ގޭބިސީތަކުން ކުނި އުކާލުމުގައި ވަކިވަކި އެޕާޓްމެންޓުތައް ވެސް މިހާރު ރެޖިސްޓްރީ ކުރެވޭނެ ކަމަށް ވޭސްޓް މެނޭޖްމަންޓް ކޯޕަރޭޝަން ލިމިޓެޑް (ވެމްކޯ) އިން ބުނެފި އެވެ.
ކުނި އުކާލުމުން ވެމްކޯއަށް އުޖޫރަ ނުލިބޭ މައްސަލަ ބޮޑުވެ، ވެމްކޯއިން ވަނީ ގޭގެ ވެރިފަރާތުން ހިދުމަތަށް ރަޖިސްޓްރީ ކުރަން ޖެހޭ ގޮތަށް ހަމަޖައްސައި، ގޭބީސީތަކަށް ކުނި އުކާލުމުގެ ހިދުމަތް އެޕާޓްމެންޓު ދޮރުމަތިން ދޭ ގޮތަށް މިދިޔަ ސެޕްޓެމްބަރު މަހު ބަދަލުކޮށްފަ އެވެ.
"ގޭބިސީތައް ރެޖިސްޓްރީކޮށްގެން ކުނި އުކާލުމުގެ ކަންކަން ކުރިއަށް ގެންދަން ފެށުމުން ފީ ދެއްކުމުގެ ބައި ވަރަށް ބޮޑަށް ހައްލުވެގެން ދިޔަ، އެހެންނަމަވެސް އެ ކަމުގައި ވެސް ގިނަ ބައެއްގެ ކަންބޮޑުވުންތައް ހުރުމުން މިހާރު ކުއްޔަށް ނަގައިގެން އުޅޭ ފަރާތުގެ ނަމުގައި ވަކިވަކި އެޕާޓްމެންޓުތައް ވެސް ރެޖިސްޓްރީ ކޮށްދެމުން އަޅުގަނޑުމެން މި އަންނަނީ،" ވެމްކޯގެ ޑެޕިއުޓީ މެނޭޖިން ޑިރެކްޓަރު ޔޫސުފް ސިރާޖު މި ނޫހަށް ވިދާޅުވި އެވެ.
ސިރާޖު ވިދާޅުވި ގޮތުގައި އެ ބަދަލު ގެންނަން ނިންމީ ގިނަ ބަޔަކު އެކަމަށް އެދެމުން އަންނާތީ އެވެ. އަދި ވަކިވަކި އެޕާޓްމެންޓުތައް ހިދުމަތުގައި ރެޖިސްޓްރީ ކުރުން އާންމުކޮށް އަމަލު ކުރަމުން އަންނަ ގޮތާ ތަފާތުވާނެ ކަން ވެސް ފާހަގަކުރެއްވި އެވެ.
ވެމްކޯގެ ޑެޕިއުޓީ މެނޭޖިން ޑިރެކްޓަރު ޔޫސުފް ސިރާޖު މި ނޫހަށް އިންޓަވިއު ދެއްވަނީ--ފޮޓޯ: އަބްދުﷲ އިޔާން/ އަދަދު
އެގޮތުން، އާންމު ރެޖިސްޓްރޭޝަންތައް އޮންލައިންކޮށް ކުރިއަށް ގެންދެވުނު ނަމަވެސް، ވަކިވަކި އެޕާޓްމެންޓުތައް ރެޖިސްޓްރީ ކުރެވޭނީ ގޭގެ ވެރިފަރާތުގެ އިޒުނައާއެކު، ވެމްކޯ އޮފީހަށް ހާޒިރުވެގެންނެވެ.
"ވެމްކޯގެ އެހެނިހެން ގިނަ ހިދުމަތްތައް އޮންލައިންކޮށް ލިބިވަޑައިގަންނަވާނެ، އެހެންނަނަވެސް ވަކި އެޕާޓުމެންޓުތައް ރެޖިސްޓްރީ ކުރުމަށް އަދި ހަމަޖެހިފައި އޮތީ ހާޒިރުވެގެން ކުރާ ގޮތަށް، އެއީ ގޭގެ ވެރިފަރާތުން ބޭނުންވެގެން ޑިޕޮސިޓެއް ބަހައްޓާފައި، ކުއްޔަށް ނަގައިގެން އުޅޭ ފަރާތްތަކުން އަމިއްލައަށް ފައިސާ ދައްކާ ގޮތަށް،" ސިރާޖު ވިދާޅުވި އެވެ.
ކުއްޔަށް ނަގައިގެން އުޅޭ ފަރާތުގެ ނަމުގައި ހިދުމަތް ރެޖިސްޓްރީ ކޮށްދެމުން އަންނަތާ މިހާރު ދެ މަސް ވެފައިވާ ކަމަށް ވެސް ސިރާޖު ވިދާޅުވި އެވެ.
ގޭގެ ވެރިފަރާތުން ވެމްކޯގެ ހިދުމަތުގައި ރެޖިސްޓްރީ ކުރާ ގޮތަށް އެ ކުންފުނިން ނިންމީ ކުނި އުކާލުމުން ބިލް ނުދައްކާ އެ ކުންފުންޏަށް ލިބެން ޖެހޭ އެތައް މިލިއަން ރުފިޔާއެއް ނުލިބޭ މައްސަލަ ބޮޑުވުމާ ގުޅިގެންނެވެ. މިހާރު ވެސް ވެމްކޯއަށް ކުނި އުކައިގެން ލިބެން ޖެހޭ 40 މިލިއަނަށް ވުރެ ގިނަ ރުފިޔާ ނުލިބިވާއިރު، އެ ފައިސާ ހޯދުމުގެ މަސައްކަތް އެ ކުންފުނިން އަންނަނީ ކުރަމުންނެވެ.
މާލޭ ސަރަހައްދުގައި ވެމްކޯގައި ރެޖިސްޓްރީ ކޮށްގެން މިހާރު ކުނި އުކަމުން އަންނަނީ 14،000 ގޭބިސީންނެވެ. އެހެންނަމަވެސް ކަރަންޓާއި ފެން ފަދަ އެހެނިހެން ޔުޓިލިޓީ ހިދުމަތްތައް ހޯދާ ކަސްޓަމަރުންގެ އަދަދު 40،000 އަށް ވުރެ އިތުރުކަން ސިރާޖު ފާހަގަކުރެއްވި އެވެ.
އެކަމަށް ހައްލެއް ގެނައުމުގެ ގޮތުން ސަރުކާރުން މަޖިލީހަށް ހުށަހަޅާފައިވާ ވޭސްޓު މެނޭޖުމަންޓު ބިލުގައި ވަނީ ޔުޓިލިޓީ ބިލްތަކާއެކު ކުނީގެ ބިލް ވެސް ހިމެނުމަށް ހިމަނާފަ އެވެ.
އެ ބަދަލު ގެނައުމާއެކު، ވެމްކޯއިން ދެމުން އަންނަ ހިދުމަތްތަކުގެ ހަމަ އުޖޫރަ ލިބިގެން ދާނެ ކަމަށް ސިރާޖު ވެސް ގަބޫލުކުރައްވަ އެވެ.
