ޖަޕާނުގެ ކުރީގެ ބޮޑުވަޒީރު ޝިންޒޯ އަބޭގެ ހަށިކޮޅަށް ބަޑި ޖަހައި އަވަހާރަކޮށްލިތާ ދެ ދުވަސް ފަހުން ޖަޕާނުގައި ބޭއްވި ގާނޫނު ހަދާ މަޖިލީހުގެ އިންތިހާބު އެމަނިކުފާނު ނިސްބަތްވާ ލިބަރަލް ޑިމޮކްރެޓިކް ޕާޓީގެ ކޯލިޝަނުން ކާމިޔާބުކޮށް، އެ މަޖިލީހުގެ ސުޕާމެޖޯރިޓީ ހޯދައިފި އެވެ.
އަބޭ، 67، ގެ ހަށިކޮޅަށް ބަޑިޖަހައި އަވަހާރަކޮށްލީ މަޖިލީހަށް ވާދަ ކުރި ކެންޑިޑޭޓެއްގެ ކެމްޕެއިން ހަރަކާތެއްގައި، ޕޯޑިއަމް ކައިރީ ވާހަކަ ދައްކަވަން ހުންނަވަނިކޮށެވެ. އިއްޔެ ބޭއްވި އިންތިހާބުގައި ލިބަރަލް ޕާޓީގެ ކޯލިޝަނަށް ވަނީ ޓޫ-ތާޑްސް ސުޕާމެޖޯރިޓީއެއް ލިބިފަ އެވެ. މާނައަކީ ޖަޕާނުގެ ގާނޫނޫ އަސާސީއަށް އިސްލާހު ގެނެވޭ މިންވަރަށް އެ ކޯލިޝަނަށް ވޯޓު ހަމަވީ އެވެ.
އިއްޔެ ބޭއްވި އިންތިހާބުގައި ލިބަރަލް ޕާޓީ އަދި ކޮމެއިޓޯ (ޖަޕާނުގެ ކޮންޒަވޭޓިވް ޕާޓީއެއް) އަދި އެ ދެ ޕާޓީގެ ކޯލިޝަން ބައިވެރިން ވަނީ މަތިގޭގެ 87 ގޮނޑި ކާމިޔާބުކޮށްފަ އެވެ. އެއީ އެ މަޖިލީހުގެ 70 ޕަސެންޓު ގޮނޑި އެވެ. ތިރިގޭގެ މެޖޯރިޓީ ވެސް އޮންނަނީ މި ދެ ޕާޓީ ހިމެނޭ ކޯލިޝަނަކަށެވެ.
ޖަޕާނުގެ އެނަލިސްޓުން ބުނީ އަބޭ އަވަހާރަކޮށްލުމުން ވޯޓުލާން ނިކުތް މީހުންގެ އަދަދު 2019 ވަނަ އަހަރާ އަޅާބަލާއިރު ގިނަވެފައިވާ ކަމަށެވެ. މިފަހަރު ވޯޓުލާން ނިކުތް މީހުންގެ އިންސައްތައަކީ ހައްގު އޮންނަ މީހުންގެ 52 ޕަސެންޓެވެ. ކުރިން، 2019 ގައި ވޯޓުލީ އެ ހައްގު އޮންނަ މީހުންގެ ތެރެއިން 49 ޕަސެންޓު މީހުންނެވެ.
ގޭގައި އަމިއްލައަށް ހެދި ޝޮޓްގަންއަކުން އަބޭގެ ހަށިކޮޅަށް ބަޑިޖަހައި އަވަހާރަކޮށްލީ ޓެޓްސޫޔާ ޔަމަގާމީ ނަމަކަށް ކިޔާ 42 އަހަރުގެ ފިރިހެނެކެވެ. ބަޑި ޖެހި ތަނުން އޭނާ ހައްޔަރުކޮށްފައިވާއިރު މިހާތަނަށް އެނގެން ހުރި މައުލޫމާތަށް ބަލާއިރު އޭނާ އަބޭ އަވަހާރަކޮށްލީ ސިޔާސީ މައްސަލައެއްގައެއް ނޫނެވެ.
އަބޭއަކީ ޖަޕާނުގައި އެންމެ ގިނަ ދުވަހު ވެރިކަން ކުރެއްވި ބޮޑުވަޒީރެވެ. އޭނާ ބޮޑުވަޒީރުކަން އެންމެ ފުރަތަމަ ކުރެއްވީ 2006 ފެށިގެން 2007 ވަނަ އަހަރާ ހަމައަށެވެ. އަދި ފަހުން 2012 ވަނަ އަހަރުން ފެށިގެން 2020 ވަނަ އަހަރާ ހަމައަށް ވެރިކަމުގައި ހުންނެވި އެވެ. އިސްތިއުފާ ދެއްވީ މަގާމުގައި ހުންނެވުމަށް ސިއްހީ ހާލަތު ތަންނުދޭ ކަމަށް ވިދާޅުވެ އެވެ.
އަބޭއަކީ ޖަޕާނުގެ މުއްސަނދި، ޖަޕާނުގެ ސިޔާސީ ދާއިރާގައި އިސް ރޯލެއް އަދާ ކުރެއްވި އާއިލާއެއްގެ ބޭފުޅެކެވެ. އޭނާގެ ބައްޕައަކީ ކުރީގެ ފޮރިން މިނިސްޓަރެކެވެ. އަދި އާއިލާގެ ބޭފުޅަކު ވަނީ ކުރީގައި ޖަޕާނުގެ ޕްރިމިއާގެ މަގާމުގެ ވެސް އަދާ ކުރައްވައިފަ އެވެ.
