ސްރީލަންކާގެ ވަގުތީ ރައީސްކަމަށް އެ ގައުމުގެ ބޮޑު ވަޒީރު ރަނިލް ވިކްރަމަސިންހަ އައްޔަން ކޮށް، އެމަނިކުފާނާ ވެރިކަމުގެ ބާރުތައް ހަވާލުކުރައްވައިފި އެވެ.
އެ ގައުމުގެ ރައީސް ގޮތާބަޔާ ރާޖަޕަކްސާ ގައުމު ދޫކުރައްވައި ރޭ ރާއްޖެ ވަޑައިގެންފައިވާއިރު، ވެރިކަމުގެ ބާރުތައް ބޮޑު ވަޒީރަށް ދޫކޮށްލައްވާފައިވާކަން ލަންކާގެ ގާނޫނު ހަދާ މަޖިލީހުގެ ރައީސް ވަނީ އިއުލާނު ކުރައްވާފަ އެވެ.
ވަގުތީ ރައީސަކަށް ރަނިލް އައްޔަންކޮށްފައިވީ ނަމަވެސް، މިހާތަނަށް ގޮތާބަޔާ އަދި އިސްތިއުފާ ދެއްވާފައިނުވެ އެވެ. ރައީސް ގޮތަބަޔާ ރާއްޖެ ވަޑައިގެންފައި ވަނީ މިއަދުގެ ވަގުތެއްގައި އިސްތިއުފާ ދެއްވާނެކަމަށް މީގެ ތިން ދުވަސް ކުރިން އެމަނިކުފާނު އިއުލާން ކުރައްވާފައި އޮއްވަ އެވެ. ނަމަވެސް, އޭނާ މިއަދު އިސްތިއުފާ ދެއްވާނެ ކަމާމެދު މިހާރު ވަނީ ސުވާލު އުފެދިފަ އެވެ.
ބޭރުގެ ނޫސްތައް ބުނާ ގޮތުގައި އެމަނިކުފާނު އިސްތިއުފާ ދެއްވާނެ ކަމަށް ބެލެވެނީ ހިމާޔަތް ހޯއްދަވާ ގައުމަށް ވަޑައިގަތުމަށްފަހުގަ އެވެ. އަދި ރާއްޖެ ވަޑައިގެން ހުންނެވީ ޓްރާންސިޓެއްގެ ގޮތުގަ އެވެ.
ގޮތާބަޔާ ގައުމުން ބޭރަށް ފުރާވަޑައިގަތުމާއެކު، ލަންކާގެ އާންމުން ވަނީ ރިޔާސީ ގަނޑުވަރު ކައިރީގައި މުޒާހަރާ ފަށައިފަ އެވެ.
އެތަކެއް ހާސް ރައްޔިތުން ނުކުމެ ކުރަމުންދާ މުޒާހަރާތަކުގައި ހަމަނުޖެހުންތައް ހިނގުމުގެ ފުރުސަތު ނުދިނުމަށް ވަގުތީ ރައީސް ރަނިލް ވިކްރަމަސިންހަ ވަނީ ލަންކާގައި ކުއްލި ނުރައްކަލުގެ ހާލަތު އިއުލާނުކުރައްވާފަ އެވެ.
އޭގެ އިތުރުން ލަންކާގެ ހުޅަނގު ޕްރޮވިންސްގައި މިވަގުތުން ފެށިގެން ކާފިއު ވެސް ވަނީ އިއުލާނުކޮށްފަ އެވެ.
ގޮތަބަޔަ ރާއްޖެ ވަޑައިގެންނެވުމާ ގުޅޭގޮތުން ދިވެހި ސަރުކާރުން ރަސްމީކޮށް އަދި އެއްވެސް އެއްޗެއް ނުބުނެ އެވެ.
