދައިދިނުމަށް ހުށަހަޅުއްވާފަ އެވެ.
އޭގެތެރޭގައި ގޮތަބަޔާ އާއި ބައިވެރިން ހައްޔަރުކުރުމަށް ބައިނަލްއަގްވާމީ އަމުރެއް ހޯދުމަށް މަސައްކަތް ކުރަން ވެސް ވަނީ ހިމަނައިފަ އެވެ.
އަނބިކަނބަލުންނާއި ދެ ބޮޑީގާޑުންނާއެކު ގޮތަބަޔާ ރާއްޖެ ވަޑައިގަތީ އަންގާރަ ދުވަހުގެ ދަންވަރު 2:50 ގައި އަސްކަރީ އުޅަނދެއްގަ އެވެ.
އިއްޔެ ބޭއްވި އޯލް ޕާޓީ ޓޯކްސްގައި ގާނޫނު ހަދާ މަޖިލީހުގެ ރައީސް ވިދާޅުވެފައި ވަނީ ގޮތަބަޔާ 13 ވަނަ ދުވަހުގެ ދަންވަރު 12:00 ޖެހުމުގެ ކުރިން އިސްތިއުފާ ދެއްވާނެ ކަމަށް އޭނާ އަރިހު ފޯނުން ގުޅުއްވައި ވިދާޅުވެފައިވާ ކަމަށެވެ. ނަމަވެސް އެ ސިޓީ ރޭ ލިބިފައިނުވާކަން މަޖިލީހުން ޔަގީންކޮށްދެ އެވެ.
